Judith Estrada-Larino

Pumapalo na sa 505,939 ang kumpirmadong kaso ng COVID-19 sa bansa matapos madagdag ang 1,862 na bagong infection.

Ipinabatid ng Department of Health (DOH) na Zamboanga City ang nakapagtala ng pinakamataas na bagong kaso ng COVID-19 sa 206, sumunod ang Davao City sa 109, Kalinga – 102, Quezon City – 77 at Benguet – 74

Umakyat na sa 466,993 ang total recoveries matapos maitala sa 765 ang mga bagong gumaling sa nasabing virus samantalang sumampa na sa 10, 042 ang death toll nang madagdag ang 64 na bagong nasawi sa nasabing virus.

Nasa 28, 904 ang naitalang active cases na sumasailalim sa gamutan o quarantine.

Ipinagmamalaki ni ACT-CIS Party-list Representative Niña Taduran ang media workers welfare act na aniya’y itinuturing niyang legacy bilang suporta sa mga kasamahan niya sa media.

Sinabi ni Taduran sa kanyang dating tahanan na DWIZ, hindi nasayang ang kanyang pagtutok para maaprubahan ang nasabing panukala sa kamara at tiwala siyang susuportahan ito ng senado upang tuluyang maging batas.

Ito ang kauna-unahang batas na aking pinanukala nang ako ay maluklok sa pwesto,” ani Taduran.

Ayon kay Taduran, malaki ang maitutulong ng panukala para mabigyan ng tamang pagtrato ang media workers sa pamamagitan ng security of tenure, tamang pasuweldo, benefits at maging ng hazard pay.

I’m so overwhelmed talaga, kasi ito ang profession ko ito ang naging bread and butter ko… Iba kasi ang media, e, tayo mismo ang nagtatanggol ng mga walang benepisyo… tapos mismong tayo ‘di tayo naipagtatanggol… ‘yun ang hindi nila alam,” ani Taduran. —sa panayam ng Balitang Todong Lakas

Mahigit 2,000 Overseas Filipino Workers (OFWs) ang nakalabas ng bansa sa gitna ng coronavirus disease 2019 (COVID-19) pandemic.

Ipinabatid ito ni Labor Secretary Silvestre Bello III, bagamat tuluy-tuloy ang pagpapadala ng Pinoy health workers at caregivers sa iba’t ibang bansa.

Bagamat dapat aniya ay mayroong waiver ang mga ito para walang pananagutan ang gobyerno kapag may nangyari sa mga ito sa pupuntahang bansa.

Inamin ni Bello na ayaw sana nilang magpadala ng OFWs sa ibang bansa subalit gusto ng mga itong magtrabaho doon.

Tiwala ang Presidential Task Force on Media Security (PTFoMS) na tuluyang maisasabatas ang media workers welfare act na una nang inaprubahan sa kamara.

Kasabay nito ay nagpapasalamat si PTFoMS Executive Director Undersecretary Joel Sy-Egco sa mga kongresista at media organizations na sumuporta sa house bill 8140 na lumusot sa kamara sa pamamagitan ng unanimous vote na 218.

Sinabi ni Egco na umaasa siyang mabilis ding aaksyon ang senado at aaprubahan ang naturang panukala kung saan ang counterpart bill ay mismong si Senate President Vicente Tito Sotto III ang pangunahing may akda.

Binigyang diin ni Egco na ang nasabing panukala na nakatoon sa pagtataguyod ng kapakanan ng mga mamamahayag at economic security ay isa sa mga maipagmamalaking landmark measures ng Duterte administration.

Ipinalabas na ng Department of Budget and Management (DBM) ang halos P26-bilyong pondo para sa regular pension ng mga military at uniformed personnel na nasa ilalim ng DND at DILG sa unang quarter ng taong ito.

Sa nasabing pondo, P14.04-bilyon ang mapupunta sa Armed Forces of the Philippines, P10.64-bilyon para sa Philippine National Police, halos P942-milyon para sa Bureau of Fire Protection at mahigit P367-milyon para sa Bureau of Jail Management and Penology.

Ipinabatid ng DBM na ang nasabing pondo ay inilagay sa Pension and Gratuity Fund sa ilalim ng 2021 general appropriations act.

Kinikilala ng DBM ang mahalagang papel na ginagampanan ng mga sundalo, pulis at iba pang uniformed personnel para mapanatili ang kapayapaan sa bansa.

Target ng Liberal Party na makapagrecruit ng 75,000 bagong miyembro at volunteer para sa 2022 local at national elections.

Ipinabatid ito ni LP President Senador Francis Kiko Pangilinan bilang mensahe sa Facebook sa ika-75 anibersaryo ng partido.

Tiniyak ni Pangilinan ang patuloy na commitment ng LP para maipaglaban ang mga prinsipyo at adbokasiya ng partido pulitikal.

Simula nang maging pangulo ng LP noong 2016, ipinagmalaki ni Pangilinan ang mga nakakamit nilang pag-asa at binubuksan nila ito sa mga ordinaryong mamamayan na mayroong parehong adbokasiya para sa magandang kinabukasan ng bansa.

Pinapurihan ni Pangilinan ang 106 LP chapters sa pagtugon sa pangangailangan ng publiko nang hindi alintana ang banta ng COVID-19 pandemic.

Hindi na kailangan ang pagkansela sa kasunduan ng Department of National Defense (DND) at University of the Philippines (UP) hinggil sa pagbabawal sa mga otoridad na makapasok sa UP Campus.

Binigyang diin ito ni UP President Danilo Concepcion matapos mag-alala sa nasabing pasya ng DND na tiyak ding makakaapekto sa relasyon ng magkabilang panig at lilihis sa kapwa nais nilang pagsusulong ng kapayapaan, hustisya at kalayaan sa bansa.

Ayon kay Concepcion, nabuo ang kasunduan mula sa respeto sa isa’t isa ng magkabilang panig na napanatili naman sa loob ng tatlong dekada sa pamamagitan nang pagsunod dito.

Hindi aniya naging hadlang ang kasunduan sa pagsasagawa ng legal na operasyon ng mga otoridad sa loob ng mga campus ng up at anumang hindi pagkakaintindihan o problema sa pagitan ng dalawang panig ay maayos namang nareresolba.

Magdudulot ng takot sa halip na kapayapaan ang ginawang pagkansela ng Department of National Defense (DND) sa kasunduan nito sa University of the Philippines (UP) na nagbabawal sa presensya ng mga sundalo at pulis sa UP Campus nang walang pasabi.

Pananaw ito ni Vice President Leni Robredo na nagsabing hindi naman mahirap o mali ang nasabing kasunduan na dumaan na sa limang administrasyon simula nang malagdaan ito noong 1989, para maprotektahan ang UP community at ang bansa.

Ang usapin aniya ay may kinalaman sa simpleng law enforcement kung saan nakasaad sa kasunduan ang pagbibigya ng notice sa university officials bago magsagawa ng anumang operasyon sa UP Campus.

Binigyang diin ni Robredo na ang hakbang ay maituturing na symbolic para maghasik ng pangamba at busalan ang mga kritisismo laban sa gobyerno.

Dahil dito, hinimok ni Robredo ang publiko na magsalita at tutulan ang naturang hakbangin.

Ang bise president ay nagtapos ng economics sa UP Diliman.