Judith Estrada-Larino

Hindi papayag ang Pangulong Rodrigo Duterte na mapag-iwanan o hindi makabili ang Pilipinas ng bakuna kontra coronavirus disease 2019 (COVID-19).

Tiniyak ito ni Presidential Spokesman Harry Roque sa gitna ng report na kino-korner ng mga mayayamang bansa ang mga bakuna.

Sinabi ni Roque na kumikilos na ang pangulo para matiyak na may makukuhang bakuna ang bansa pagtuntong ng 2021.

Sigurado aniyang pursigido rin si vaccine czar Carlito Galvez para makakuha ng bakuna na target bilhin sa mga kumpanyang Pfizer, AstraZeneca, Sinovac at Sinopharm.

Target ng gobyernong inisyal na mabakunahan ang 60-milyong Pilipino.

Suspendido muna ang deployment ng mga bagong Pinoy workers sa bansang Jordan.

Base na rin ito sa rekomendasyon ng Philippine Embassy sa Jordan kasunod nang pagtaas ng kaso ng coronavirus disease 2019 (COVID-19) doon nitong mga nakalipas na buwan.

Ayon kay Philippine Overseas Employment Administration (POEA) Administrator Bernard Olalia, itinigil na ng Philippine Overseas Labor Office (POLO) sa Amman, Jordan ang pagproseso sa employment contracts ng mga newly hired Pinoy workers.

Nangangamba ang kampo ni Vice President Leni Robredo sa hindi pa tiyak na pondo para sa iaangkat ng gobyerno na suplay ng coronavirus disease 2019 (COVID-19) vaccines sa ilalim ng 2021 national budget.

Reaksyon ito ng Office of the Vice President (OVP) matapos sabihin ni Senate Minority Floorleader Franklin Drilon na hindi pa malinaw kung saan huhugutin ang target na P72.5-bilyon na pondo para sa pagbili ng bakuna.

Sinabi ni Atty. Barry Gutierrez, spokesman ng OVP, na nakakadagdag pa sa problema ng bansa sa COVID-19 pandemic ang pambili ng bakuna na dapat hinahanapan na ng pondo kahit pa mangutang na ang Pilipinas.

Kulang aniya ng ‘sense of urgency’ ang gobyerno sa kabila ng sitwasyon kung saan nag-uunahan na ang mga bansa para maka-secure ng suplay ng bakuna kontra COVID-19.

Una nang lumagda sa kasunduan ang pribadong sektor at pamahalaan para makakuha ng suplay ang bansa ng bakunang gawa ng British pharmaceutical firm na AstraZeneca.

Bukas na muli ang cash lanes sa lahat ng expresssways sa gitna na rin ng transition period para sa contactless radio-frequency identification (RDIF) collection system.

Ipinabatid ito ni Toll Regulatory Board Spokesperson Julius Corpuz matapos mapaulat ang pagbukas muli ang ilang cash lanes sa North Luzon Expressway.

Sinabi ni Corpuz na ipinag-utos na ni Transportation Secretary Arthur Tugade ang pagbubukas ng cash lanes para maibsan ang trapiko habang pila pa ang mga nagpapakabit ng RFID stickers bukod pa sa hindi mabasa ng sensors ang ilan sa mga stickers na ito.

Ikinababahala ng kampo ni Vice President Leni Robredo sa posibilidad na samantalahin ng ilang opisyal ng gobyerno ang pagkakataong makauna sa bakuna kontra coronavirus disease 2019 (COVID-19).

Ayon kay Atty. Barry Gutierrez, spokesman ng OVP, patuloy na sinasabi ng gobyero na health workers at mga mahihirap ang mauunang mabakunahan subalit mga pulitiko naman ang mauuna.

Dapat aniyang matiyak na ang tinutukoy na frontliners ng Pangulong Rodrigo Duterte ang siyang talagang unang matuturukan ng darating na COVID-19 vaccines.

Gayunman, inihayag ni Gutierrez na sapat na ring mauna ang ilang matataas na opisyal sa pagba bakuna para makatulong na mawala ang takot ng publiko sa pagpapaturok ng bakuna kontra COVID-19.

Walang personalan ang pagpapatupad muli ng truck ban —epektibo simula ngayong araw na ito.

Binigyang diin ito sa DWIZ ni Metropolitan Manila Development Authority (MMDA) EDSA traffic director Col. Bong Nebrija dahil matagal nang polisiya ang truck ban.

Nilinaw ni Nebrija na hindi pinipigilang bumiyahe ang mga truck at inaayos lamang nila ang paglabas ng mga ito para naman hindi maka perwisyo sa mga papasok sa trabaho.

Wala pong personalan ito sa mga truckers. It’s part of traffic managing, hindi naman po sila pinipigilan, na huwag bumiyahe. Magkakaroon lang po tayo ng oras na hindi ka pupwede sa kalsada,” ani Nebrija. —sa panayam ng Santos at Lima sa 882

Hindi maaaaring gamitin bilang ebidensya sa anumang administrative proceedings ang mga newspaper reports.

Ayon ito kay House Deputy Speaker Rufus Rodriguez matapos gamitin ni Edwin Cordevilla ng Pilipino league of advocates for good government ang ilang newspaper column sa impeachment complaint nito kontra Supreme Court Associate Justice Marvic Leonen.

Sinabi ni Rodriguez, dating law dean na kailangang magkaroon ng clear at direct testimony bukod pa sa documentary evidence dahil hindi uubra sa anumang administrative proceedings kung mga newspaper reports lamang ang pinanghahawakan ng complainant.

Iginiit ni Rodriguez na kailangan ng substantial evidence para tumayo ang reklamo at hindi maibasura lang.