Judith Estrada-Larino

Wala pang ebidensyang sa Pilipinas nakuha ng kauna-unahang kaso ng UK variant ng coronavirus.

Ito, ayon kay Dr. Rolly Cruz, head ng Quezon City Epidemiology and Surveillance Unit, ay dahil negatibo naman sa coronavirus disease 2019 (COVID-19) test ang nasabing Pinoy nang umalis ito ng bansa noong ika-27 ng Disyembre at magtungo sa Dubai para sa isang business trip.

Sinabi sa DWIZ ni Cruz na nagsimula na sila ng contact tracing sa nasabing unang kaso, partikular bago ito lumabas ng bansa para mabatid kung saan nito nakuha ang UK variant.

Wala pa tayong evidence na dito niya ‘yon nakuha, kasi negative na sya bago sya umalis, pero itetst natin lahat ng naging close contact nya prior sya umalis within the 14 days na nagpositive sya. ‘Yung mga kapamilya niya, also ‘yung mga nakasalamuha niya, after niyang magpositive, ‘yung mga nag-asikaso sa kanya sa barangay, and also ‘yung mga nasa quarantine facility,” —sa panayam ng Ratsada Balita

Tatagal pa hanggang sa susunod na buwan ang malamig na temperaturang nararanasan sa bansa.

Ayon ito sa PAGASA matapos ipalabas ang tinatayang minimum temperature para sa buwang ito.

Kabilang dito ang 14 hanggang 21°C sa Northern Luzon, 16 hanggang 27 °C sa lowlands Luzon, 9 hanggang 12 °C sa mountainous Luzon, 18 hanggang 24 °C sa Metro Manila, 20 hanggang 25 °C sa Visayas, 19 hanggang 23 °C sa lowlands Mindanao at 15 hangang 17 °C sa mountainous Mindanao.

Para naman sa susunod na buwan papalo mula 10 hanggang 25 °C ang temperaturang mararamdaman sa iba’t ibang bahagi ng bansa.

Handa ang mga miyembro ng gabinete ng Pangulong Rodrigo Duterte na manguna sa pagpapabakuna ng gawang China partikular ang Sinovac

Ito ayon kay Presidential Spokesman Harry Roque, ay para mawala ang takot at pag aalinlangan ng publiko kung ligtas at mabisa ba ang bakunang gawang China.

Sinabi ni Roque, na handa ang lahat ng mga miyembro ng gabinete na magpaturok ng bakuna kontra COVID-19 sakaling maging kuwalipikado sa listahan ng priority ng gobyerno.

Ipinabatid ni Roque, na ang Sinovac ang bakunang pinapaboran ng pangulo maging ang Sputnik V ng Russia kapag naging available na rin ito.

Kasabay nito tiniyak ni Roque, na igigiit niya sa IATF na isama rin sa mga priority na mabakunahan ang mga mamamayang may sakit at mayruong pisikal na kapansanan kahit pa batid niyang mahigpit pa itong pagde debatehan.

Mahigpit na pinababantayan sa publiko ni Congressman Inno Dy ang online hearings ng Kamara kaugnay sa isinusulong na pagamiyenda sa konstitusyon.

Ito ayon kay Dy, ay dahil makakatulong ang pagbabantay sa hearing sa assessment nila sa usapin bukod pa sa huli, ang publiko pa rin ang magpapasya sa magiging resulta ng mga pagkilos para amiyendahan ang Saligang Batas sa pamamagitan ng plebisito.

Sinabi ni Dy, na mas mabuti kung maraming alam ang publiko sa mga proposed amendments para may idea ang mga ito kung kailangan o hindi ang mga itinutulak na pagbabago sa probisyon ng konstitusyon.

Ngayong araw na ito inaasahang masisimulan ng House Committee on Constitutional Amendments ang unang pagdinig sa itinutulak na Cha-Cha.

Muli namang iginiit ni Committee Chairman  Ako Bicol Party List Representative Alfredo Garbin, na tanging economic provisions lamang ng konstitusyon ang kanilang tatalakayon base na rin sa resolusyong inihain mismo ni House Speaker Lord Allan Velasco.

Nagbabala ang Bureau of Customs sa publiko laban sa parcel scam o love scam lalo na ngayong papalapit na rin ang Valentine’s Day o araw ng mga puso.

Ayon sa Customs, ang parcel o love scam ay modus operandi kung saan tatawag o magpapadala ng text message o email sa isang consignee ng cargoes at parcels para humingi ng pera bilang clearance fees umano upang ma-release ang shipments mula sa BOC-NAIA.

Ginagamit din anito sa nasabing modus ang pangalan ng ilang opisyal ng BOC-NAIA.

