Judith Estrada-Larino

Pansamantala lamang ang paglalagay ng classification na fresh at late sa coronavirus disease 2019 (COVID-19) sa bansa.

Nilinaw ito ni Department of Health (DOH) Undersecretary Maria Rosario Vergeire dahil ang naturang hakbang ay temporary measure lamang hanggang sa matapos ang isinasagawang validation sa mga kaso ng nakakahawang sakit.

Sinabi ni Vergeire na hindi nila sinasadyang maguluhan ang publiko hinggil sa datos at maging maayos ang sistema

Pumapalo na sa halos 19,000  ang kumpirmadong kaso ng coronavirus disease 2019 (COVID-19) sa bansa.

Ayon sa Department of Health (DOH) hanggang 4:00 p.m. kahapon, Hunyo 2 nasa 359  ang napaulat na bagong kaso ng nasabing sakit kayat umaabot na sa 18,997 ang kabuuang kaso ng COVID-19 sa bansa.

176 sa mga bagong kaso ay maituturing na fresh cases at 183 ay late cases.

Sinabi ng DOH na anim pa ang nasawi kayat nasa 966 na ang COVID-19 related deaths.

Ipinabatid ng DOH na 84 ang pasyenteng gumaling sa naturang virus kayat nasa 4,063 na ang total recoveries sa COVID-19.

Walang dapat ikabahala ang publiko partikular na ang mga kritiko hinggil sa isinusulong na Anti-terrorism bill na una nang sinertipikahang urgent ng Pangulong Rodrigo Duterte.

Sinabi ni Defense Secretary Delfin Lorenzana na malinaw na nakasaad sa nasabing panukala ang mga kaparusahan sa mga law enforcer na aabuso sa batas.

Sapat din aniya ang mga inilagay nilang probisyon sa naturang panukala na nagsusulong ng karapatang pantao.

Bilang dating Armed Forces of the Philippines (AFP)  chief  hinimok ni DILG Secretary Eduardo Año ang mga mambabatas na ipasa ang naturang panukala na hindi lamang napapanahon kundi malaki ang maitutulong para masugpo ang problema ng terorismo na siya namang hinaharap ng buong mundo. —ulat ni Jaymark Dagala (Patrol  9)

Nakaantabay lang ang Armed Forces of the Philippines (AFP) sa maging hakbangin ng Metropolitan Manila Development Authority (MMDA)  kaugnay sa pagbibigay ng libreng sakay sa mga manggagawang stranded ngayong umiiral ang general community quarantine sa Metro Manila.

Ayon kay AFP Spokesman Marine Brigade General Edgard Arevalo handa silang ipakalat ang apat naput walong military truck sakaling kailanganin na ng mmda sa mga natukoy nilang lugar.

Labing tatlong military trucks ang ipinakalat ng AFP sa unang araw nang pagpapairal ng gcq sa metro manila para umalalay sa mga manggagawa sa bahagi ng Commonwealth Avenue partikular sa may philcoa at batasan gayundin sa iba pang lugar na itinuro sa kanila ng mmda.

Nilinaw ni arevalo na ang mga ipinakalat na at mga naka standby pang military truck ay bukod pa sa mga nauna nilang i-deploy upang maghatid sa frontliners simula nang ipatupad ang lockdown hanggang sa ngayon. —ulat ni Jaymark Dagala (Patrol  9)

Gagamitin na ng Philippine National Police (PNP) ang stationed police vehicle nito para magbigay ng libreng sakay.

Ito ayon sa PNP ay kung marami pa ring stranded na pasahero na walang masakyan ngayong balik trabaho na ang ilang manggagawa dahil sa general community quarantine.

Hinimok ni PNP Chief Archie Gamboa ang police stations na gamitin ang kanilang mga naka standby na patrol units at marked vehicles.

Partikular dapat aniyang matulungan ang mga babae, buntis at senior citizens na lalabas para sa essential travel o transaction.

Sa ngayon ay tuluy tuloy ang serbisyo ng anim na PNP trucks na buma biyahe sa kahabaan ng edsa para maghatid ng mga pasahero tulad ng health at essential workers na walang masakyang papunta at pauwi mula sa trabaho. —ulat ni Jaymark Dagala (Patrol  9)

Mahigit 300  tawag ang natugunan ng Philippine National Police (PNP) sa pamamagitan ng kanilang helpline 16677 sa loob lamang ng dalawang araw.

Kasunod na rin ito ayon kay PNP Chief Archie Gamboa nang paglulunsad ng kanilang quick response hotline para sa mga reklamo at tanong kaugnay sa mga bagong polisiya sa ilalim ng general community quarantine (GCQ).

Layon aniya ng PNP helpline na mabilis na makatulong at maka responde sa publiko sa kalagitnaan ng coronavirus disease 2019 (COVID-19) pandemic.

Sinabi ni Gamboa na bukod sa pagsagot sa mga reklamo at tanong ang PNP helpline ay magbibigay ng napapanahong ulat mga impormasyong kailangan ng taumbayan gayundin ang paglilinaw sa ilang quarantine protocols.

Sa kabuuan ipinabatid ni Joint Task Force COVID-19 Shield Commander Lt General Guillermo Eleazar na nasa mahigit walong libo na ang tawag na natatanggap ng helpline 16677 sa loob ng pitumput limang araw na pagpapatupad ng community quarantine. —ulat ni Jaymark Dagala (Patrol  9)

Pinayuhan ni Senador Panfilo Lacson ang mga bumabatikos sa panukalang Anti-Terrorism Bill na basahin muna ito.

Binigyang diin ni Lacson na walang dapat ipangamba ang mga human rights advocate at militante sa pinalakas na Anti-Terror Bill dahil naglagay sila rito ng sapat na safeguards laban sa pag abuso at paglabag sa mga karapatang pantao.

Tiniyak ni Lacson, pangunahing may akda ng nasabing panukala ..na naaayon sa international standards at pagpapahalaga sa karapatang pantao ang mga probisyon sa naturang Anti-Terror Bill.

Sa ilalim ng Anti-Terror Bill pinalalakas ang kapangyarihan ng pamahalaan laban sa terorismo at pinabigat ang parusa sa mapapatunayang gumawa, nag udyok at nagbantang maghahasik ng terorismo. —ulat ni Cely Ortega-Bueno (Patrol 19)

Mabibigyan na ng pagkakataon ang mga kulang sa height para makapagsilbing otoridad sa gobyerno.

Batay ito sa panukala ni Senador Ronald Bato Dela Rosa na Height Equality Act kung saan ibababa ang minimum height requirement para makapasok sa PNP, Bureau of Fire Protection, BJMP at Bureau of Corrections.

Nakasaad sa panukala ni Dela Rosa na ibababa sa 5’2 mula sa 5’4 ang requirement para sa mga lalaki at ibababa naman sa 5 feet mula sa 5’3 para sa mga kababaihan.

Mananatili namang walang height requirement sa mga miyembro ng indigenous peoples group o cultural minorities bilang kunsiderasyon sa hangganan ng kanilang genetic heigh potential o potensyal na tumangkad pa.

Sinabi ni Dela Rosa, dating PNP chief na dapat ibaba ang height requirement para mabigyan ng pagkakataong makapagsilbi ang mga kulang sa height.

Hindi aniya masusukat sa taas o tangkad ang sakripisyo, dedikasyon at pagsisilbi kundi sa pagganap sa mga tungkulin at responsibilidad. —ulat ni Cely Ortega-Bueno (Patrol 19)