Judith Estrada-Larino

Mahigit 100 Pinoy doctors at nurses ang nagsagawa ng surgery para mabawasan ang backlog ng surgeries dahil sa COVID-19 pandemic.

Ayon kay Dr. Ramon Inso, Pangulo ng Philippine College of Surgeons, limitado lamang ang isinasagawa nilang surgery nuong kasagsagan ng lockdown.

Sinabi ni Inso na matindi ang epekto ng COVID-19 pandemic kaya’t nagsanib puwersa sila ng Philippine Society of Anesthesiologists at Operating Room Nurses Association of the Philippines para magsagawa ng libreng surgery para sa indigent patients.

Mahigit 80 private at public hospitals ang nakiisa sa tinaguriang National Surgical Outreach Day na nagsimula nitong nakalipas na September 5 at pinaplano nilang gawin ito taun-taon.

Binigyang diin ni Inso na nais nilang ipakitang ginagawa nila ang kanilang tungkulin bilang surgeons, anesthesiologists at nurses para matugunan ang mga nakapilang kailangang isalang sa surgery.

Posibleng sa labas ng Pilipinas nagmumula o source ng mga personalized text scams o unsolicited text messages.

Ayon ito kay DICT Undersecretary Alexander Ramos kaya’t nakikipag usap na sila sa kanilang international counterparts hinggil sa paglaganap ng text scams sa bansa.

Sinabi ni Ramos na nais nilang matukoy mula sa kanilang counterpart sa ibayong dagat mula sa record ng mga ito hinggil sa posibleng IP address ng destination servers na sangkot sa text scams.

Sinisilip na rin aniya nila ang mga personalidad na bumibili ng maraming sim cards para ma-trace kung saan nagmumula ang text spams.

Una nang inihayag ni Ramos, Executive Director ng Cybercrime Investigation and Coordinating Center na nag imbestiga na ang National Privacy Commission hinggil sa mga server na napasok ng hackers subalit wala silang nakita.

Ilalabas na sa susunod na linggo ng House Committee on Good Government and Public Accountability ang rekomendasyon nito sa imbestigasyon sa Sugar Order Number 4.

Ayon ito kay Committee Chair Florida Robes na nagsabing irerekomenda nilang kasuhan ang mga sangkot sa nasabing kontrobersya.

Ang imbestigasyon ng kamara sa nasabing usapin ay tinapos na nito kahapon.

Iginiit nina suspended Agriculture Undersecretary Leocadio Sebastian at resigned Sugar Regulatory Administration Chief Hermenigildo Serafica na wala silang ginawang masama kaugnay sa kontrobersyal na Sugar Order Number 4.

Binigyang diin nina Sebastian at Serafica na malinis ang kanilang kunsensya sa kabila ng rekomendasyon ng Senate Blue Ribbon Committee na sampahan ng administrative at criminal cases.

Sinabi ni Serafica na nalulungkot sila dahil hindi nabigyan ng bigat ang ebidensyang iniharap nila.

Tumanggi namang magsalita pa si Sebastian lalo na’t wala pa aniya siyang hawak na kopya ng Blue Ribbon report.

Hindi isusuko ng Office of the Solicitor General ang paninindigan nitong walang hurisdiksyon ang International Criminal Court (ICC) sa sitwasyon sa Pilipinas.

Kasunod na rin ito nang isinumiteng observation letter ng Philippine Embassy sa The Hague, Netherlands bilang patuloy na pag alma sa nais ng Office of the Prosecutor (ICC-OTP) na muling buksan ang imbestigasyon sa anito’y madugong drug war ng Duterte administration.

Nakasaad din sa sulat ng bansa ang kahilingan sa pre-trial chamber ng ICC na ibasura ang request ng OTP na ipagpatuloy muli ang imbestigasyon sa anila’y Crimes Against Humanity dahil sa war on drugs mula July 2016 hanggang March 2019.

Ipa prioritize ng Department of Education (DepEd) ang pagtatayo ng mas maraming gusali at silid aralan.

Tiniyak ito ng DepEd bilang solusyon sa anito’y problema sa overcrowding sa pagbubukas muli ng pasukan.

Ayon kay Education Spokesman Michael Poa, humihingi na sila ng dagdag na budget para makapagpatayo ng mga gusali at paaralan, maayos ang mga silid aralan at makapagbigay ng dagdag na mga gamit sa mga eskuwelahan.

Inaasahang bibilis na ang pagresolba sa mga kasong may kinalaman sa agraryo.

Binigyang diin ito ni DAR Secretary Conrado Estrella, III dahil kukuha sila ng mga dagdag abogado na tututok sa agrarian cases.

Kasunod na rin ito nang pag amin ni Estrella na kulang talaga ang kanilang mga abogado para mag review ng mga nakabinbing kaso sa ilalim ng DAR Adjudication Board at Agrarian Law Implementation.

Nasa halos 641,000 cases ang hawak ng DAR Adjudication Board at Agrarian Law Implementation mula 1988 hanggang June 2022.