Nilinaw ng BOC-NAIA, na wala itong hinihinging clearance fees o hindi naniningil ng bayad para sa customs duties and taxes sa pamamagitan ng telepono at hindi rin tumatanggap ng bayad sa money remittance centers o personal bank accounts.

Tumatanggap lamang ang BOC-NAIA ng bayad para sa customs duties and taxes sa pamamagitan ng authorized agent banks o BOC cashiers at maglalabas ng official receipt para sa naturang bayad.

Pinatatawag ng BOC-NAIA sa kanilang assistance hotlines na 095692452626 at 09617594067 para hindi maloko ng scammers.

Pumalag ang Malakanyang sa pahayag ng ilang senador na pag-monopolya ng gobyerno sa pamamagitan ng multi-lateral tripartite agreement.

Ayon kay Presidential Spokesman Harry Roque, walang batayan ang pahayag ng ilang senador dahil uubrang makiisa ang local government units sa proseso sa pamamagitan ng nasabing kasunduan.

Binigyang diin ni Roque na makakabili ang LGU ng bakuna subalit kailangang pumasok sa multilateral agreement ang mga ito para sa advance purchase.

Government to government aniya ang paraan ng pagbili ng Pilipinas ng bakuna sa pharmaceutical companies kayat kailangan din ang go signal ng gobyerno para makabili ang LGU ng sariling bakuna.

Ipinabatid ni Roque na batay sa national vaccination program  ang LGU ang bibili, magbabayad sa lahat ng gastos sa delivery maging ang pagtuturok ng bakuna sa kanilang constituents.

Inaasahang ilalabas ngayong linggong ito ng Department of Tourism (DOT) ang desisyon kung dapat suspindihin o hindi dahil sa paglabag sa health protocols ang hotel sa Makati City kung saan natagpuang patay ang flight attendant na si Christine Dacera.

Ayon ito kay Tourism Secretary Bernadette Romulo-Puyat matapos imbestigahan ang City Garden Grand Hotel sa pagtanggap ng guests para sa leisure purporses kahit may pandemya.

Ika-5 ng Enero nang magpadala ng show-cause order ang DOT sa nasabing hotel para ipaliwanag sa naging hakbangin nito dahil malinaw sa regulasyon na hindi ito maaaring gawin ng mga establishment na ginamit bilang quarantine o isolation facility.

Kasabay nito, hinimok ng national government ang kongreso na magpasa ng mga panukalang mag-eexempt trafficking in persons mula sa anti-wire tapping law, mapalawig ang sakop ng Inter-Agency Council Against Trafficking at mapalakas ito sa pamamagitan ng dagdag na mga tauhan at pondo.

Pinakilos ng Pangulong Rodrigo Duterte ang National Telecommunications Commission (NTC) na pagmultahin ang Internet Service Providers (ISPs) dahil sa kabiguang pigilin ang child pornography.

Ito, ayon kay Cabinet Secretary Karlo Nograles, ay matapos makita ang data hinggil sa na dobleng kaduda-dudang transaction reports na may kaugnayan sa online sexual exploitation sa gitna na rin ng coronavirus disease 2019 (COVID-19) pandemic.

Sa ilalim ng Republic Act 9775, dapat ipaalam ng ISPs sa Philippine National Police (PNP) o National Bureau of Investigation (NBI) sa loob ng pitong araw matapos makakuha ng mga impormasyon at pagkakataon na nagamit ang server o facility nito sa anumang uri ng child pornography.

Nakasaad din sa batas ang pag-iinstall ng lahat ng ISPs ng available technology, program o software para matiyak na maba-block o ma-filter ang access o transmittal sa anumang uri ng child pornography.

Mas may nagawa pa sana ang mga kaibigan ng flight attendant na si Christine Dacera nang magsabi itong nag-iba ang pakiramdam nya at dudang may inilagay na kakaiba sa kanyang inumin.

Ayon ito kay Sharon Dacera, ina ng flight attendant, at partikular na tinukoy nito si Rommel Galido na siyang sinabihan ni Christine sa hinala niyang isang Mark Anthony Rosales ang naglagay ng kung ano sa kanyang drinks.

Sinabi ng ina ni Christine na sana ay dinala ni Galido ang anak sa clinic ng hotel dahil nagsabi itong nahihilo o masakit ang ulo.

Umaapela ang ina ni Christine kay Galido na sabihin na ang totoong nangyari sa nangyari sa anak lalo na’t sinasabi nitong kaibigan at bunsong kapatid ang tingin niya sa flight attendant.

Samantala, naniniwala si Ginang Dacera na ginahasa ang kanyang anak bago ito nasawi taliwas sa nakasaad sa medical report na rupture aortic aneurysm ang ikinasawi ng 23-anyos na flight attendant.