Judith Estrada-Larino

Nag donate ng P10-milyon halaga ng medical supplies at equipment ang U.S. military para sa mga frontliners sa Pilipinas.

Kabilang sa mga inihatid ng ilang miyembro ng U.S. army, marines, at air force ay personal protective equipment (PPEs) at medical supplies para sa mga ospital sa 10 lalawigan sa bansa.

Ilan sa mga medical supplies na ibinigay ng U.S. military ay disposable gloves, masks, medical clothing, ibat-ibang uri ng face protection at tools tulad ng infrared thermometers.

Ayon kay Captain Tim Johnson, team leader ng Civil Military Support Element , ang hakbang ay pagpapakita nila ng matatag na pagkakaibigan sa Pilipinas at pakikipag kaisa sa lahat ng mga paraan para labanan ang nasabing virus.

Inaasahan na ng Department of Education (DepEd) ang posibleng migration o paglipat ng mga mag-aaral mula sa pribado patungo sa mga pampublikong paaralan dahil sa epekto ng coronavirus disease 2019 (COVID-19) pandemic.

Ayon ito kay Education Secretary Leonor Briones na nagsabi pang bagamat taun-taon naman nila itong na o-obserbahan sa tuwing magbubukas ang school year, posibleng maging panibagong dahilan ang economic impact ng COVID-19 lalo na sa kinikita ng bawat pamilya.

Inihayag pa ni Briones na ganito rin ang obserbasyon ng Technical Working Group  (TWG) ng National Economic and Development Authority (NEDA) kung saan ang posibleng paglipat ng mga estudyante sa public schools ay dahil sa epekto ng krisis sa ekonomiya.

Ikukunsider aniya nila ang kapasidad ng mga pampublikong eskuwelahan para ma-absorb o tanggapin ang mga lilipat na estudyante.

Kaugnay nito, ipinabatid ni Undersecretary Annalyn Sevilla na hihintayin nila ang resulta ng survey na gagawin ng DepEd kasabay ng enrollment period sa susunod na buwan na pagbabasehan nila sa paggawa ng mga polisiya.

Ipinag-utos ng Korte ang pagpapalaya sa public high school teacher mula sa Zambales na una nang inaresto ng NBI matapos mag tweet na nag-aalok ng P50 million na reward sa makakapatay sa Pangulong Rodrigo Duterte.

Kasunod na rin ito nang pagpa-piyansa ni Ronnel Mas ng P72,000.

Itinakda naman ni Olongapo RTC Judge Richard Paradeza ang arraignment at pre-trial sa kaso sa May 28.

Sinabi naman ng Alliance of Concerned Teachers (ACT) na hindi pa nila nakakamit ang hustisya para kay mas dahil mananagot pa ang gobyerno sa pagbalewala sa mga karapatan ng guro na una na anilang pinahiya ng NBI at iligal na ikulong sa loob ng walong araw.

Binawi na ni House Speaker Alan Peter Cayetano ang panukala niyang bigyan ng provisional franchise ang ABS-CBN.

Ito ayon kay Cayetano ay matapos konsultahin ang iba pang lider ng Kamara para na rin magkaruon ng malalimang pagdinig sa prangkisa ng media giant.

Dahil dito, tututok na lamang ang Kamara sa pagdinig ng 25-year franchise ng Kapamilya network.

Sinabi pa ni Cayetano na lahat ng gustong magsalita sa isasagawang pagdinig ng Kamara ay bibigyan nila ng pagkakataon.

Umakyat na sa halos 3,000 ang mga gumaling sa coronavirus disease 2019 (COVID-19) sa bansa.

Ito ayon sa Department of Health (DOH) ay matapos maitala ang 114 na bagong recoveries sa nakalipas na magdamag.

Naitala naman sa 12,942 na ang natatamaan ng COVID-19 matapos maitala ang 224 na bagong tinamaan ng nasabing virus.

Nadagdagan naman ng 6 ang death toll sa COVID-19 sa nakalipas na magdamag at ngayo’y nasa 837 na.

Ayon kay Health Undersecretary Maria Rosario Vergeire, sa mga bagong kaso, 174 o 78% ay mula sa Metro Manila; 17 mula sa Region 7; at ang 33 ay mula na sa ibat ibang bahagi ng bansa.

Posibleng magpatupad na ng retrenchment sa Agosto ang ABS-CBN kapag hindi nakakuha ng prangkisa.

Ayon ito kay ABS-CBN president at chief executive officer Carlo Katigbak sa pagdinig ng Senate Committee on Public Services.

Sinabi ni Katigbak na mula nang mawala ang media giant sa ere nuong May 5, tiniyak nila sa kanilang mga empleyado na hindi mawawala ng trabaho ang mga ito sa susunod na tatlong buwan.

Binigyang diin ni Katigbak na malaking halaga na ang nawala sa network at kung hindi sila makakabalik sa ere ay maaaring sa Agosto ay magpatupad na sila ng retrenchment.

O-obligahin ang ABS-CBN na ibigay sa gobyerno, kung kinakailangan, ang 10% ng paid advertisements sa ilalim ng provisional franchise na isinusulong ng Kamara para sa Kapamilya network.

Magugunitang nuong isang linggo ay lumusot sa committee level at ikalawang pagbasa ang House Bill 6732 na naglalayong bigyan ng provisional franchise ang ABS-CBN hanggang October 31, 2020.

Ang panukalang ini-akda ni House Speaker Alan Peter Cayetano at pitong iba pang kongresista ay naglalayong mabigyan ng provisional franchise ang media giant para makabalik na ang operasyon nito habang tinatalakay ng Kongreso ang mga usaping nakapaloob sa nag paso nang prangkisa nito at magpasya kung bibigyan ng panibagong 25 year franchise ang Kapamilya network.

Samantala, binawi na ng Kamara ang ginawang pag-apruba sa ikalawang pagbasa sa nasabing panukala, na ayon kay Deputy Majority Leader Wilter Palma ay dahil marami pa sa mga Kongresista ang nais mag interpellate.

Dahil dito, muling binuksan ng Kamara ang perid of debates and amendments sa panukala.

Una nang kinuwestyon ni Albay Congressman Edcel Lagman ang legalidad nang naunang pag apruba sa bill nuong nakalipas na linggo.

Ito ay dahil ipinasa sa first at second reading ang naturang panukala sa parehong araw gayung nakasaad sa konstitusyon na ang isang bill ay dapat aprubahan sa tatlong pagbasa sa magkakahiwalay na araw maliban na lamang iung certified as urgent ng pangulo ng bansa.