Judith Estrada-Larino

Nilinaw ng Department of Health (DOH) na mananatili ang skeleton force ng mga ospital at iba pang health facilities sa darating na Pasko at Bagong Taon lalo na’t may banta pa rin ng coronavirus disease 2019 (COVID-19).

Sinabi ni Health Secretary Francisco Duque III na hanggat maaari ay nais nilang bukas ang mga pagamutan at testing laboratories sa papalapit na year-end holiday.

Muling hinimok ni Duque ang publiko na hanggang maaari ay obserbahan ang minimum health standards at iba pang paalala sa pagdiriwang ng holiday ngayong panahon ng pandemya.

Sa nakalipas na mga linggo, nakita ni Duque ang patuloy na pagbaba ng trend ng coronavirus infections sa bansa na resulta aniya ng pinalakas na health systems capacity at pagsunod ng publiko sa health protocols.

Tumanggi nang makipag-usap sa NLEX Corporation si Valenzuela City Mayor Rex Gatchalian.

Ayon kay Gatchalian, may pagbabanta ang pahayag ng NLEX Corporation na idudulog nito sa Department of Transportation (DOTr) at Toll Regulatory Board ang isyu ng pagkakasuspindi ng Valenzuela City government sa business permit nito dahil sa matinding problema sa trapiko sa mga toll gates nitong sakop ng nasabing lungsod.

Una nang inihayag ni Gatchalian na nakadepende sa NLEX Corporation kung kailan pinakamabilis na mababawi nito ang kanilang business permit.

Dahil sa inisyung suspensyon sa kanilang business permit, walang babayarang toll ang mga motoristang dadaan sa toll gate ng NLEX na sakop ng Valenzuela City.

Umaabot na sa mahigit 1,000 traditional at modernized public utility jeepney drivers sa Metro Manila ang pumirma na ng kontrata para mapabilang sa service contracting program.

Sa ngayon ay mino-monitor na ng systems manager ng programa ang kabuuang kilometrong bini-byahe ng mga driver.

Ang service contracting program ng Department of Transportation (DOTr) at Land Transportation Franchising and Regulatory Board (LTFRB) ay isinagawa batay na rin sa Republic Act 11494 o Bayanihan to Recover as One Act para makapagbigay ng dagdag kita sa mga driver ng bus at jeep.

Ang mga driver ay sumailalim sa orientation ng LTFRB at ng systems manager para mas maunawaan nila ang programa.

Uubra nang mag-apply para sa emergency use authorization (EUA) ang Pfizer at BioNTech sa bansa para sa bakuna nito kontra coronavirus disease 2019 (COVID-19) na sinimulan nang iturok sa mga mamamayan ng United Kingdom.

Ayon ito kay Dr. Jaime Montoya, executive director ng Philippine Council for Health Research and Development – Department of Science and Technology (DOST), kaugnay sa kauna-unahang vaccine manufacturer na nabigyan ng EUA sa UK.

Binigyang diin sa DWIZ ni Montoya na magandang senyales ang pagkaka-apruba ng gobyerno ng UK sa nasabing bakuna.

Pwede naman silang mag-apply na dito sa Pilipinas… ‘yun lang ang inaantabayanan natin. Sya po ang kauna-unahang nabigyan ng emergency use authorization ng UK na medical and health product regulatory agency,” ani Montoya.

Sinabi ni Montoya na maaari rin namang magamit sa bansa ang bakunang gawa ng Pfizer at BioNTech kung mabibigyan din ito ng EUA.

Subalit, kailangan pa rin aniyang mapag-aralan ng mabuti ang nasabing bakuna dahil iba ang sistema sa bansa.

Kung maaprubahan po sya ng FDA, kung makapag-submit sila kaagad, pero sabi ko nga nung una pa, ay bago po makapag-apply ng emergency use authorization sa ating bansa, kailangang maaprubahan muna sa ibang FDA tulad nitong sa UK, kaya pwede na po silang mag-apply dito, aantabayanan lang natin. Although tayo, pwedeng gawing basehan ‘yon, meron tayong sariling sistema rito. Hindi naman pwedeng basta tatanggapin nalang natin tapos at wala nang pag-aaral na gagawin,” ani Montoya. —sa panayam ng Balitang Todong Lakas

Sinampahan ng reklamong impeachment sa kamara si Supreme Court Associate Justice Marvic Leonen.

Isang Edwin Cordevilla, Secretary General ng Filipino League of Advocates for Good Government, ang tumatayong complainant kasama ang abogado niyang si Atty. Larry Gadon.

Batay sa 40-pahinang reklamo, kabilang sa ground sa isinampang impeachment complaint laban kay Leonen ay culpable violation of the constitution at betrayal of public trust.

Ayon kay Gadon, hindi Statement of Asset Liabilities and Networth (SALN) ang reklamo laban kay Leonen kundi ang nabibinbing pagresolba nito ng mga kasong hinahawakan niya.

Sa ilalim ng impeachment rules, kailangang mayroong kongresistang mag-endorso ng impeachment complaint bago madala sa committee on rules ng kamara para maisalang sa unang pagbasa at mai-refer sa Committee on Justice.

Sa Committee on Justice diringgin ang impeachment complaint kung saan maghaharap ng testigo at ebidensya ang complainant at respondent.

Kapag napatunayang guilty sa komite, iaakyat ito sa plenaryo para aprubahan bago naman dadalhin sa senado na tatayong impeachment court.

