Malalaman sa susunod na dalawang linggo kung ilang bakuna kontra coronavirus disease 2019 (COVID-19) ang makukuha ng Pilipinas mula sa Moderna at Pfizer-BioNTech.
Ayon ito kay Philippine Ambassador to the US Jose Manuel Romualdez, na nagsabi ring nakatakda nang lumagda si vaccine czar Carlito Galvez Jr. ng kontrata sa dalawang pharmaceutical company kaugnay sa suplay ng bakuna.
Gayunman, sinabi ni Romualdez na hindi pa nila batid kung kailan maide-deliver ang nasabing suplay ng bakuna.
Uubra pa hanggang bukas, alas-9 ng umaga hanggang alas-5 ng hapon, ang public viewing sa urn ni Metropolitan Manila Development Authority (MMDA) Chairman Danilo Lim sa Heritage Park sa Taguig.
Gayunman, ipinapaalala sa mga nais magbigay ng huling respeto ang pag-obserba sa minimum health protocols tulad ng pagsusuot ng face mask, face shield at maging physical distancing.
Dahil sa mga limitasyon dulot ng coronavirus disease 2019 (COVID-19) pandemic, hinimok ng pamilya at mga kaibigan ni lim ang publiko na ipagdasal ang namayapang opisyal sa kani kanilang mga bahay.
Walang nakikitang mali o lapse ang Philippine National Police (PNP) sa paghawak ng Makati City Police ng paunang imbestigasyon sa pagkamatay ng flight attendant na si Christine Dacera.
Ayon kay PNP Spokesman Police Brigadier General Ildebrandi Usana, ginagawa lamang ng Makati police ang trabaho nito kaya’t ang pagsasampa ng kaso ang nakikita nitong paraan para maresolba ang kaso.
Kasunod na rin ito nang pagpapalaya ng Makati City Prosecutors Office sa tatlong kalalakihang unang dinampot ng Makati police matapos idawit sa pagkamatay ni Dacera.
Sinabi ni Usana na dahil pinalaya ng piskalya sina John Pascual Dela Serna, Rommel Galido at John Paul Halili, nangangahulugan itong kailangan pang imbestigahan ang nasabing krimen o kailangan pa ng prosecution ng dagdag na ebidensya sa kaso.
Ilang Pilipino ang kabilang sa daan-daang protesters na lumusob at nakapasok sa U.S. Capitol para puwersahin ang ang kongreso na huwag ideklarang nanalong pangulo ng Amerika si dating U.S. Vice President Joe Biden.
Ayon ito kay Philippine Ambassador to the U.S. Jose Manuel Romualdez na nagsabing galing sa iba’t ibang estado sa Amerika ang mga naturang Pinoy Trump supporters.
Kasabay nito,ipinabatid ni Romualdez na hindi naman apektado ng kaguluhan sa U.S. Capitol ang embassy operations dahil malayo-layo naman ito sa lugar ng protesta bagamat naghihigpit na rin sila ng seguridad sa posibleng spill over sa Massachusetts Avenue kung saan matatagpuan ang Embahada ng Pilipinas.
Sa kasalukuyan aniya ay kontrolado naman ng U.S. security forces ang sitwasyon.
Sa korte at piskalya na lamang ilatag ang mga ebidensya kaugnay sa pagkamatay ng flight attendant na si Christine Dacera.
Ito, ayon sa mga otoridad, ay kaysa isapubliko o ipost sa social media ang autopsy report, CCTV footages at ilang screen grab ng pag-uusap hinggil sa sinapit ni Dacera.
Kasunod na rin ito nang pag-ulan ng mga komentaryo ng social media users at ilang personalidad ang nadadamay na wala naman sa crime scene habang nababatikos pa ang mismong biktima.
Una nang itinakda ng Makati City Prosecutor’s Office ang preliminary investigation sa nasabing kaso sa ika-13 ng Enero.
Wala pang naitatalang bagong variant ng SARS-COV sa bansa.
Nilinaw ito ng Department of Health (DOH) at Philippine Genome Center (PGC) matapos i-report ng Hong Kong authorities na isang pasahero mula sa Pilipinas ang carrier ng second variant ng coronavirus.
Ayon kay PGC, sa isinagawa nitong genome sequencing, walang na-detect na UK variant sa 305 positive samples na isinumite sa kanila mula sa siyam na institusyon.
Ang mga naturang sample na sinuri ng PGC ay binubuo ng positive samples mula sa November-December hospital admissions at mula sa inbound travelers na nagpositibo nang dumating sa paliparan.
Bukod dito, tiniyak ng DOH ang mahigpit na koordinasyon sa international health regulations focal point ng Hong Kong para sa official notification at iba pang mahahalagang impormasyon kaugnay sa isang residente nitong nagpositibo sa nasabing variant matapos mag biyahe sa Pilipinas.
Patuloy ang panawagan ng DOH sa lahat ng local government units at transport regulators na mahigpit na ipatupad ang health protocols sa lahat ng pagkakataon dahil ito pa rin ang pinakamabisang paraan para hindi na kumalat pa ang anumang uri ng coronavirus.
