Judith Estrada-Larino

Tinawag na scandal ni Political Analyst Professor Ramon Casiple ang pagkakaroon ng 29 na Deputy Speakers ng kamara.

Ayon pa kay Casiple hindi kailangan ng ganoon karaming Deputy Speakers ng kamara dahil wala namang naipapakitang nagagawa bukod sa lalong lumalaki ang gastos ng mababang kapulungan.

Sinabi ni Casiple na ang pagkakaroon ng maraming Deputy Speakers ay isang political accommodation dahil nabigyan ng pwesto ang mga kongresistang naging instrumental sa pag-upo ni Congressman Lord Allan Velasco bilang house speaker.

Ang nasabing bilang ng Deputy Speaker ang pinakamataas sa kasaysayan ng kamara.

Kabilang naman sa mga bagong itinalagang Deputy Speakers sina Congressmen Arnulfo Teves, Rimpy Bondoc, Bernadette Herrera-Dy, Kristine Singson Meehan, Divine Grace Yu, Rogelio Pacquiao, Bienvenido Abante, Weslie Gatchalian at Eric Martinez.

Iginiit ni Senador Bong Go ang kahalagahan ng National Task Force to End Local Communist Armed Conflict (NTF-ELCAC) para matapos na ang matagal ng problema sa armadong pakikibaka ng NPA.

Ang nasabing task force ay binuo sa pamamagitan ng Executive Order 70 noong 2018 at naglalayong magkaroon ng ganap na kapayapaan sa Pilipinas.

Kasabay nito nanawagan si Go sa mga nais pabagsakin ang administrasyon na kilalanin ang pagpili ng mayorya ng mga Pilipino sa Pangulong Rodrigo Duterte para pamunuan ang bansa.

Uubrang kontrolin ng Local Government Units (LGU’s) ang bilang ng mga dadalo sa fireworks display at iba pang pagtitipon ngayong holiday sa gitna na rin ng COVID-19 pandemic.

Kasunod na rin ito nang paglalatag ni DILG Assistant Secretary Odilon Pasaraba ng mga dagdag na panuntunan para sa mga LGU ngayong holiday season.

Binigyang diin ni Pasarba na kailangang mahigpit na maipatupad ang health protocols at mitigating measures sa lahat ng community fireworks displays at iba pang aktibidad ngayong kapaskuhan.

Ipinaalala ni Pasarba sa LGU’s na maging observant sa mga posibleng epekto ng mga nasabing  holiday events sa COVID-19 situation sa kani-kanilang mga lugar.

Subalit hinimok ni Pasarba ang LGU’s na isulong ang mas ligtas na alternatibo tulad ng virtual celebrations o maliliit na pagtitipon.

Naisumite na ng DOST sa FDA ang rekomendasyon sa 2 bakuna laban sa COVID-19.

Ipinabatid ni DOST Secretary Fortunato Dela Peña na dumaan na sa evaluation ang mga nasabing bakuna at aprubado na ng ethics board.

Tinukoy ni Dela Peña ang Sinovac at clover ang mga naturang bakuna kung saan hinihintay na lamang ang desisyon dito ng FDA.

Sa kaso naman ng Jansen at Astrazeneca mayroon nang ethics clearance ang mga ito at hinihintay na lamang ang vaccine evaluation dito.

Samantala sa usapin naman ng solidarity trial ng COVID-19 vaccine inihayag ni Dela Peña na hindi pa rin natutukoy ng World Health Organization kung anong bakuna ang gagamitin sa trial.

Kaya naman hindi pa umano masimulan ang pagre-recruit ng mga taong isasali sa trial at anong age bracker ng mga indibidwal ang kukuhaning participants hanggat wala pang abiso ang WHO at wala pang go signal ang FDA.

Pumapalo na sa 445, 540 ang kumpirmadong kaso ng COVID-19 sa bansa matapos madagdag ang 1, 383 na mga bagong impeksyon.

Ayon sa Department of Health (DOH) Quezon City ang nakapagtala ng pinakamataas na bagong kaso ng COVID-19 sa 83, sumunod ang Laguna – 75, Maynila – 68, Bulacan – 65 at Davao City – 61.

Patuloy ding sumisirit ang total recoveries na ngayo’y nsa 409, 058 na nang madagdag ang 133 pang pasyente na gumaling mula sa nasabing sakit.

Umakyat pa ang death toll sa 8,701 matapos maitala ang 24 na bagong nasawi sa COVID-19.

Nasa 27, 781 active cases naman ang sumasailalim sa gamutan o quarantine.

Isang full cabinet meeting ang nakatakdang isagawa ng Pangulong Rodrigo Duterte sa Lunes, December 14.

Gayunman sinabi ni Presidential Spokesman Harry Roque na hindi pa malinaw ang agenda sa nasabing cabinet meeting na mangyayari bago ang lingguhang public address nito.

Magugunitang regular ang idinaraos na buwanang cabinet meeting ng Pangulo na natigil lamang nang maharap sa COVID-19 pandemic ang bansa.

Pag-aaralan pa ng IATF ang panukala ng Pangulong Rodrigo Duterte na gawing libre ang mass testing kontra COVID-19 sa lahat ng mga Pilipino.

Ayon kay IATF Vice Chairman at Cabinet Secretary Karlo Alexi Nograles kailangan munang alamin kung sasapat ang pondo ng PhilHealth at Department of Health para sa mass testing.

Sinabi ni Nograles na sa ngayon ay pinipilit ng gobyerno na maibaba ang presyo ng COVID-19 test para makayanan ng mga Pilipino.

Priority aniya ngayon ng gobyerno ang pagsasagawa ng COVID-19 test sa mga sektor na hindi na kinakailangang sumailalim sa pagsusuri.