Judith Estrada-Larino

Patay ang isang Nigerian national na umano’y lider ng isang drug group matapos manlaban sa buy-bust operation sa Pasig City.

Kinilala ang napatay na suspek na si Emmanuel Christopher Chukwuma.

Ang nasabing operasyon ay ikatlo na ng Philippine National Police Drug Enforcement Group kung saan, ang unang dalawang operasyon laban kay Hukwuma ay naganap sa Las Piñas at Pampanga.

Nasa 2,000 kilo ng shabu ang nasabat kay Chikwuma na hinihinalang lider ng isang grupo ng Nigerian nationals na sangkot sa operasyon ng ilegal na droga.

Binalaan ng Food and Drug Administration (FDA) ang publiko kaugnay sa pagbili ng cologne spray.

Ito, ayon sa FDA, ay dahil lumalabas sa kanilang post marketing surveillance na walang valid certificate of product notification ang “Pouf! Everyday Bloom Cologne Spray” kaya’t hindi tiyak ang kalidad at kaligtasan sa paggamit nito.

Pinatitiyak sa lahat ng FDA Regional Offices at Regulatory Enforcement Units, katuwang ang mga otoridad na at lokal na pamahalaan, na hindi mabebenta sa merkado ang nasabing produkto.

Kasabay nito, pinayuhan ng FDA ang publiko na tingnan mabuti kung mayroong FDA notification ang anumang produktong nais bilhin para makatiyak na ligtas gamitin ang mga ito.

Tuluyan nang isinara ngayong araw na ito ng MMDA ang dalawang u-turn slots sa EDSA.

Kabilang dito ang mga u-turn slots sa General Malvar Street at Bagong Barrio sa Caloocan City.

Ang mga nasabing u-turn slots ay una nang inanunsyong isasara noong ika pito ng Disyembre subalit inilipat ng ikaapat ng Enero hanggang iniurong sa ikatlong pagkakataon sa ikaw-11 ng Enero o ngayong araw na ito.

Layon ng hakbangin ng MMDA na isara ang dalawang u-turn slots na mapabilis ang pag-commute para sa mga gumagamit sa EDSA carousel buses.

Suportado ng mga grupo ng mga negosyante ang pag amiyenda sa ilang economic provisions ng 1987 Constitution.

Kabilang dito ang may kaugnayan sa ownership at investment opportunities sa mga banyaga partikular na sa telecommunications industry.

Sinabi ni house committee on constitutional amendments chair Alfredo Garbin na 2013 pa lamang ay sumusuporta na sa hakbanging amiyendahan ang ilang economic provisions ang Makati Business Club, Management Association of the Philippines, Employers Confederation of the Philippines, Philippine Mining and Exploration Association at Foundation for Economic Freedom

Bukod pa ito sa American Chamber of Commerce Philippines Incorporated at Joint Foreign Chambers of the Philippines.

Una nang inatasan ni House Speaker Lord Allan Velasco si Garbin na isulong ang pagtalakay sa pag amiyemda sa restrictive provisions ng konstitusyon sa pagbabalik ng kanilang sesyon sa ika-18 ng Enero.

Tiniyak naman ni Garbin na ituturing ng kaniyang komite ng patas at transparent ang panukalang pag amiyenda sa economic provisions tulad ng iba pang panukalang tinatalakay din sa plenaryo ng Kamara.

Walang nalabag na regulasyon o polisiya ang militar sa presensya ng kanilang reservists sa libing ng flight attendant na si Christine Dacera kahapon.

Ayon ito kay Major General Ariel Caculitan, commandant ng marine corps dahil ang mga dumalong uniformed personnel sa funeral rites sa General Santos City ay  pawang reservists na hiniling ng ina mismo ni Christine na si Sharon para tumulong sa pagbibigay ng seguridad kabilang na ang crowd control.

Binigyang diin ni Caculitan na walang military honors sa libing ni Christine bagamat hindi naman ipinagbabawal sa pagtulong ng mga reservist sa pagbuhat sa kabaong ng flight attendant.