Judith Estrada-Larino

Mahina ang ginawang paghahanda ng mga kinauukulang ahensya ng gobyerno partikular ng Department of Transportation (DOTr) sa pagbabalik trabaho ng mga Pilipino kayat nahirapang makasakay ang mga ito.

Ayon ito kay Senate Minority Floorleader Franklin Drilon  bilang indikasyon ng kakulangan sa foresight at kawalang pakiramdam sa tunay na pangangailangan ng mga mahihirap na Pilipino

Binigyang diin ni Drilon na para maibangon at mapasigla ang ekonomiya ng bansa dapat tiyaking maayos na makakapasok ang mga manggagawa ng hindi maku kumpromiso ang kanilang kalusugan.

Pinuri naman ni Drilon ang militar at pulisya sa paggamit ng kanilang resources para makatulong sa commuters samantalang ang pribadong sektor ay dapat na tulungan ang kanilang mga empleyado sa pamamagitan  nang pagkakaloob ng shuttle bagamat mayruong ilang kumpanya na ang gumagawa nito. —ulat ni Cely Ortega-Bueno (Patrol 19)

Wala pang desisyon ang Inter-Agency Task Force for the Management of Emerging Infectious Diseases (IATF) hinggil sa posibleng pagluluwag sa mga restrictions sa religious gatherings.

Ayon kay Presidential Spokesman Harry Roque  hindi niya pa masabi kung mapapayagan muli ang religious gatherings subalit titingnan at aaralin ng iatf ang mga datos, ang case doubling rate at paghahanda para sa critical care.

Sa ngayon batay sa guidelines ng gobyerno , lima katao lamang ang papayagang dumalo sa isang religious gathering sa mga lugar sa ilalim ng modified enhanced community quarantine (MECQ) at 10 katao naman sa mga area na nasa general community quarantine (GCQ).

Pinag-aralan ng Department of Trade and Industry (DTI) ang posibilidad na bawiin na ang kautusang nagli limita sa pagbebenta at pagbili ng ilang pangunahing bilihin.

Ito ayon kay Trade Undersecretary Ruth Castelo ay dahil maituturing nang very stable hindi lamang ang presyo kundi maging ang supply ng basic commodities sa bansa.

Sa katunayan aniya ay nakakatanggap na sila ng mga request mula sa manufacturers at retailers na alisin na ang anti hoarding at anti panic buying memorandum circular ng ahensya.

Magugunitang Marso 19 nang ipalabas ng DTI ang kautusan dahil sa hoarding at panic buying na ginawa ng consumers na pinayagan lamang din ng ilang retail stores tulad ng alcohol, hand sanitizer, disinfecting liquids, bath soap at iba pa.

Hindi pa maipatutupad ng Land Transportation Office (LTO) ang batas na nagtatakda sa mga motorsiklo na magkaroon ng dalawang plaka –isa sa harap at isa sa likod.

Sinabi ng LTO na wala pa silang maibibigay na plaka para maipatupad ang itinatakda sa Motorcycle Crime Prevention Act.

Nilagdaan ng Pangulong Rodrigo Duterte noong nakalipas na taon ang Motorcycle Crime Prevention Act o Republic Act 11235 na layong matugunan ang dumadaming krimen na kinasasangkutan ng mga kriminal na gumagamit ng motorsiklo.

Nakasaad sa batas na dapat ay mas malaki na ang mga plaka na color coded at mababasa kahit 15-metro ang layo.

Ayon kay LTO operations division officer-in-charge Mercy Jane Paras-Leynes, nagsisimula na sila ng produksyon ng plaka kung saan ang target delivery nila ay sa susunod na buwan kaya’t maaaring sa Setyembre ay madala na sa LTO ang mga plaka para sa mga 2018 na sasakyan.

Pangkalahatang naging maayos at mapayapa ang pagsisimula ng general community quarantine (GCQ)  sa Metro Manila, gayundin sa iba pang panig ng bansa.

Ipinabatid ito ni Philippine National Police (PNP) Chief General Archie Gamboa, kasunod na rin ng mga natatanggap niyang report mula sa mga regional offices ng PNP.

Ayon kay Gamboa, wala namang natanggap na mga sumbong o tawag hinggil sa mga hindi kanais-nais na mga insidenteng nangyari sa iba’t ibang GCQ areas ngayong unti-unti nang nagbabalik ang sigla ng ekonomiya dahil sa pagbubukas ng mga industriya.

Maliban na lamang sa ilang insidente ng mga na-stranded na mga manggagawa, gayundin ang mga naglakad patungo sa kanilang mga trabaho.

Magugunitang halos tatlong buwang walang labasan ang publiko at nananatili lang ang mga ito sa kanilang mga tahanan dahil sa umiiral na enhanced community quarantine (ECQ) at modified enhanced community quarantine (MECQ) sa Metro Manila.

