Judith Estrada-Larino

Itinalagang bagong MMDA chairman si dating Mandaluyong City Mayor Benhur Abalos, Jr.

Kinumpirma ito ni Senador Bong Go.

Pinalitan ni Abalos si dating MMDA Chairman Danilo Lim na sumakabilang buhay noong isang Linggo dahil sa COVID-19.

Si Abalos ay una na ring nagpositibo sa COVID-19 gayundin ang kaniyang magulang kung saan ang amang si Benjamin Abalos ay nagsilbing MMDA Chairman mula 2001 hanggang 2002.

Samantala itinalaga rin ng Pangulong Rodrigo Duterte si Mark Lapid bilang Chief Operating Officer ng Tourism Infrastructure and Enterprise Zone Authority (TIEZA).

Nakasaad sa sulat ni Executive Secretary Salvador Medialdea sa board of directors ng TIEZA na tatasaluhin ni Lapid ang hindi natapos na termino hanggang sa June 30 ni dating CEO Pocholo Paragas na una nag-resign noong November 2020.

Una nang na puwesto si Lapid sa nasabing ahensya na dating Philippine Tourism Authority sa ilalim ng Department of Tourism sa Arroyo at Aquino administration.

2016 nang bumaba sa tungkulin si Lapid para tumakbo sa senatorial elections kung saan siya natalo.

Isang lalaki pa rin ang mamumuno sa Pilipinas at susunod sa Pangulong Rodrigo Duterte.

Ayon ito sa prediksyon ng psychic na si Brother Arman Cuban na nagsabing babae pa rin ang susunod na Bise Presidente.

Ipinabatid pa ni Cuban na urong sulong din ang isang babaeng pulitiko sa pagtakbo sa pagka-presidente kahit malakas naman ito sa masa.

Sampung presidentiables aniya ang maglalaban laban para sa 2022 Presidential elections kabilang sina Senador Manny Pacquiao at Manila Mayor Isko Moreno.

Kasabay nito diretsahang inihayag ni Cuban na hindi mananalo sa mas mataas na posisyon si Vice President Leni Robredo na nararamdaman niyang tatakbong Pangulo subalit mabibigo lalo’t galit sa kanya ang taumbayan.

Isinusulong ni ACT-CIS Partylist Representative Nina Taduran ang pagbuo ng panibagong ahensya para sa mga Overseas Filipino Workers (OFW).

Ayon kay Taduran magpo-focus ang bubuuing Department of OFW sa iba’t-ibang problema ng mga tinaguriang bagong bayani tulad ng passport at pakikitungo sa kanila ng kanilang employers.

Sinabi ni Taduran na mayroon siyang mga nakakausap na OFW na nag-aakalang hindi sila pinapakain ng kanilang mga amo.

Pinapakain naman pala aniya ang mga ito subalit hindi lamang makain ang mga pagkain ng mga Arabo.

Binigyang diin pa ni Taduran na hindi rin dapat hinahawakan ng mga amo ang visa at passport ng isang OFW na nagiging problema sa sakaling mag-exit na ang mga ito sa mga bang pinagtatrabahuhan.

Ayon pa kay Taduran makakatulong din ang Department of OFW para maiwasan ang under-employment tulad ng mga guro na ginagawang domestic helper sa ibang bansa.

Tukoy na ng NBI ang mga umukupa sa room 2207 ng isang hotel sa Makati City na binalik balikan ng flight attendant na si Christine Dacera bago siya natagpuang patay.

Gayunman hindi muna pinangalanan ng NBI ang mga nag-check in sa nasabing kuwarto na kalapit lang ng room 2009 kung saan naman sinalubong ni Dacera at mga kaibigan nito ang bagong taon.

Sinabi ng NBI na inimbitahan na nila ang mga umukupa sa room 2207 para magbigay ng pahayag kaugnay sa nangyari kay Dacera.

Ibinunyag naman ng pamilya Dacera na isang basketball player ang kasama sa room 2207.

Pinuri ni Senador Panfilo Lacson si DFA Secretary Teodoro Teddy Boy Locsin sa mabilis na pagkilos nito sa paggampan ng kanyang tungkulin.

Ayon kay Lacson dapat mabigyan ng medalya ng anti red tape authority si Locsin for “breaking the record”.

Kasunod na rin ito nang ibinunyag ni Locsin na “somebody dropped the ball” o ang tinutukoy ay si Health Secretary Francisco Duque III kaya’t nabigo ang bansa na maka secure ng 10 million dose ng bakuna mula sa Pfizer – BioNTech.

Sinabihan pa ni Lacson si Locsin na kung ito ang in charge o nakatutok sa bakuna tiyak na iba ang diskarte at magkakaroon ng agarang pagbabago sa buhay ng mga Pilipino.

Magugunitang sanib puwersa sina Locsin at Philippine ambassador to Washington Jose Romualdez para matiyak sana na masusuplayan ang Pilipinas ng 10 million dose ng COVID-19 vaccine mula sa American pharmaceutical company na Pfizer sa buwang ito.

Hindi natutuwa si dating Senador Sergio Osmenia sa performance ng Pangulong Rodrigo Duterte sa pamamahala sa bansa.

Sa katunayan very poor ang rating na ibinigay ni Osmenia sa Pangulo sa istilo ng pamamahala sa bansa at ekonomiya.

Partikular na very poor rating ang ibinigay ni Osmenia sa COVID-19 response ng Duterte administration na kitang kita ang kakulangan kaya’t malabo pang kaagad makabawi ang ekonomiya ng bansa sa taong ito.

Kasabay nito inihayag ni Osmenia na mahihina rin ang mga bagong crop ng mga senador ngayon na takot sa Malakaniyang taliwas sa kanilang panahon noon.