Judith Estrada-Larino

Pumapalo na sa 1 milyon  ang naisagawang coronavirus disease 2019 (COVID-19) test sa bansa.

Ipinabatid ito ni Testing Czar Vince Dizon bagama’t hindi pa aniya ito sapat at bahagi lamang ng mga hamong hinarap ng bansa sa mga nakalipas na buwan.

Una nang inihayag ni Dizon na target ng gobyerno ang 1 milyon test sa buwang ito at 10 milyon tests sa loob ng 10 buwan.

Pinuri ni Dizon ang mga alkalde sa Metro Manila kung saan nagmumula ang  15 hanggang 16,000 tests kada araw  na maituturing na agresibong hakbangin.

Kasabay nito ipinabatid ni Dizon na 85 na ang COVID-19 testing laboratories na nag o-operate sa bansa kumpara nuong mga unang linggo ng pandemic na tanging ang ritm lamang ang nagsasagawa ng testing.

Halos 20-milyon na ang nagpa-enroll para sa pagbubukas ng klase sa susunod na buwan.

Ayon sa Department of Education (DepEd), ang mga naturang enrollees ay mula kinder hanggang senior high school sa public at private schools.

Sa nasabing bilang, nasa mahigit 18-milyon ang nag-enroll sa public schools at halos 1-milyon naman ang mula sa private schools.

Ang iba pang enrollees ay mula sa local colleges at state universities na mayroong basic education programs.

Sa Region 4A (CALABARZON), naitala ang pinakamaraming enrollees na nasa mahigit 2.6-milyon, samantalang mula naman sa Cordillera Administrative Region nagmula ang pinakamababang bilang ng enrollees na nasa mahigit 315,000.

Uubra ang people’s initiative para magkaroon ng batas na nagbibigay ng panibagong prangkisa sa ABS-CBN.

Ayon ito kay Congressman Rufus Rodriguez lalo na’t lumabas pa sa isang survey ng Social Weather Stations (SWS) na 75% ng mga Pilipino ang pabor sa franchise renewal ng Kapamilya Network.

Ipinabatid pa ni Rodriguez na inuutusan ng konstitusyon ang kongreso na magkasa ng system of initiation of referendum kung saan maaaring direktang magsulong ng batas o mag-apruba o ibasura ang bahagi ng batas na ipinasa ng legislative department.

Commission on Election (COMELEC) aniya ang inaatasan ng batas na pangasiwaan ang pagsasagawa ng isang initiative o referendum.

Mayroong mga mambabatas na sumusuporta sa pagbibigay ng prangkisa sa ABS-CBN ang biglaang umatras sa mismong araw ng botohan.

Ibinunyag ito ni Batangas 6th District Congresswoman Vilma Santos-Recto na kabilang sa 11 bumoto na pabor sa muling pagbibigay ng prangkisa sa Kapamilya Network.

Gayunman, sinabi ni Recto na hindi niya masabi kung nagkaroon ng lobbying para tuluyang patayin ang prangkisa ng media giant.

Kasabay nito, inamin nang tinaguriang “Star for All Seasons” na handa na siya sakaling patawan ng parusa matapos hindi suportahan ang mayorya laban sa prangkisa ng ABS-CBN.

Nangyari na ito aniya sa botohan sa usapin ng death penalty law na sinalungat niya kaya’t inalisan siya ng komite.