Judith Estrada-Larino

Iva-validate pa lamang ng Department of Health (DOH) ang halos 7,000 coronavirus disease 2019 (COVID-19) test results.

Ayon ito kay Health Undersecretary Maria Rosario Vergeire para magkaroon na ng approximation sa pagitan ng unique individuals na test at iyong mga kumpirmadong positibo sa COVID-19.

Sinabi ni Vergeire na hindi lahat ng 6,800 test results ay idadagdag sa mga kumpirmadong kaso na nasa mahigit 18,000 na.

Binigyang diin ni Vergeire na transparent naman ang DOH sa pagre-report ng sitwasyon ng COVID-19 sa bansa na  mayroon silang open system o data drop kung saan maaaring tingnan ng publiko ang mga datos.

Kinuwestyon ng Malacañang ang credentials ni United Nations Special Rapporteur Agnes Callamard.

Ito ay matapos ihayag ni Callamard na lumalampas sa international law ang mga pagkilos ng gobyerno ng Pilipinas kahit pa bago maranasan ang coronavirus disease 2019 (COVID-19) pandemic.

Sinabi ni Presidential Spokesman Harry Roque na si Callamard na UN Special Rapporteur on Extra Judicial, Summary or Arbitrary Executions ay hindi naman expert sa usapin ng extra-legal killings.

Ayon kay Roque, si Callamard ay specialist sa freedom of expression kaya’t mas mabuting magtalaga ang UN ng tunay na eksperto sa extra-legal killings ng may kalidad na tulad ni dating UN Special Rapporteur on Extra Judicial Executions Philip Alston.

Ipinabatid naman ni Roque ang kanyang hiling para kay Callamard na sana ay makakuha ng termino sa kaniyang unibersidad para matawag o makilala talaga itong expert.

Nilinaw ng Sub Task Group for the Repatriation of Overseas Filipino Workers (OFWs) ang naunang anunsyo hinggil sa home quarantine para sa mga uuwing overseas Pinoys sa Pilipinas.

Una nang inihayag ng task group na ang OFWs, Pinoy seafarers at overseas Filipinos na darating sa NAIA simula sa ika-1 ng Hunyo ay sasailalim na lamang sa home quarantine matapos makuhanan ng swab test.

Sa inilabas na bagong anunsyo, inabisuhan ang lahat ng repatriated OFWs at non-OFWs na kailangan pa ring sumailalim sa mandatory quarantine sa quarantine facility o hotel na accredited ng Bureau of Quarantine hanggang hindi pa napapasakamay ang RT-PCR test results na nagsasabing negative sila sa coronavirus disease 2019 (COVID-19).

Pinarerepaso ng Commission on Higher Education (CHED) sa mga kolehiyo at unibersidad ang kanilang bayarin sa gitna na rin ng bagong sistema ng pag-aaral dahil sa COVID-19 pandemic.

Ito ayon kay CHED chairman Prospero De Vera ay dahil ilang private schools na ang nagsumite ng application para sa singil sa matrikula sa unang quarter pa lamang ng taon o bago ang nasabing global health crisis.

Sinabi ni De Vera na ibinalik nila ang mga nasabing application para makapag konsulta muli sa mga estudyante at ipaliwanag ang kanilang application ng matrikula sa konteksto ng flexible learning.

Sa flexible learning aniya ay inaasahan nang mawawala ang ilang bayarin lalo nat ilang sports school activities, tulad ng sports fest at internship program, ang hindi pa rin pinapayagan sa gitna ng quarantine restrictions.

Ipinabatid ni De Vera na ilan sa mga nag apply para sa pagkakasa ng matrikula ay nagsabing hindi naman sila magtataas ng tuition fee.

Pumapalo na sa 18,638  ang kumpirmadong kaso ng coronavirus disease 2019 (COVID-19) sa bansa.

Ito ay matapos makapagtala ng 552 pang confirmed case ng COVID-19 kung saan 119 ang fresh o newly validated at 433 ang late case.

Tumaas pa sa halos apat na libo (3,979) ang total recoveries mula sa COVID-19 matapos maitala ang 70 pang pasyente na gumaling samantalang tatlo naman ang nadagdag sa death toll na nasa 960 na.

Sa mga tinaguriang fresh cases, sinabi ng Department of Health (DOH) na 94 ang mula sa Metro Manila, 4 ay mga repatriates, 1 mula sa Region 7, at ang nalalabing 20 ay mula sa ibat ibang panig ng bansa.

Sa mga late cases naman, ipinabatid ng DOH na 137 ay mula sa Metro Manila, 98 ay mula sa Region 7, 16 ay repatriates, at ang 182 pang kaso ay mula sa ibat ibang panig ng Pilipinas.

Hanggang nitong nakalipas na May 30, ang Pilipinas ay mayruon nang 37 certified polymerase chain reaction facilities at 11 Genexpert laboratories na nakapag test na ng mahigit 300,000 indibidwal.

Nakatakdang sumailalim na lamang sa home quarantine ang mga Pilipinong darating sa Ninoy Aquino International Airport (NAIA) na residente lamang ng Metro Manila.

Ipinabatid ito ng Sub-Task Group for the Repatraiation of OFWs ang mga Pinoy seafarers, landbase at overseas Pinoys na darating sa NAIA simula ngayong araw na ito matapos makuhanan ng swab test.

Kung taga probinsya naman papayagan ding makauwi ang mga ito kung mayruong susundo sa kanila sa naia na isang kaanak.

Sinabi ng task force na kailangang manatiling naka isolate sa kani kanilang mga bahay ang mga uuwing pinoy at sundin ang mahigpit na health protocols habang hinihintay ang resulta ng kanilang swab test.

Inaprubahan ng World Bank ang $500-M US dollars na loan ng Pilipinas para makatulong sa pagtugon ng bansa sa pandemic ng coronavirus disease 2019 (COVID-19).

Ang nasabing loan ay sa ilalim ng Philippine Emergency COVID-19 Response development policy loan na nasa 29 years ang maturity at may grace period na 10 at kalahating taon.

Ang naturang pondo ay gagamitin para matulungan ang mga pamilyang labis na naapektuhan ng pandemic kabilang ang mga nawalan ng hanapbuhay.

Binigyang diin ni Achim Fock, World Bank Acting Country Director for Brunei, Malaysia, Philippines and Thailand na milyung-milyong mahihirap na pamilyang Pilipino partikular ang mga daily wage earners ang labis na naapektuhan ng pandemic.