Judith Estrada-Larino

Pinabawi muna ng Department of Health (DOH) ang coronavirus disease 2019 (COVID-19) test kits na dinivelop ng mga experts mula sa University of the Philippines (UP) dahil sa nakitang depekto umano rito.

Ipinabatid ni Health Undersecretary Maria Rosario Vergeire na mayroon lamang minor problem na nadiskubre sa test kits ang Research Institute for Tropical Medicine (RITM) habang bina-validate nito ang mga naturang test kits bagamat hindi naman tinukoy ang mga problemang ito.

Sinabi ni Vergeire na nakausap na ng DOH ang UP experts na nasa final stage na ng pagtama sa mga nakitang depekto sa test kits na muling iva-validate ng RITM sa susunod na linggo.

Naghahanda na ang Bureau of Immigration (BI) sa implementasyon ng digitized arrival cards at records para sa mas mahigpit na pagtutok sa mga pasahero.

Ayon kay Immigration Commissioner Jaime Morente, sa gitna pa rin ito nang patuloy na banta ng COVID-19 pandemic matapos ipabatid ng Pangulong Rodrigo Duterte sa kongreso ang ilulunsad na advanced passenger processing at information system ng ahensya.

Bahagi nito aniya ang paggamit ng digitized arrival cards at boarding passes para sa international passengers na papasok at lalabas ng mga port ng bansa.

Sinabi ni Morente na layon din ng bagong protocols na masunod ang social distancing upang maiwasan ang person to person contact sa pagitan ng officers at mga pasahero at para pangasiwaan ang contact tracing kung kakailanganin.

Magsisimula nang magbasa ng metro at maghatid ng bill sa susunod na buwan ang dalawang water concessionaires.

Ang gamit sa tubig sa kasagsagan ng enhanced community quarantine (ECQ) mula March 17 hanggang May 31, ayon sa Manila Water at Maynilad ay iko-compute base sa average consumption ng consumer sa nakalipas na tatlong buwan o bago ang lockdown.

Sinabi ng Manila Water na sisimulan naman nila sa July 1 ang pagpuputol ng linya ng tubig ng mga hindi pa nakapagbayad ng kanilang bill na mayroong due date bago ang March 16.

Ipinabatid pa ng Manila Water na magpapadala sila ng paalala para makapagbayad ng post ECQ bills simula July 16 at sisimulan naman ang disconnection sa August 1.

Samantala magbibigay naman ng mas mahabang grace period ang Maynilad o hanggang August 31 para mabayaran ang bill sa tubig ng kanilang customers mula March hanggang may kabilang ang mga hindi nabayaran noong Pebrero na hindi nabayaran dahil sa ECQ.

Ang notice of disconnections naman anito ay magsisimulang mailagay sa September bill.

Kasado na ang ipatutupad na calibrated lockdown ng Parañaque City government sa ilang lugar sa lungsod.

Epektibo mamayang 6:00 ng umaga hanggang 12:00 ng hatinggabi ng Sabado, May 23 ang calibrated lockdown ay iiral sa mga lugar ng Bagong Sikat, Bagong Lipunan, Bagong Pag-asa, Bagong Ilog, E. Rodriguez, Bagong Buhay, Bagong Silang, Dimasalang Extension, Mabuhay at Dose De Junio.

Sinabi ni Mayor Edwin Olivarez na pansamantalang suspendido ang paggamit ng home quarantine pass hangga‘t umiiral ang lockdown at tanging frontliners lamang ang papayagang lumabas ng bahay.

Tiniyak din ni Olivarez na bibigyan ng pangunahing ayuda tulad ng pagkain at tubig ang kada apektadong bahay sa kasagsagan ng lockdown.

Kasabay nito magsasagawa rin aniya ng masusi at malawakang pagsusuri sa mga naturang lugar bukod pa sa total disinfection at flushing bukas, May 22.

Nadagdagan pa ng 24 ang bilang ng mga Pilipinong nag positibo sa coronavirus disease 2019 (COVID-19) habang nasa ibang bansa.

Ayon sa Department of Foreign Affairs (DFA), hanggang sa ngayong araw, Mayo 20, pumapalo na sa 2,355 ang kumpirmadong COVID-19 positive na Pilipino sa 46 na bansa at rehiyon.

Sa naturang bilang, nasa 1,313 ang patuloy na nagpapagamot sa ibat-ibang ospital.

9 naman ang mga panibagong gumaling kaya’t nasa mahigit 800 na Pinoy abroad ang naka recover na mula sa COVID-19.

Samantala, 284 ang death toll matapos madagdagan ng 4 na mga nasawing Pinoy dahil sa nasabing virus.

Pinakamaraming naitalang confirmed COVID-19 positive na overseas Pinoy sa Europa na nasa 748, Middle East/Africa – 712, Americas – 544, at Asia Pacific region – 451.

Pinaiimbentaryo ng Malakaniyang sa OWWA ang bilang ng repatriated OFW gayundin ang bilang ng mga naghihintay ng resulta ng coronavirus disease 2019 (COVID-19) test nila habang nasa government accredited facilities.

Ayon ito kay Presidential Spokesman Harry Roque sa gitna na rin ng mga reklamo na may mga OFW na naiinip na sa quarantine facilities dahil higit na sila sa itinakdang 14-day quarantine period.

Una nang nakiusap si OWWA Administrator Hans Leo Cacdac sa mga OFW na dagdagan ang pasensya habang hinihintay ang resulta ng kanilang COVID-19 test bagamat hindi uubrang lumabas ng quarantine facilities ang mga ito.

Isinusulong ni Congressman Alfredo Garbin Jr. ang paggamit ng QR codes para matukoy ang mga pasaherong sumasakay sa mga pampublikong sasakyan kapag uubra nang mag-operate ang mga ito.

Kasunod na rin ito nang isinusulong ng LTFRB na pag-obliga sa PUV’s na magkaroon ng manipesto para magkaroon ng record ng kanilang mga pasahero kaugnay sa posibleng contact tracing sa gitna pa rin ng banta ng coronavirus disease 2019 (COVID-19).

Sinabi ni Garbin na ang handwritten passenger manifest ay magiging pahirap sa kapwa driver at commuter, at posibleng ma-expose sa identity theft, stalking at iba pang paglabag sa privacy.

Ayon pa kay Garbin, pinaka-epektibong solusyon para sa PUV ay magkaroon ng unique QR code o iba oang code na maaaring i-scan kung sasakay o bababa ng pampublikong sasakyan.

Idineklara ng Pangulong Rodrigo Duterte ang Mayo 25, araw ng Lunes, na regular holiday sa buong bansa bilang pag obserba sa Eid’l Fitr o Feast of Ramadan.

Nakasaad sa proklamasyon na ang pagkakataon ang nasabing holiday para makiisa sa mga kapatid na Muslim sa pagdiriwang ng Eid’l Fitr, batay na rin sa umiiral na community quarantine at panuntunan hinggil sa social distancing.

Ayon pa sa Malakaniyang, ang hakbangin ay bilang pagpapaabot sa religious at cultural significance ng Eid’l Fitr sa buong bansa.