Patay ang tatlong senior citizens matapos matrap sa sunog sa kanilang bahay sa Davao City.
Ayon sa Davao City Fire District, ang sunog ay nagsimula sa isang mini van na kinukumpuni ng isa sa mga biktima.
Bigla na lamang umanong nagliyab ang minivan at mabilis na kumalat ang apoy na nakasunog din sa bahay ng mag asawang senior citizen.
Sinubukan pang sagipin ng mekaniko ang mag-asawa subalit naipit din siya sa lumalaking apoy na nakaabot hanggang sa katabing restaurant.
Isang linggo munang isasara ang operating rooms ng isang public hospital sa Cebu City para sa kaukulang disinfection.
Ayon kay Dr. Helen Madamba, coronavirus disease 2019 (COVID-19) chief implementor ng Vicente Sotto Memorial Medical Center, nagpositibo sa COVID-19 ang 18 health workers ng ospital at naka-isolate na ang mga ito.
Isang operating room lamang aniya ang binuksan nila for emergency cases at nakikipag-ugnayan na sila sa iba pang ospital sa Central Visayas na maaaring pagdalhan sa iba pang pasyente kailangang ma-operahan.
Ipinabatid ni Madamba na naglalaro sa halos 20 kaso ng COVID-19 ang naitatala nila araw-araw sa nasabing ospital.
Napasakamay na ng San Miguel Corporation (SMC) ang 50 taong prangkisa para sa bagong international airport na itatayo sa Bulakan, Bulacan.
Ayon sa website ng Kamara ang House Bill 7507 ay nai-transmit na sa Malakanyang noong November 18 at inaksyunan ng Pangulong Rodrigo Duterte noong December 20.
Hindi malinaw kung pinirmahan itong batas subalit lumalabas sa house website na nag-lapse na ito bilang batas na nangangahulugang hindi kinontra ng Malakaniyang kaya naging batas nang hindi na kailangang pirmahan ng Pangulong Duterte.
Sa Kamara 218 ang bumoto sa pagbibigay ng prangkisa sa San Miguel Aerocity para sa gagawin nitong international airport sa Bulacan, anim ang kumontra at dalawa ang nag-abstain.
Ang prangkisa ng SMC ay nasa ilalim ng Republic Act 11506 para sa 50 taon kasama na ang 10 taon para gawin ang plano, disenyo at pagpapatayo ng mismong airport.
Isinulong ni Senate President Vicente Tito Sotto III ang panukalang ma-renew ang prangkisa ng ABS-CBN corporation.
Sa pamamagitan ito ng Senate Bill 1967 na naglalayong ma-renew ang naipagkaloob na prangkisa sa ABS-CBN sa ilalim ng Republic Act 7966 o ‘an act granting ABS-CBN broadcasting corporation a franchise to construct, install, operate and maintain television and radio broadcasting stations in the Philippines’.
Sinabi ni Sotto na sa ilalim ng liderato ni bagong House Speaker Lord Allan Velasco at mga bagong opisyal ng Kamara maaaring mayroong mas magandang tsansang ma-renew ang prangkisa ng ABS-CBN.
Ayon kay Sotto napansin niyang sa mga TV stations ngayon na pinapalitan ng anime ang mga news program na indikasyong nawawala ang kumpetisyon dahil sa pagkawala ng malakas na competitor tulad ng ABS-CBN.
Samantala ipinabatid ni Congresswoman Vilma Santos-Recto na maghahain siya ng kaparehong panukala sa susunod na linggo.
Inihayag ni Recto na ito ang tamang gawin para bumalik sa sirkulasyon ang media giant.
Si Recto ay isa sa mga kongresistang bumoto laban sa pagbasura ng house panel sa franchise renewal ng ABS-CBN sa susunod na 25 taon.
LOOK: Copy of the proposed bill for the renewal of franchise of ABS CBN filed by SP Sotto | via @OBueno https://t.co/70xgwzt12O
— DWIZ Newscenter (@dwiz882) January 4, 2021
Binalaan ng Department of Health (DOH) ang mga doktor na babawian ng lisensya kapag napatunayang nakiisa ito sa pagturok ng hindi rehistradong bakuna laban sa COVID-19.
Sinabi ni Health Secretary Francisco Duque III na nakikipag-ugnayan na sila sa Professional Regulation Commission (PRC) para malaman ang pananagutan ng mga doktor na sangkot sa iligal na pagbabakuna.
Ang tugon aniya ng mga ahensya ng gobyerno ay nakadepende sa resulta ng imbestigasyon ng Food and Drug Administration (FDA).
Una nang ibinunyag ng Pangulong Duterte na ilang miyembro ng PSG ang tinurukan ng bakuna mula sa Chinese pharmaceutical company na Sinopharm.
Binalikan ng Malakaniyang si senador at Philippine Red Cross Chairman Richard Gordon kaugnay sa panibagong banta na ititigil ang pagsasalang sa COVID-19 test ng mga uuwing OFW dahil sa kabiguan ng PhilHealth na bayaran ang natitira pa nitong utang na muling lumobo sa P800-M.
