Judith Estrada-Larino

Nagpositibo sa coronavirus disease 2019 (COVID-19) ang tatlo sa anim na turista na unang inaresto matapos magpresenta ng pekeng RT-PCR test results sa pagpasok ng mga ito sa Boracay.

Kasunod na rin ito nang pagsailalim sa swab test ng mga naturang indibidwal sa molecular laboratory sa Aklan Provincial Hospital kung saan lumabas na positibo ang tatlo sa COVID-19.

Ang mga bagong kaso ay kinabibilangan ng dalawang babae at isang lalaki na kasalukuyang naka-quarantine sa isang hotel sa Lalibo.

Nabatid na walang booking sa accredited hotel sa Boracay ang grupo ng anim na turistang kinabibilangan ng isang makeup artist, crew, entertainment manager at TV show dancer.

Ang isang babae naman ay nagtatrabaho sa isang pribadong kumpanya.

Pinaniniwalaang nag-avail ng home service para sa COVID-19 testing ang naturang mga turista na posibleng pinapatakbo ng sindikato na kayang magsagawa ng negatibong resulta ng RT-PCR test.

Tinawag na insulto ng pangulo ng Pamantasan ng Lungsod ng Maynila (PLM) ang claim ng militar na isa ito sa mga unibersidad na nagrerecruit ng mga estudyante para maging kasapi ng New People’s Army (NPA).

Ayon kay PLM President Emmanuel Leyco, malaking insulto sa kanilang faculty, masisipag na staff at magagaling na estudyante na inihahanda nila para maging lider ng bansa tungo sa maunlad na Pilipinas.

Sinabi ni Leyco na hindi katanggap-tanggap ang nasabing akusasyon sa gitna na rin nang pagpupursige ng education sector partikular ng PLM Community na makaagapay sa mga hamon ng online education.

Binigyang diin ni Leyco na hindi sila aware o wala silang alam sa anumang recruitment ng CPP-NPA sa loob ng campus at hindi rin sila nasabihan o nabalaan ng mga otoridad hinggil sa mga umano’y aktibidad ng mga makakaliwa.

Buo aniya ang passion nila para sa public service lalo na’t ang mga pinakahuling graduates nila ay medical doctors na bahagi ng medical frontliners sa Maynila bukod pa sa mga nagseserbisyo sa gobyerno bilang mambabatas, nasa hudikatura at maging nasa executive branch.

Pag-uusapan na bukas ng gabi, ika-26 ng Enero, ang mga alkalde sa Metro Manila kung uubra nang maisailalim sa modified general community quarantine (MGCQ) ang mga lungsod sa National Capital Region (NCR).

Ayon ito kay Parañaque City Mayor Edwin Olivarez, pinuno ng Metro Manila Council kung saan nasa GCQ ang kalakhang Maynila hanggang sa ika-31 ng Enero.

Sinabi sa DWIZ ni Olivarez na kailangang makita munang pababa ang kaso ng coronavirus disease 2019 (COVID-19) sa Metro Manila bago bahagyang paluwagin ang quarantine status kasama na rin ang pag-apruba ng IATF na makalabas na ang mga batang 10-taong gulang hanggang 65-taong gulang.

Partikular aniya nilang tututukan kung talaga bang nakapasok na sa bansa ang UK variant at kung anu-ano pa ang mga paraang gagawing prevention bago mag MGCQ ang Metro Manila sa tulong na rin ng medical experts. —sa panayam ng IZ sa Alas Sais

Patuloy na hinihimok ng Philippine Red Cross (PRC) ang mga kuwalipikadong pasyente na gumaling sa coronavirus disease 2019 (COVID-19) na magdonate ng blood plasma para makatulong sa paggaling ng mga COVID-19 patients.

Sinabi ni Dr. Monina Nalupta, pinuno ng PRC National Blood Services, na umaabot na sa 614 ang mga pasyenteng nabigyan nila ng convalescent plasma.

Ilang pribadong kumpanya na aniya at ahensya ang nakipag-ugnayan sa kanila para sa blood donation.

Gumagamit ng convalescent plasma therapy ang medical experts sa Philippine General Hospital, St. Lukes Medical Center at Lung Center Of The Philippines para tulungan ang mga pasyenteng nagpositibo sa COVID-19.

