Judith Estrada-Larino

Malinaw na walang koordinasyon sa pagbili ng COVID-19 vaccine para sa bansa.

Ito ayon kay Senador Panfilo Lacson ay dahil nagkakanya kanyang hakbang o inisyatiba ang local government units sa pagbili ng bakuna kontra COVID-19 para sa kanilang constituents.

Sinabi ni Lacson, na ang mga LGU ay kumikilos sa harap ng kabigyan ng national government na gawin ang trabaho nito pagdating sa bakuna.

Una nang hinimok ni Lacson, ang DOH at FDA na magpakita ng sense of urgency sa pagbili at pamamahagi ng bakuna kontra COVID-19.

Mamamatay aniya ang mga Pilipino sa walang katapusang pag-aaral ng DOH at FDA sa COVID-19 vaccine dahil malamang mapag iwanan na tayo.

Duda ang kampo ni Vice President Leni Robredo sa pagbuhay sa charter change ng ilang mambabatas sa gitna ng COVID-19 pandemic.

Ayon kay Atty . Barry Gutierrez, spokesman ni Robredo, nagtataka silang isinisingit pa ng ilang mambabatas ang pagtalakay sa Cha-Cha na hindi naman napapanahong hakbangin at pagsasayang ng pera at oras ng taumbayan.

Mas marami aniyang mga mahahalagang bagay ang dapat tutukan ng gobyerno partikular sa isyu ng global health crisis.

Una nang kinumpirma ni Ako Bicol Party List Representative Alfredo Garbin, chairman ng House Committee on Constitutional Amendments ang basbas ni House Speaker Lord Allan Velasco para tutukan ang restrictive economic provisions ng konstitusyon.

Humihingi pa ng dagdag na CCTV footage ang Pamilya Dacera para mas mabigyang-linaw ang nangyaring pagkamatay ng flight attendant na si Christine Dacera sa isang hotel sa Makati City.

Ito, ayon kay Atty Jose Ledda, Jr., isa sa mga abogado ng Pamilya Dacera, ay dahil hindi kumpleto o nasa isang bahagi lamang ng hotel ang lumabas na video footages sa media.

Sinabi ni Ledda na kailangang makita nila ang lahat ng anggulo sa mga nangyari sa naturang hotel para magkaroon ng kumpletong pananaw at mas malalim na pang-unawa sa talagang tunay na nangyari kay Dacera noong Bagong Taon.

Tinukoy ni Ledda ang lumabas na CCTV footage kung saan makikita si Dacera na hinahalikan ang isang lalaki sa corridor ng hotel at hindi naman nakakaapekto sa kaso ang footage dahil isang anggulo lamang ang ipinapakita rito.

Inihayag pa ni Ledda na hindi naman kontra sa posibilidad na ginamitan ng puwersa at intimidation si Dacera, sa nakasaad sa autopsy report na nagsasabing ang flight attendant ay nasawi sa rupture aortic aneurysm.

Hinihintay aniya ng pamilya ang resuLta ng alcohol at drug tests kay Dacera.

Nakatakdang tukuyin ng Task Force for COVID-19 response ang mga lugar na ipa-prioritize sa immunization program laban sa coronavirus disease 2019 (COVID-19).

Sinabi ni Health Secretary Francisco Duque III na mag-uusap pa at magpapasya ang Inter-Agency Task Force (IATF) kung anu-anong mga area ang kailangang unahin sa pagbabakuna.

Kasabay nito, binalewala ni Duque ang mga punang mas mabilis pang kumilos ang local government kaysa national government sa pag-secure ng COVID-19 vaccines.

Puspusan aniya ang pagtatrabaho ni vaccine czar Carlito Galvez Jr. para masigurong tumatakbo ng maayos ang koordinasyon at negosasyon hinggil dito.

Una nang inanunsyo ni Galvez na inaprubahan na ng Pangulong Rodrigo Duterte ang pagpasok ng LGU sa isang tripartite agreement para sa pagbili ng COVID-19 vaccines.

Malaki ang tiyansang magamit ang saliva test para mabilis na madetect ang coronavirus disease 2019 (COVID-19).

Ayon ito kay Health Secretary Francisco Duque III sa gitna na rin nang ginagawa nilang validation hinggil dito dahil nais nilang matiyak na accurate ang sadyang makatutulong ang saliva test tulad ng swab test para malaman kung may COVID-19 ang isang tao.

Una nang inihayag ni Senador Richard Gordon, chairman ng Philippine Red Cross, na kaagad nilang iaalok ang saliva test kapag nagbigay na ng go-signal ang gobyerno hinggil sa paggamit nito, unang-una sa Metro Manila.

Mas mura rin aniya ang saliva test na nasa halos P2,000 lamang o mas mababa pa at makalipas ang tatlong oras ay makukuha na ang resulta nito.

Sumakabilang-buhay na si dating Oriental Mindoro Congressman Rey Umali, kaninang umaga.

Ayon kay Cong. Alfonso Umali, kapatid ng dating mambabatas, nasawi sa coronavirus disease 2019 (COVID-19) at kumplikasyon mula sa Stage 4 liver cancer ang kanyang 63-taong gulang na kapatid na nakatakda pa sanang magdiwang ng kanyang kaarawan sa susunod na buwan.

Sinabi ni Umali na na intensive care unit (ICU) ang kapatid nitong ika-21 ng Disyembre hanggang unti-unting sumama ang kondisyon kung saan kahapon ay nagkaroon na ng bacteria ang atay nito hanggang bumigay na sa cardiac arrest kaninang umaga.

Hindi pa mabatid ni Umali ang mga detalye partikular ang burol ng kapatid dahil hindi pa niya makausap ang maybahay nito. —ulat mula kay Jill Resontoc (Patrol 7)