Gayunman, tiniyak ng PNP na mananatili silang nakabantay para tiyaking nasusunod pa rin ang minimum health protocols sa lahat ng mga pampublikong lugar at kalsada partikular na ang physical distancing at obligadong pagsusuot ng face masks. –ulat mula kay Jaymark Dagala (Patrol 9)

Isa-isang sinagot ni ABS-CBN President and Chief Executive Officer (CEO) Carlo Katigbak ang mga alegasyong ibinabato sa kanilang kumpanya.

Sa joint hearing ng house committee on legislative franchises at good government and public accountability, sinabi ni Katigbak na ang tinutukoy na probisyon ni Deputy Speaker Rodante Marcoleta hinggil sa mahigit 50 taong paggamit ng airwaves ng Kapamilya network ay 50-year cap na ibinibigay sa bawat franchise application.

Bukod ditto, binigyang diin ni Katigbak na Pilipino si ABS-CBN Chairman Emeritus Eugenio Gabby Lopez III dahil batay sa 1935 Constitution na kung ang ama ng isang tao ay isang Pilipino, maituturing na rin itong Pilipino.

Una na ring inihayag ni Marcoleta na isang American citizen si Lopez nang maupo bilang ‘big boss’ ng media giant noong 1996.

Tatanggap na ang Land Transportation Franchising and Regulatory Board (LTFRB) Central Office ng mga opisyal na transaksyon simula bukas, ika-3 ng Hunyo.

Sinabi ng LTFRB na mahigpit nilang ipatutupad ang physical distancing guidelines sa tanggapan, gayundin ang pagsusuot ng face masks at pag-check ng temperatura ng bawat papasok sa ahensya.

Tiniyak din ng LTFRB ang regular na pagsasagawa ng disinfection sa tanggapan.

Ipinabatid pa ng LTFRB sa publiko ang patuloy na online transactions nito.

Tatlumpu’t apat (34) ang nadagdag na nagpositibong Pilipino sa coronavirus disease 2019 (COVID-19) sa ibang bansa.

Ayon sa Department of Foreign Affairs (DFA), hanggang kahapon, ika-1 ng Hunyo, umakyat na sa 5,218 ang mga kumpirmadong positibo sa COVID-19 na Pinoy mula sa 47 bansa at rehiyon.

UPDATE: (As of June 1) Mga Pinoy abroad na tinamaan ng COVID-19, mahigit 5,200 na | via @DFAPHL https://t.co/DWXIeTIQz3

— DWIZ Newscenter (@dwiz882) June 1, 2020

Sa naturang bilang, 2,709 ang patuloy na nagpapagamot sa iba’t ibang ospital.

Labing-anim (16) naman ang nadagdag sa bilang ng mga gumaling kaya’t nasa 2,167 ang mga Pilipino sa ibang bansa na naka-recover mula sa nasabing sakit, samantalang nasa 342 ang bilang ng mga pumanaw dahil sa naturang virus.

Pinakarami pa ring naitalang confirmed COVID-19 positive na overseas Pinoy sa bahagi ng Middle East/Africa na may 3,252 kaso; Europa na mayroong 821 confirmed COVID-19 positive cases na overseas Pinoy; Americas na mayroon 656 cases; at Asia Pacific Region na mayroon namang 489 na kaso.

Iginagalang ng Department of Education (DepEd) ang desisyon ng mga magulang na huwag i-enroll ang kanilang mga anak sa gitna na rin ng coronavirus disease 2019 (COVID-19) pandemic.

Ayon kay Education spokesman at undersecretary Nepomuceno Malaluan, hindi nila mapipilit ang mga magulang na i-enroll ang kanilang mga anak, subalit hinihimok nila ang mga ito na tutukan ang interventions na ikakasa nila kapag nagbukas na muli ang klase na tiyak anilang magbebenepisyo sa education system ng mas mahabang panahon.

Dati pa naman aniyang nakukunsidera ang distance learning bilang solusyon sa mga hamong kinakaharap ng mga estudyante tulad ng problema ng trapik sa Metro Manila, subalit kailangan na itong ikasa talaga dahil sa COVID-19 pandemic.

Binigyang diin naman ni Education Secretary Leonor Briones na maraming estudyante ang nais mag-enroll sa papasok na school year kahit pa pagsamahin ang face-to-face learning at online classes.

Ipinabatid pa ni Briones na para sa early registration, may 1.4-milyong estudyante ang nagsabing nais nilang pumasok ngayong school at bago pa magbukas ang formal enrollment, nakatatangggap na sila ng report mula sa ilang rehiyon na naabot na ang 75% ng kanilang target enrolment number.

Ang maganda aniyang turn out ng mga gustong mag-aral ay nakapagbibigay ng inspirasyon sa DepEd para matiyak na handing-handa ang mga paaralan at guro sa new normal.