Judith Estrada-Larino

Pumapalo na sa 50,000 reklamo ang natatanggap ng Energy Regulatory Commission (ERC) kaugnay sa anila’y hindi makatuwirang pagtaas ng kanilang electric bill.

Ipinabatid ito ni ERC Executive Director Floresinda Baldo-Digal sa ginawang pagdinig ng house committee on good government and public accountability, kaya naman nagpalabas na sila ng show-cause orders para makapagliwanag ang mga distribution utility firms na posibleng lumabag sa mga regulasyon.

Magugunitang nasa hot water ang Meralco at iba pang power utility firms sa nakalipas na buwan dahil sa umano’y lapses sa billing statements sa kasagsagan ng lockdown sa Metro Manila at iba pang bahagi ng bansa kung kailan ibinase lamang sa estimate o pagtaya ang gamit sa kuryente sa halip na actual meter readings.

Binigyang diin naman ni Meralco Vice President at Customer Retail Services Head Victor Genuino na nagsagawa na sila ng actual meter reading para sa 99% ng kanilang customers sa buwan ng Hunyo.

Pumapalo na sa halos 59,000  ang kumpirmadong kaso ng coronavirus disease 2019 (COVID-19) sa bansa.

Kasunod na rin ito ng halos 1,400 dagdag na kaso ng COVID-19 kung saan 512 ang fresh cases at 880 ang late cases.

Kabilang sa limang lalawigan na nakapagtala ng mataas na bilang ng mga bagong kaso ng COVID-19 ang Metro Manila – 708, Cebu – 198, Iloilo – 86, Laguna – 64 at Cavite – 46.

Umakyat pa sa halos 21, 000 ang total recoveries nang madagdagan ng 517 mga bagong gumaling mula sa nasabing sakit.

Nadagdagan naman ng 11 ang bilang ng mga nasawi sa COVID-19 na ngayo’y nasa 1,614 na.

Nasa mahigit 36,000 ang active cases na kasalukuyang ginagamot o naka-quarantine kung saan 90.6 percent ang mild, 8.6 percent ang asymptomatic, 0.4 percent ang severe at 0.5 percent ang critical condition.

Idinipensa ng Integrated Bar of the Philippines (IBP) ang pagbabahay bahay ng mga otoridad para makuha ang mga dinapuan ng coronavirus disease 2019 (COVID-19).

Ayon kay IBP President Domingo Egon Cayosa malinaw sa Republic Act 11332 ang pagbibigay ng kapangyarihan sa mga otoridad para matiyak ang quarantine at isolation kasabay nang pagpaparusa sa hindi pakikipag ugnayan ng taong may sakit o apektado ng anumang public health concern.

Binigyang diin ni Cayosa na bagama’t malinaw  ang karapatang pantao hindi naman ito aniya absolute dahil ang kalayaan ng isang indibidwal ay maaaring limitado lamang para sa kapakanan ng mas nakararami.

Tiwala ang Duterte Administration na kayang-kayang lumaban at bumangon ng ekonomiya ng bansa mula sa epekto ng coronavirus disease 2019 (COVID-19) pandemic.

Binigyang diin ito ni Cabinet Secretary Karlo Nograles sa pagbubukas ng human development and poverty reduction and participatory governance cluster forum.

Sinabi ni Nograles na nakikita nila ang positibong repormang pinansyal at maayos na pangangasiwa sa  ekonomiya ng administrasyon bago pa man manalasa ang pandemya na isang malaking dahilan kaya’t isa ang Pilipinas sa pinakamalakas, pinakamatibay at pinagkakatiwalaang ekonomiya sa rehiyon.

Patunay dito aniya ang pagtaas sa 4.4% ng koleksyon n Bureau of Customs.

Hindi tinalakay  ng COVID 19 task force ang programa kaugnay sa house-to-house search para sa mga dinapuan ng  coronavirus disease 2019 (COVID-19).

Ayon ito kay Justice Secretary Menardo Guevarra na nagsabi pang hindi rin siya kinunsulta hinggil sa nasabing hakbangin.

Gayunman sinabi ni Guevarra na mayruon namang legal na basehan ang paglilipat ng COVID-19 infected persons sa quarantine facilities ng gobyerno kung hindi magagawa ang home quarantine.

Posible aniyang matalakay nila sa susunod na pulong ng IATF ang house-to-house search issue.

Idinipensa ni Health Undersecretary Maria Rosario Vergeire ang Oplan Kalinga Program na pinamumunuan ng Department of Interior and Local Government (DILG).

Ayon kay Vergeire ang DILG ay binigyan ng kapangyarihang i-monitor ang pagho- home quarantine ng coronavirus disease 2019 (COVID-19) patiensts sa pamamagitan ng BHERTS o barangay health emergency response teams na siyang nakatutok sa usapin.

Umani ng batikos ang Oplan Kalinga partikular ang bahagi na magba bahay bahay ang mga pulis at health workers para hanapin ang mga mild o asymptomatic cases ng COVID-19.

Iginiit naman ni vergeire na pinapayagan naman ang home quarantine subalit ang pasyente ay dapat mayruong sariling kuwarto, sariling banyo at walang kasamang matanda, buntis o may sakit sa isang bahay.