Judith Estrada-Larino

Papalo sa $7-bilyon hanggang $10-bilyon ang inaasahang dagdag na foreign investments na papasok sa bansa sa susunod na taon.

Ito ang pagtaya ni House Ways and Means Committee Chair Joey Salceda kapag naisabatas na ang Corporate Recovery and Tax Incentives for Enterprises (CREATE) bill.

Sinabi ni Salceda na sa 2021 pa lamang ay inaasahang magpapasok na ang CREATE bill ng P39-bilyon na halaga ng business expansion at lilikha ng 1-milyong trabaho sa susunod na dalawa hanggang tatlong taon.

Tiwala naman si Salceda, na isang ekonomista, na lalakas ang stock market, foreign investment at mga negosyo sa bansa dahil sa nasabing panukala.

Tataas sa P5.7-trilyon sa susunod na 10 taon o 38% ng market capitalization ang actual net ng private sector capital dahil sa CREATE.

Naturukan na rin ng coronavirus disease 2019 (COVID-19) vaccine ang Pinay nurse na nagturok ng bakuna sa kauna-unahang recipient sa United Kingdom na si Margaret Keenan.

Sinabi ng pamilya ni May Parsons na isinama na rin ito sa mga binigyan ng bakuna matapos ma-expose sa iba’t ibang tao na kanyang tinurukan ng bakunang gawa ng Pfizer at BioNTech.

Masaya na ang pamilya ni Parsons sa naging pagkilala sa Pinay nurse na kabilang sa mga nagturok ng COVID-19 vaccine.

Kuwalipikado na rin ang iba pang Pilipino sa United Kingdom sa unang buhos ng mga babakunahan para sa nasabing sakit.

Patuloy ang pagsailalim sa training sa paggamit ng yantok ang mahigit 300 police trainees ng National Capital Region Police Office (NCRPO).

Kahapon sinimulan ang pagsasanay sa paggamit ng yantok ng 316 police trainees bilang bahagi ng defense tactics o self defense.

Ang nasabing training ay requirement din bago isabak ang mga ito sa field matapos maggraduate.

Binigyang diin ni NCRPO Director Brigadier General Vicente Danao na napapanahon ang pagsasanay ng yantok para sa pagpapatupad ng batas at pagliligtas ng ating mga kababayan laban sa coronavirus disease 2019 (COVID-19).

Una nang ipinag-utos ni Philippine National Police (PNP) Chief General Debold Sinas sa mga pulis na gumamit ng baton o yantok sa pagpapatupad ng physical distancing ngayong holiday season.

Kinumpirma ni Metropolitan Manila Development Authority (MMDA) traffic chief Col. Bong Nebrija ang pagpapatupad muli ng truck ban sa Lunes, ika-14 ng Disyembre.

Ang truck ban, ayon kay Nebrija, ay epektibo alas-6 hanggang alas-10 ng umaga, at alas-5 ng hapon hanggang alas-10 ng gabi, Lunes hanggang Sabado.

Subalit total truck ban pa rin aniya ang iiral sa kahabaan ng EDSA.

‘Yung truck ban will be implemented from 6a.m. to 10a.m. and then from 5p.m. to 10p.m. This will be everyday, except Sundays and holidays. Ang EDSA, paalala ko lang sa mga truckers natin, will remain a total truck ban, but will cover the area of Fort Avenue up to Magallanes, wala pong truck dya’n,” ani Nebrija.

Sinabi sa DWIZ ni Nebrija na nagpapasaklolo na ang local government units dahil sa matinding trapiko na ang idinudulot ng suspensyon ng truck ban na una nang ikinasa sa kasagsagan ng lockdown.(nebrija 2)

Pinagbigyan na natin to improve transport of essential goods. Napakahalaga during the pandemic. However, I think we have given them enough time already to do that and to recover. Nagkakaroon na tayo ng plano from the local governments to bring it back dahil ‘yung traffic sa main road ay nag-ooverflow na sa mga inner roads sa mga local governments natin,” ani Nebrija. —sa panayam ng Santos at Lima sa 882

Bahala na ang mga kura-paroko na magpatupad ng mahigpit na health protocols sa bawat simbahan.

Ayon ito kay Catholic Bishops’ Conference of the Philippines (CBCP) Spokesman Father Jerome Secillano, sa gitna na rin  nang pagsisimula ng Simbang Gabi sa ika-16 ng Disyembre.

Sa ngayon ay nasa 30% lamang na populasyon ng simbahan ang papayagang makadalo sa misa tulad halimbawa ng misa sa Quiapo Church na may pang alas-4 ng umaga hanggang alas-6:30 ng umaga simula ika-16 ng Disyembre habang mayroong anticipated mass na magsisimula ng alas-6 ng gabi, alas-7:15 ng gabi at alas-8:30 ng ika-15 ng Disyembre.

Sinabi ni Secillano na mayroon ding anticipated mass sa Liwasang Bonifacio na malapit sa Manila City Hall ng alas-8 ng gabi.

Ang mga nasabing option aniya ay para maiwasan ang pagsisiksikan ng mga dadalo sa mga misa.

Ipinabatid pa ni Secillano na nakikipag-ugnayan na rin sila sa local government units para sa pagpapatupad ng physical distancing sa loob ng mga simbahan.