Judith Estrada-Larino

Kinilala ang 83 taong gulang na lalaki mula sa Davao City bilang pinakamatandang umakyat sa Mount Apo, na itinuturing na pinakamataas na bundok sa bansa.

Pinarangalan ng Davao Del Sur Tourism Office si Pascacio Carcedo sa bagong record matapos umakyat sa Mount Apo.

Sinabi ni Carcedo na para ma-inspire siyang umakyat sa Mount Apo, inakyat muna niya ang tatlong mas mababang bundok sa munisipalidad ng Santa Cruz.

Napasakamay niya aniya ang Santa Cruz Trailblazer Award at nagpasalamat sa mga tumulong sa kanya sa pag-akyat sa tuktok ng Mount Apo.

Nalampasan ni Carcedo ang dating record holder, ang 80 anyos na Singaporean National na umakyat ng Mount Apo nuong 2021.

Ibinabala ng National Grid Corporation of the Philippines (NGCP) ang posibleng kakulangan ng supply ng kuryente sa bansa dahil sa madalas na brownout.

Kasunod na rin ito ayon kay NGCP spokesperson Atty. Cynthia Alabanza nang inisyung red alert status sa Luzon grid kahapon.

Sinabi ni Alabanza na mayruong indikasyon nang numinipis na supply ng kuryente tuwing may brownout dulot naman ng problema sa mga power plants.

Binigyang diin ni Alabanza na ang mga nasabing shutdown ay hindi normal o ordinaryong bahagi ng maintenance and operations at hindi nagiging dahilan ng kakulangan ng power supply.

May indikasyon aniya ng malawak na problemang kailangang tugunan ang dumadalas o taunan nang nagiging problema o mga ganitong sitwasyon.

Sinuspinde ng Korte Suprema ang lahat ng sesyon nito mula November 5 hanggang November 22.

Ito ayon sa anunsyo ng High Tribunal ay para bigyang daan ang pagdaraos ng bar examinations ngayong taon.

Kaugnay nito, ipinabatid ng Korte Suprema na sarado naman mula November 9 hanggang 16 ang lahat ng collegiate courts at first and second level courts sa Metro Manila at lahat ng mga lungsod kung saan mayruong local testing centers.

Una nang inihayag ng kataas taasang hukuman na gagawin ang bar exam sa 14 na Local Testing Centers (LTCs) sa buong bansa kung saan lima ay nasa NCR at tig tatlo sa Luzon, Visayas at Mindanao. —sa ulat ni Bert Mozo (Patrol 3)

Kanselado ngayong araw na ito ang dalawang local flights.

Ito ayon sa Manila International Airport Authority (MIAA) ay dahil sa masamang panahon.

Kabilang sa mga cancelled flights ang PAL Express mula Maynila patungong Basco, Batanes at pabalik.

Pinagagamit ni DILG Secretary Benhur Abalos sa local government units na naapektuhan ng kalamidad ang halos anim na bilyong pisong assistance para sa kanilang recovery sa ilalim ng Local Government Support Fund Financial Assistance (LGSFFA) bago ang September 30.

Ito ayon kay Abalos ay taun-taong nararanasan ng mga Pilipino ang mga kalamidad at sakuna.

Tiniyak ni Abalos ang patuloy na paghahanap ng paraan ng gobyerno upang masaklolohan ang mga LGU na sinalanta ng kalamidad sa ilalim nga ng LGSFFA.

Pinasisiguro ni Abalos sa mga LGU ang pagpa prioritize sa mga programa at proyektong may kaugnayan sa disaster response, rehabilitation at recovery.

Puspusan na ang pagsasagawa ng inventory ng Idle Government Owned Lands na nasa ilalim ng Executive Order 75 na kinabibilangan ng state universities and colleges (SUC) sa buong bansa.

Bahagi ito ayon kay Agrarian Reform Secretary Conrado Estrella, III ng commitment ng administrasyon ng Pangulong Ferdinand Bongbong Marcos, Jr. sa susunod na anim na taon.

Sinabi ni Estrella na nasa 26,000 pa ang kailangang i-validate at target na ipamahagi ng libre sa mga kuwalipikadong beneficiaries ng Comprehensive Agrarian Reform Program (CARP).

Kailangan aniyang i-evaluate at magsagawa ng inventory sa coverable SUCs at matukoy kung saang mga area ang nagamit na para sa agri research.

Tiniyak ni Estrella na ang mga lupaing hindi sakop ng education purposes ang kabilang sa inventory ng mga lupain para sa SUCs.

Mahigit 100 Pinoy doctors at nurses ang nagsagawa ng surgery para mabawasan ang backlog ng surgeries dahil sa COVID-19 pandemic.

Ayon kay Dr. Ramon Inso, Pangulo ng Philippine College of Surgeons, limitado lamang ang isinasagawa nilang surgery nuong kasagsagan ng lockdown.

Sinabi ni Inso na matindi ang epekto ng COVID-19 pandemic kaya’t nagsanib puwersa sila ng Philippine Society of Anesthesiologists at Operating Room Nurses Association of the Philippines para magsagawa ng libreng surgery para sa indigent patients.

Mahigit 80 private at public hospitals ang nakiisa sa tinaguriang National Surgical Outreach Day na nagsimula nitong nakalipas na September 5 at pinaplano nilang gawin ito taun-taon.

Binigyang diin ni Inso na nais nilang ipakitang ginagawa nila ang kanilang tungkulin bilang surgeons, anesthesiologists at nurses para matugunan ang mga nakapilang kailangang isalang sa surgery.

Posibleng sa labas ng Pilipinas nagmumula o source ng mga personalized text scams o unsolicited text messages.

Ayon ito kay DICT Undersecretary Alexander Ramos kaya’t nakikipag usap na sila sa kanilang international counterparts hinggil sa paglaganap ng text scams sa bansa.

Sinabi ni Ramos na nais nilang matukoy mula sa kanilang counterpart sa ibayong dagat mula sa record ng mga ito hinggil sa posibleng IP address ng destination servers na sangkot sa text scams.

Sinisilip na rin aniya nila ang mga personalidad na bumibili ng maraming sim cards para ma-trace kung saan nagmumula ang text spams.

Una nang inihayag ni Ramos, Executive Director ng Cybercrime Investigation and Coordinating Center na nag imbestiga na ang National Privacy Commission hinggil sa mga server na napasok ng hackers subalit wala silang nakita.

Ilalabas na sa susunod na linggo ng House Committee on Good Government and Public Accountability ang rekomendasyon nito sa imbestigasyon sa Sugar Order Number 4.

Ayon ito kay Committee Chair Florida Robes na nagsabing irerekomenda nilang kasuhan ang mga sangkot sa nasabing kontrobersya.

Ang imbestigasyon ng kamara sa nasabing usapin ay tinapos na nito kahapon.

Iginiit nina suspended Agriculture Undersecretary Leocadio Sebastian at resigned Sugar Regulatory Administration Chief Hermenigildo Serafica na wala silang ginawang masama kaugnay sa kontrobersyal na Sugar Order Number 4.

Binigyang diin nina Sebastian at Serafica na malinis ang kanilang kunsensya sa kabila ng rekomendasyon ng Senate Blue Ribbon Committee na sampahan ng administrative at criminal cases.

Sinabi ni Serafica na nalulungkot sila dahil hindi nabigyan ng bigat ang ebidensyang iniharap nila.

Tumanggi namang magsalita pa si Sebastian lalo na’t wala pa aniya siyang hawak na kopya ng Blue Ribbon report.