Nag-self quarantine na si Presidential Spokesman Harry Roque.
Ito ay matapos makahalubilo ni Roque si DPWH Secretary Mark Villar na nag positibo sa coronavirus disease 2019 (COVID-19).
Sina Roque at Villar ay magkasama sa signing at ground breaking ceremony ng Cavitex segment 2 nuong biyernes.
Sinabi ni Roque na hinihintay na lamang nila ang resulta ng kaniyang swab test.
Nakikipag-ugnayan na ang Department of Health (DOH) sa mga ospital para hilinging dagdagan ang inilaang ICU beds para sa coronavirus disease 2019 (COVID-19) cases.
Ito ayon kay Health Undersecretary Leopoldo Vega ay dahil binabalewala lamang ng ilang ospital ang itinakdang minimum 30 percent ICU bed allocation para sa COVID-19 cases at sa halip ay lima o 10 porsyento lamang ang inilalaan para sa kaso ng COVID-19.
Ipinabatid ni Vega na ang mga retained hospital o health facilities na nasa ilalim ng DOH ay pinayuhan na nilang palawigin ng hanggang 60 porsyento ang inilaang ICU beds para sa COVID-19 cases.
Nagtayo na aniya sila ang command center kung saan maaaring mag-refer ang ilang ospital ng COVID-19 cases sa ibang ospital kapag puno na ang kanilang ICU bed allocation.
Sinabi pa ni Vega na dapat balansehin ang inilalaang ICU beds para sa covid at non-COVID-19 cases para naman makapag accommodate pa ng ibang pasyente ang mga ospital.
Magsisilbi na ring loading point ang Ortigas Station ng mga idini-deploy na bus sa ilalim ng bus augmentation program ng MRT-3.
Ayon sa Department of Transportation (DOTr), simula bukas, Miyerkules, ay kabilang na ang Ortigas Station (northbound at southbound) sa loading points para mas marami pang pasahero ang maserbisyuhan at mapaikli ang pila ng commuters tuwing rush hour.
Alas-4 ng madaling araw ang simula ng unang biyahe sa North Avenue at Taft Avenue Stations habang ang huling biyahe ay hanggang alas-9 ng gabi.
Kabilang sa loading at unloading stations sa northbound, ang Taft Avenue Station, Ayala Station at Ortigas Station bilang loading stations at Ayala Station, Guadalupe Station, Ortigas Station, Quezon Avenue Station at North Avenue Station bilang unloading stations.
Sa southbound, kabilang sa loading stations ang North Avenue, Quezon Avenue at Ortigas Station, samantalang nagsisilbi namang unloading stations ang Ortigas Avenue, Guadalupe Station, Ayala Station at Taft Avenue Station.
Mahigit 100 Overseas Filipino Workers (OFWs) patungong Dubai ang pinigil makasakay ng kanilang flight sa Ninoy Aquino International Airport (NAIA).
Kasunod na rin ito nang biglaang pag-obliga ng United Arab Emirates (UAE) sa lahat ng arriving, transfer at transit passengers mula sa ibang bansa, kabilang ang Pilipinas, ng coronavirus disease 2019 (COVID-19) negative swab test result bago sila makaalis.
Dahil sa nasabing bagong polisiya, 68 mula sa 168 pasahero pa-Dubai ang nakasakay na rin ng eroplano.
Sinabi naman ng mga nasabing pasahero na last-minute na lang nang sabihin sa kanila ang hinggil sa naturang polisiya.
Tinangka namang makipagnegosasyon ang Philippine Airlines (PAL) sa gobyerno ng UAE para payagang makasakay na ang mga Pinoy subalit tinanggihan ito ng nasabing bansa.
Pinayuhan na lang ng PAL ang mga pasahero na mag rebook na lang ng flights o i-refund ang kanilang bayad sa ticket.
Pito sa bawat 10 Pilipino ang pabor na dapat igiit ng Pilipinas ang karapatan nito sa West Philippine Sea
Batay na rin ito sa desisyon ng Permanent Court of Arbitration nuong 2016 na pumapabor sa claim ng Pilipinas sa lugar.
Nakasaad sa survey na 70 porsyento ng respondents ang pabor sa paggigiit ng Pilipinas sa karapatan nito sa West Philippine Sea, 13 porsyento ang tutol at 15 porsyento ang undecided.
Samantala apat sa kada limang Pinoy ang sumusuporta sa pakikipag alyansa ng Pilipinas sa ibang bansa para maidepensa ang territorial rights nito sa WPS.