BREAKING: Wala pang naitatalang kaso ng bagong variant ng COVID-19 sa Pilipinas —DOH https://t.co/HHOy7zaafm pic.twitter.com/vV6fuMZJT1
— DWIZ Newscenter (@dwiz882) January 6, 2021
Nasa P13-bilyon ang mawawala sa kita ng PhilHealth sa taong ito matapos ipagpaliban ang dagdag-kontribusyon ng mga miyembro nito.
Ayon ito kay PhilHealth Spokesperson Rey Balena kung saan nasa P90-bilyon ang tinataya nilang kita ng ahensya sa taong ito kung koleksyon ang pag-uusapan.
Gayunman, tiniyak ni Balena sa publiko na mayroong sapat na pagkukunan ng pondo ang PhilHealth para ipatupad ang Universal Health Care law kahit pa ipinagpaliban ang premium rate hike.
Ipinabatid ni Balena na nasa P137-bilyon ang reserve fund ng PhilHealth para magamit sa mga hindi inaasahang sitwasyon kaya’t tulu- tuloy ang implementasyon ng mga programa ng ahensya.
Tiwala rin si Balena na tutuparin ng Pangulong Rodrigo Duterte at mga kaalyado nito sa kongreso ang pangakong hahanapan ng dagdag na pondo ang PhilHealth para sa pagpapatupad ng Universal Health Care law.
Halos tripleng ingat na ang ginagawa ng mahigit 18,000 Pinoy health workers sa United Kingdom dahil sa panibagong variant ng coronavirus sa bansa.
Sa gitna na rin ito ng anunsyo ni British Prime Minister Boris Johnson na pagpapatupad muli ng nationwide lockdown habang nagkukumahog na mabakunahan ang lahat ng kanilang constituents para ma-flatten din ang curve kaugnay sa naunang uri ng coronavirus.
Inamin ng Pinoy nurses ang higit na pangamba sa ikalawang strain ng coronavirus sa gitna na rin ng patuloy na pag a adjust sa unang strain ng coronavirus disease 2019 (COVID-19).
Ipinabatid ng Pinoy nurses ang pagsailalim sa tier four na pinakamataas na alarm level bago pa man inanunsyo ang lockdown, samantalang nakadepende sa rate ng COVID-19 infections at threats ng area ang category ng nasabing alarm level.
Kabilang sa tier four ang ‘stay at home’ order, gayundin ang pagsasara ng lahat ng non-essential shops tulad ng indoor entertainment venues, gyms, indoor swimming pools, indoor sports courts at dance studios.
Restricted ang galaw ng tao na maaari lamang makipagkita sa iba, indoors, kung kasama nila sa bahay ang mga ito o bahagi ng kanilang support bubble.
Nagpaabot na ng pakikiramay ang Malacañang sa pamilya ni Metropolitan Manila Development Authority (MMDA) Chairman Danilo Lim.
Si Lim ay sumakabilang buhay kaninang bago mag-alas-8 ng umaga, sa edad na 65.
Ayon kay Presidential Spokesman Harry Roque, mami-miss nila si Lim na nagpakita ng professionalism sa paggampan nito sa tungkulin simula nang italagang pinuno ng MMDA noong Mayo taong 2017 kapalit ni Thomas Orbos.
Magugunitang noong isang linggo ay nagpositibo sa coronavirus disease 2019 (COVID-19) si Lim, dahilan kayat nag-isolate muna ito. —ulat mula kay Jopel Pelenio (Patrol 17)
Malaya ang private sector at local government units (LGUs) na pumili ng bakunang nais nitong iturok sa kanilang constituents o nasasakupan.
Binigyang diin ito ni National Task Force Chief Implementer Secretary at vaccine czar Carlito Galvez, Jr. matapos makipagpulong sa LCP League of Cities Committee on Vaccine Availment sa pangunguna ni Iloilo City Mayor Jerry Treñas.
Gayunman, ipinabatid ni Galvez na bahala na ang gobyernong makipagnegosasyon sa mga vaccine company sa ibang bansa.
Bumuo na rin ng mekanismo ang tanggapan ni Galvez para sa pribadong sektor kasama ang mga kumpanya o mga negosyo na nais ding bumili ng bakuna para sa kanilang mga empleyado.
Nakasaad sa mekanismo ang pagpirma sa isang kasunduan o tripartite agreements ng private sector kasama ang national government at vaccine manufacturers
Nakapaloob sa kasunduan kung anong partikular na bakuna ang nais bilhin ng pribadong sektor kung saan 50% nito ay dapat ibibigay na donasyon sa LGUs.
Inihayag ni testing czar Vince Dizon na mahalagang pumasok ang private companies sa tripartite agreement dahil limitado ang mga bakuna at mas makakamura kung magiging government to government ang negosasyon sa pagbili ng bakuna kontra coronavirus disease 2019 (COVID-19).