Nangako ang gobyerno sa pamamagitan ni Presidential Spokesman Harry Roque na babayaran ng gobyerno ang anumang atraso sa Red Cross.
Kasabay nito hinanap ng Palasyo sa Red Cross ang COVID test kit at PCR machine na donasyon sa Pilipinas at itinurn over dito nuong mga unang buwan ng COVID-19 pandemic.
Titingnan aniya nila kung kasama sa mga donasyon ang mga COVID test kit at makinang ginamit ng Red Cross sa mga pasyente kabilang ang mga OFW.
Sinabihan din ni Roque si Gordon na hindi nakakatulong ang paulit-ulit nitong pagbabanta na ititigil ang swab testing sa mga OFW dahil sa utang ng PhilHealth dahil may pambayad naman ang gobyerno rito at dumadaan lamang ito sa proseso kaya’t nagkakaroon ng delay sa pagbabayad.
Halos 100,000 Chinese POGO workers ang nabakunahan na kontra COVID-19 sa Pilipinas.
Ibinunyag ito ni Teresita Ang See, pangulo ng Philippine Association of Chinese Studies kung saan nagsimula ang pagbabakuna ng Chinese POGO workers nuong Nobyembre na isang bagsakan lamang na 200,000 doses.
Ayon kay ang See kalagitnaan ng Disyembre ng mapaulat ang pagiging positive ng isa sa may 100,000 nabakunahan.
Binigyang diin ni Ang See na lehitimo o sa official channels nagmula ang bakuna kontra COVID-19 na itinurok sa mga Chinese POGO worker maging sa mga miyembro ng Presidential Security Group (PSG).
Samantala ikinatuwa naman ng Malakaniyang kung totoo ang naging pahayag ni Ang See dahil nangangahulugan itong 100,000 na ang nabawas na posibleng carrier ng coronavirus.
Bubungad sa unang linggo ng Bagong Taon ang balik oil price hike.
Inanunsyo na ng Pilipinas Shell Petroleum Corporation at Seaoil Philippines Incorporated ang dagdag P.45 sa presyo ng kada litro ng gasolina, P.30 naman sa halaga ng bawat litro ng diesel at P.40 sa kerosene.
Kaparehong halaga rin ang ipatutupad na increase ng Clean Fuel at Petro Gazz maliban lamang sa kerosene.
Ang dagdag presyo sa oil products ay epektibo bukas, Enero 5, alas-6 ng umaga maliban sa Cleanfuel na alas-4:01ng hapon pa bukas ipatutupad ng dagdag presyo sa kanilang oil products.
Batay sa pinakahuling data mula sa Department of Energy ang year to date adjustments hanggang nitong nakalipas na Disyembre 22 ay may net decrease na 1.97 kada litro sa gasolina, 5.91 kada litro para sa diesel at 2. 94 kada litro sa kerosene.
Handa ang Senado na bilisan ang pagpapasa ng panukalang batas na magpapaliban pansamantala sa pagtataas sa buwanang kontribusyon ng mga miyembro ng PhilHealth.
Ayon ito kay Senate President Vicente ‘Tito’ Sotto III matapos paboran ng Pangulong Rodrigo Duterte ang pagpapalban sa pagpapatupad ng increase sa PhilHealth contribution.
Bagamat nakapaloob sa Universal Health Care Law, naniniwala ang pangulo na hindi angkop sa panahong ito ang dagdag na gastusin sa publiko dahil nahaharap pa ang bansa sa pandemya.
Samantala bukas naman si Senate Protempore Ralph Recto na amiyendahan ang isinumite niyang Bayanihan 3.
Sinabi ni Recto na kumporme siya sa panukalang maglagay ng probisyon sa Bayanihan 3 na naglalayong kanselahin muna ang nakatakdang pagtataas sa buwanang kontribusyon ng mga miyembro ng philhealth ngayong taon. —ulat mula kay Cely Ortega-Bueno (Patrol 19)
Tanging ang national government lamang ang makakabili ng COVID-19 vaccine na mabibigyan ng emergency use authorization (EUA) ng Food and Drug Administration.
Binigyang diin ito ni Health Undersecretary Maria Rosario Vergeire matapos maglunsad ang mga city government ng Maynila at Makati ng pre-registration sa kanilang sariling COVID-19 vaccination program kung saan tinitiyak pa ng Makati ang pagtuturok ng libreng bakuna sa mga residente nito.
Sinabi ni Vergeire na uubra pa lamang bumili ang national government ng bakuna na may EUA mula sa FDA at ang certificate of product registration mula sa ahensya ang magbibigay daan sa pagiging available ng produkto sa merkado.
Hindi pa aniya maibibigay ang CPR ng bakuna dahil technically ay hindi pa tapos ang clinical trials at nasa Phase 3 trials pa lamang bagama’t may exemption ngayon dahil sa public health emergency.
Ang National Immunization Program aniya ay nasa mandato ng DOH at kailangan nilang makipag ugnayan sa mga LGU kayat nakiusap ang opisyal sa koordinasyon ng local government para magtulungan sa pondo upang makabili ng epektibong bakuna.