Umapela sa Valenzuela City government ang pamunuan ng Metro Pacific Tollways Corporation (MPTC) matapos magbanta si Mayor Rex Gatchalian na sususpindihin ang business permit ng korporasyon dahil sa hindi masolusyunang problema sa RFID system.

Una nang tinaningan ni Gatchalian ng 72 hours o hanggang mamayang alas-5:01 ng hapon ang pamunuan ng NLEX Corporation para magpaliwanag kung bakit hindi dapat masuspinde ang kanilang business permit.

Humingi ng hanggang 15 araw ang NLEX Corporation sa Valenzuela LGU para magsumite ng kanilang action plan para hindi mabawi ang kanilang business permit.

Sinabi ni MPTC Chief Communication Officer Junji Quimbo na pinag-aaralan na nila ang mga hakbangin para kaagad makatugon sa kautusan ni Gatchalian.

Humihingi rin ng pang unawa si Quimbo sa mga residente ng Valenzuela na apektado ng traffic matapos amining sa ilang lugar ay nagkakaroon ng problema sa pagpapatupad ng cashless transaction.

Hindi dapat lumampas ng ika-24 ng Disyembre ang pagbibigay ng 13th month pay sa mga empleyado.

Iginiit ito sa DWIZ ni Labor Secretary Silvestre Bello III dahil walang postponement at exempted sa pagbibigay ng 13th  month pay bagamat may ibang employer na hinahati o ginagawang dalawang bagsakan ang nasabing bayarin.

Sinabi pa ni Bello na kailangang mangutang ng kumpanya para lamang makapagbayad ng 13th month pay kung saan ilang bangko ang handang magpautang ng soft loans.

Dapat ibigay ito on or before Dec. 24, hindi pwede ang installment,” ani Bello.

Ayon kay Bello, may mga hotline sila na mapagsusumbungan ng mga employer na lumalabag sa pagbabayad ng 13th month pay at papadalhan ng Department of Labor and Employment (DOLE) ang mga ito ng compliance order ang inirereklamong employer.

Kung hindi sila babayaran ng 13th month pay, magsabi lamang po sila, bibigyan namin ng for compliance order ang employer,” ani Bello. —sa panayam ng Balitang Todong Lakas

Maghihintay si Valenzuela City Mayor Rex Gatchalian hanggang alas-5:01 ngayong hapon sa paliwanag ng pamunuan ng NLEX Corporation hingil sa matinding trapiko sa expressway.

Kasunod na rin ito ng banta ni Gatchalian na sususpindihin ang business permit ng NLEX Corporation kapag hindi nakapagpaliwanag ng maayos ang kumpanya sa loob ng 72 oras sa matinding sakit ng ulong dinaranas ng mga motorista sa pagdaan sa NLEX.

Tinukoy sa DWIZ ni Gatchalian ang malaking perhuwisyo lalo na sa mga negosyong ng matinding trapiko sa NLEX kung saan ang dating 12 beses na biyahe ng mga goods ay nagiging kalahati na lamang.

Mamayang 5:01 at hindi satisfactory ‘yung ginawa niyong hakbang, isu-suspend ko ‘yan, so you’ll have to re-applied, so, baka mas maganda mag-toll holiday nalang muna sila. Sa bawat serbisyong binayaran mo, dapat palitan ng maayos na serbisyo. E, bat sila mangongolekta ng prepaid? Kumuha na sila ng pera sa atin pero hindi nila kayang tumbasan ng maayos na serbisyo. ‘Di ba, dapat lang, kahit na anong negosyo magbigay muna ng concession sa mga tao na naperwisyo nila?” ani Gatchalian.

Sakali mang mabigong masolusyunan ang matinding trapiko, sinabi ni Gatchalian na walang choice ang NLEX Corporation kundi mag-toll holiday.

Nilinaw ni Gatchalian na epektibo pa rin ang concession agreement ng kumpanya sa national government bagamat wala itong business permit para makapag-operate.

Bawal silang mangolekta. Will have to stop collecting kasi wala na silang karapatan mangolekta, pero, at the same time, they will still have to let everybody pass because, you have to remember, buhay pa ang kanilang concession agreement mula sa pamahalaang nasyonal,” ani Gatchalian. —sa panayam ng Santos at Lima sa 882

Kinakailangang pataasin pa ang 66% ng mga Pilipinong nais na magpabakuna kontra coronavirus disease 2019 (COVID-19).

Ayon ito kay Health Secretary Franciso Duque III, bagamat mababa aniya ang halos 70-milyong mga Pinoy na nais mabakunahan.

As of now merong 66% na nagsasabi na sa kanila na magpaturok, so, hindi mataas ‘yan. Pero malaking bilang pa rin ‘yan, dahil that  will be equivalent to about 60 million to 70 million Filipinos,” ani Duque.

Subalit tiniyak sa DWIZ ni Duque ang pagkilos ng gobyerno para mapatunayang ang pagiging epektibo ng mga nasabing bakuna base na rin sa mga unang naturukan tulad ng United Kingdom na ngayong linggo inaasahang gugulong ang anti-COVID-19 vaccination program.

Dalawa kasing kumpanya na ‘yan, ‘yung isa alam ko binigyan na nila ng emergency use authorization ‘yung isang kumpanya na US-based. Pero ang Britanya, meron din silang sariling bakuna. Either of the two, pagka ‘yan naman ay dumaan na sa mahigpit na pagsusuri, at nasiguro na ‘yung kaligtasan at pagiging epektibo ng bakuna, hindi naman siguro tayo magdadalawang isip pa na ‘yun din ang gagamitin natin,” ani Duque. —sa panayam ng Santos at Lima sa 882