Katumbas ito ng 82 porsyentong pabor, siyam na porsyento ang hindi sang ayon at walong porsyento ang undecided.
Ito ay dalawang porsyentong mababa sa June 2019 survey kung saan 84 na porsyento ang sang ayon sa pagbuo ng alyansa ng pilipinas sa ibang bansa na handang tumulong sa pag depensa ng seguridad sa WPS.
Ang naturang survey ay isinagawa nitong July 3 hanggang 6 sa mahigit 1,500 adult Pinoys sa pamamagitan ng celfon at computer assisted telephone interviewing.
Isinusulong ni Senador Lito Lapid ang pagbibigay proteksyon sa delivery rider na biktima nang biglaang pagkansela ng mga order.
Ayon kay Lapid dapat magkaruon ng reimbursement scheme na babayaran ng buo ang perang ginastos ng delivery rider sa pagbili ng mga item sakaling kanselahin ng customer ang kaniyang inorder.
Ang reimbursement ng mga rider ay dapat gawin sa loob ng isang araw lamang mula sa kanselasyon ng order.
Sinabi ni lapid na para mabilis ang koleksyon laban sa customer na nag kansela ng order dapat maipatupad ang KYC o know your customer rules kung saan kailangang magbigay at mag verify ng proof of identity at residential address nito batay sa nakasaad sa Data Privacy Act of 2012.
Nakasaad din sa panukala ni lapid ang pagpapataw ng parusa sa customer na madalas mag kansela ng kaniyang order ng walang sapat na dahilan. —ulat ni Cely Ortega-Bueno (Patrol 19)
Patuloy na nadadagdagan ang kumpirmadong kaso ng coronavirus disease 2019 (COVID-19) sa bansa.
Ayon kay Department of Health (DOH) Undersecretary Maria Rosario Vergeire, 634 pa ang nadagdag na kaso ng COVID-19 sa bansa na ngayo’y pumapalo na sa kabuuang 57,545.
Nasa 35,483 ang aktibong kaso ng COVID-19.
Sa mga nadagdag na kaso 302 ang fresh cases at 332 ang late cases.
Anim ang nadagdag sa bilang ng mga nasawi dahil sa COVID-19 na ngayo’y nasa 1,60 na.
Umakyat na sa 20,459 ang total recoveries matapos madagdag ang 88 mga bagong nakarekober sa nasabing sakit.
Obligasyon ng ABS-CBN na bigyan ng kumpensasyon ang mga empleyadong mawawalan ng trabaho matapos ibasura ng Kamara ang bagong prangkisa nito.
Ito ayon kay Department of Labor and Employment (DOLE) Undersecretary Ana Dione ay pagpapakita ng malasakit ng media giant sa kanilang mga empleyado.
Tiniyak naman ni Dione ang kahandaan ng DOLE na magbigay ng ayuda sa mga mawawalan ng trabaho basta’t makuha lamang nila ang tunay na bilang at kung sinu sino ang mga ito para mabatid ang mga benepisyong para sa mga ito.
Hindi pa naaabot ng Pilipinas ang peak o rurok ng coronavirus disease 2019 (COVID-19) outbreak.
Ito ayon kay WHO Country Representative Dr. Rabindra Abeyasinghe ay dahil hindi pa ganun kalaki ang bilang ng mga apektado ng COVID-19 kung ikukumpara sa populasyon ng mundo o kahit mismo ng Pilipinas.
Sinabi ni Abeyasinghe na dapat puspusang pagsikapan ng gobyerno ng Pilipinas na matiyak na hindi na tataas pa ang bilang ng mga nagkaka covid kasabay ang apela sa publiko na sundn ang pinaiiral na hakbangin para na rin sa kaligtasan ng lahat.
Makukuha ng libre ng publiko ang disenyo para sa naimbentong motorcycle shield ng ride hailing app na Angkas.
Ito ayon kay George Royeca, Chief Transport Advocate ng Angkas ay bilang tulong na rin nila sa unti-unting pagbubukas ng ekonomiya sa gitna nang pagpapatuloy ng health protocols sa bansa.
Katuwang ang safety experts mula sa ibang bansa sinabi ni Royeca na masusi nilang pinag aralan kung paano magiging epektibo at ligtas ang nasabing protective shield.
Bukod sa pag-iwas na kumalat pa ang virus ..inihayag ni royeca na pinag isipan din nilang mabuti kung paano hindi magiging sagabal ang barrier sa pagmo-motor at hindi na makadagdag pa ng pinsala sakaling maaksidente ang rider at pasahero nito.