Judith Estrada-Larino

Nawalan na ng kontrol ang dalawang kongresistang kaalyado ni dating House Speaker Alan Peter Cayetano sa ilalim ng liderato ng kamara.

Ito ay matapos matanggal si Anak-Kalusugan Party-list Representative Mike Defensor bilang vice chairman ng limang house committees nang pagbotohan ng mga kapwa kongresista na mapalitan na.

Si Defensor ay pinalitan ni Congresswoman Dahlia Loyola bilang vice chairman ng health committee, Congressman Carl Nicolas Cari para sa committee on public information at Congressman Arnie Fuentebella para sa committee on dangerous drugs.

Pinalitan naman ni Congressman Jake Vincent Villa si Defensor bilang vice chairman ng committee of good government and public accountability at napunta kay Congressman Ian Paul Dy ang vice chairmanship ng special committee on strategic intelligence.

Una nang tinanggal si Defensor bilang chairperson ng house committee on public accounts.

Samantala, inalis din si Camarines Sur Representative Raymund Villafuerte bilang vice chairman ng public accounts committee.

Sinabi ni Villafuerte na tanggap niya ang ginawang pagsibak sa kanila ni Defensor sa komite na patunay aniyang maruming maglaro sa pulitika ang mga kaalyado ni House Speaker Lord Allan Velasco.

Binalaan ni Agriculture Secretary William Dar ang mga negosyanteng nagsasamantala kaya’t lalo pang tumataas ang presyo ng mga gulay.

Sinabi sa DWIZ ni Dar na hindi makatuwirang taasan ang presyo ng gulay kahit pa maraming magsasaka ang naapektuhan ng mga nakalipas na bagyo.

Mayroon na aniya silang ikinakasang economic intelligence para makasuhan ang mga mapagsamantalang negosyante na siyang nagpapatong ng sobra-sobrang presyo at mga trader na siyang nagdadala ng mga produkto sa mga pamilihan.

Itong mga wholesalers, sobrang patong pa bago ibigay doon sa mga vendors d’yan sa mga wet market.
Meron tayong mga isasagawa na talagang economic intelligence para makita natin sino pa ang gumagawa ng sobrang profiteering,” ani Dar. —sa panayam ng Balitang Todong Lakas

Hindi nabago ang mode of transmission matapos ma-detect ang unang kaso ng bagong variant ng coronavirus sa bansa.

Ayon ito sa Department of Health (DOH) bagamat walang mababago o manananatiling epektibo ang ipinatutupad na minimum public health standards para labanan ang pagkalat ng nasabing sakit.

Kaugnay nito, hinimok ng DOH ang local government units na higit na maging alisto at tiyaking mahigpit na nasusunod ang quarantine at isolation protocols.

Ang UK variant ng coronavirus ay na-detect sa isang Pilipino na umuwi ng Pilipinas mula sa United Arab Emirates nitong nakalipas na ika-7 ng Enero matapos umalis ng bansa at magtungo sa Dubai noong ika-27 ng Disyembre dahil sa negosyo.

Susundin ng mga pinuno ng Simbahang Katolika sa bansa ang direktiba ng Vatican kaugnay sa paglalagay ng abo sa Ash Wednesday ngayong taon.

Una nang ipinag-utos ng Vatican na ibudbod na lamang sa halip na ipahid ang abo sa ulo ng mga mananampalataya.

Ipinabatid ni Manila Apostolic Administrator Bishop Broderick Pabillo na hinihintay na lamang nila ang pormal na direktiba hinggil dito ng Catholic Bishops’ Conference of the Philippines  (CBCP) bagamat noong isang taon aniya ay ginawa na rin ito ng mga simbahan.

Ang Ash Wednesday na papatak sa ika-17 ng Pebrero ay hudyat ng pagsisimula ng Holy Week ng mga Katoliko.

Bantay sarado ang lokal na pamahalaan ng Quezon City matapos magpositibo ang isa nilang residente sa UK variant ng coronavirus.

Ang unang kaso ng UK variant sa bansa ay mula sa isang 29-anyos na lalaking Pinoy na nanggaling sa United Arab Emirates (UAE) at dumating sa Pilipinas nitong ika-7 ng Enero.

Ayon sa QC local government unit, kaagad namang nagkasa ng contact tracing ang City Epidemiology and Surveillance Unit (CESU) para sa mga nakasalamuha ng pasyenteng umalis  ng bansa at nagtungo sa Dubai noong ika-27 ng Disyembre dahil sa negosyo.

Hinihintay din ng CESU ang listahan ng mga pasahero sa Department of Health para malaman kung mayroon pang ibang pasaherong residente ng Quezon City.

Kaugnay nito, naghigpit na rin ang Quezon City Police at inatasan ang lahat ng station commanders na paigtingin pa ang pagpapatupad ng lahat ng regulasyon at ordinansa sa lungsod para mapigil ang pagkalat ng UK variant.