Judith Estrada-Larino

Isang linggong sasailalim sa lockdown ang Caloocan City Medical Center-South.

Ito ay matapos mag positibo sa coronavirus disease 2019 (COVID-19) ang ilang medical staff ng nasabing ospital.

Ayon kay Caloocan City Mayor Oscar Malapitan alas 12 ngayong tanghali isinara muna ang naturang ospital kabilang ang emergency room nito para sa disinfection.

Ipinabatid ni Malapitan na naka-quarantine na ang mga nurse at med tech na nagpositibo sa virus at tuloy-tuloy ang contact tracing sa mga nakasalamuha ng mga ito.

Patuloy naman aniya ang serbisyo ng outpatient department na nasa Old City Hall Plaza gayundin ang Caloocan City North Medical Center.

Kasabay nito sinabi ni Malapitan na naabot na rin ng CCMC ang overflowing capacity para sa mga pasyente ng COVID-19 kaya’t nakikiusap sila sa publiko na dalhin na lamang sa ibang ospital ang mga positive COVID-19 patients.

Pupuwedeng maging tutor ang ilang gurong nawalan ng trabaho dahil sa pagsasara ng ilang pribadong paaralan dulot ng coronavirus disease 2019 (COVID-19) pandemic.

Ayon ito kay Education Undersecretary for Planning and Operations Jesus Mateo sa gitna na rin nang pakikipag-usap nila sa local government units hinggil sa pagkuha sa mga nasabing guro bilang tutors.

Sinabi ni Mateo na maaaring maging tutor ang mga nasabing guro ng mga batang walang adult na tututok sa pagsasagawa ng distance learning ngayong pasukan.

Posibleng hindi maging praktikal para sa gobyerno ang panukalang gamitin na lamang para sa distance learning ang mawawalang frequency ng ABS-CBN.

Ito ayon kay dating DICT Secretary Rodolfo Salalima ay dahil magiging magastos ito para sa gobyerno lalo na’t kailangang kumuha ng mga taong magpapatakbo nito ng tuloy-tuloy na 24 oras.

Sinabi ni Salalima na mas mainam na ABS-CBN pa rin ang magpapatakbo at magbabayad na lamang ang gobyerno para sa oras na gagamitin sa distance learning.

Maaaring kunin na lamang aniya ang ilang dating empleyado ng media giant para sa bagong broadcast subalit dagdag na gastos ito kumpara kung ABS-CBN pa ang nagpapatakbo.

Binigyang diin ni Salalima na hindi uubrang ire-assign ang mga frequencies ng Kapamilya network dahil nakasaad sa batas na dapat itong ibigay sa pinakakuwalipikado at hindi sa kung sino lang.