Tiyak na gumugulong na ang vaccination program ng Pilipinas kontra coronavirus disease 2019 (COVID-19) kasabay ng mga kapitbahay na bansa tulad ng Singapore, Indonesia at Thailand, kung naging tapat lamang ang mga nakatalagang opisyal ng gobyerno.

Binigyang diin ito ni Vice President Leni Robredo na nagsabing kinailangan pang magkaroon ng congressional hearing para malinawan ang mga detalye ng pagbili ng COVID-19 vaccine ng bansa.

Sinabi ni Robredo na ang kawalan ng ‘transparency’ o pagiging tapat ng ilang opisyal din ang dahilan kung bakit marami pa ring hindi nagtitiwala sa bakuna.

Lumalabas sa Pulse Asia Survey na 50% lamang ng mga Pilipino ang hindi interesadong magpaturok ng COVID-19 vaccine na hindi sapat lalo na kung target ng gobyerno na maabot ang herd immunity ngayong taon.

Muling iginiit ni Vice President Leni Robredo ang kahandaang maunang magpabakuna kontra coronavirus disease 2019 (COVID-19).

Kasunod na rin ito ng hamon ni Senador Bong Go kay Robredo na sabayan ang Pangulong Rodrigo Duterte sa pagpapabakuna.

Sinabi ni Robredo na hindi na niya kailangang hamunin dahil noong isang buwan pa lamang ay nagvolunteer na siyang maunang magpabakuna kung makakatulong ito para maibalik ang tiwala ng publiko sa pagpapabakuna.

Subalit iginiit ni Robredo ang pagpapabakuna muna ng Pangulong Duterte na bilang lider ng bansa ay mas malaki ang hatak sa kumpyansa ng publiko.

Nagsimula nang tumanggap ngayong araw na ito ng laway o saliva sample ang dalawang laboratoryo ng Philippine Red Cross (PRC) bilang alternatibo sa swab test para sa coronavirus.

Ipinabatid ito sa DWIZ ni dating Health Secretary Paulyn Ubial, pinuno ng biomolecular laboratories ng PRC, matapos payagan ng Department of Health (DOH), ang saliva test na nasa mahigit 98% aniya ang accuracy para ma-detect kung may coronavirus ang isang tao.

Sinabi ni Ubial na nakapag-comply sila sa panel ng DOH nang maglatag sila ng mahigit 100 sample ng saliva at napatunayan naman ang pagiging epektibo nito.

Magbubukas ang dalawang lab namin dito sa Manila, sa Mandaluyong at Port Area Manila, ng 8a.m. at tumatanggap na po kami ng saliva samples,” ani Ubial. —sa panayam ng IZ sa Alas Sais

Tiniyak ni Labor Secretary Silvestre Bello III na masusi nilang pag-aaralan ang anumang petisyon para sa dagdag-sahod ng mga manggagawa.

Sinabi sa DWIZ ni Bello na kailangan ding masusing tingnan ang kakayahan ng mga employer na magdagdag ng suweldo sa kanilang mga manggagawa o maitaas ang minimum wage.

Kung sakaling matanggap na natin ang petisyon ay pag-aaralan naing mabuti kung irerekomenda ba namin sa kongreso na itaas ang sweldo,” ani Bello. —sa panayam ng Balitang Todong Lakas

Bukas na bukas sa paghahain ng wage increase petition ang Trade Union Congress of the Philippines (TUCP).

Subalit, inamin sa DWIZ ni TUCP Spokesman Allan Tanjusay na hindi pa napapanahon ang paghahain ng petisyon sa dagdag-sweldo dahil maraming kumpanya ang sarado pa.

Sa halip, ipinabatid ni Tanjusay na nakikiusap sila sa Pangulong Rodrigo Duterte na paigtingin ang kampanya ng gobyerno laban sa mga hoarders na siyang nagpapataas ng presyo ng bilihin kaya’t nahihirapan ang mga manggagawa na mag budget para sa kanilang pamilya.

Malinaw aniyang harap-harapan ang paglabag ng traders sa price freeze na pinaiiral.

Meron kaming pakiusap kay Pangulong Duterte na ibibigay namin sa kanya sa pamamgitan ng sulat. Pangunahing nilalaman ng sulat ay paigtingin ang kampanya ng gobyerno laban sa profiteering, sa mga nagho-hoard,” ani Tanjusay. —sa panayam ng Balitang Todong Lakas