Judith Estrada-Larino

Sasagutin ng Pangulong Rodrigo Duterte sa kanyang ulat sa bayan mamayang gabi ang mga batikos kaugnay sa pagbabakuna kontra COVID-19 ng mga miyembro ng Presidential Security Group (PSG).

Ipinabatid ito ni Senador Christopher ‘Bong’ Go bagamat tumangging sabihin kung ano ang posibleng ihayag ng pangulo hinggil sa nasabing kontrobersya.

Ang tanging sinabi ni Go ay importante ang buhay ng pangulo, iisa ang buhay nito at kailangan ng pangulo ng aniya’y mga tunay na nagmamalakasakit sa mga pilipino.

Magugunitang mismong ang pangulo ang nagbunyag na halos lahat ng sundalo ay nabigyan na ng China made COVID-19 vaccine mula sa Sinopharm na kinontra naman nina Senador Richard Gordon at Franklin Drilon.

Hinala ng dalawang senador may pinagtatakpan ang PSG sa iligal na pagpasok at administrasyin ng nasabing bakuna kontra COVID-19. —ulat mula kay Cely Ortega-Bueno (Patrol 19)

Magtatakda ang Manila City government ng apat na lugar para i-accommodate ang mga deboto na dadalo sa misa sa Quiapo Church para sa kapistahan ng Itim na Nazareno sa ika-9 ng Enero.

Ipinabatid ni Manila Mayor Isko Moreno na kabilang sa mga itinalagang lugar na ito ang Villalobos, Carriedo, Hidalgo at Plaza Miranda, bilang konsiderasyon na rin sa Simbahang Katoliko sa mga pagtitipon nito sa gitna ng coronavirus disease 2019 (COVID-19) pandemic.

Mamahagi rin aniya ang city government ng face mask at face shield sa mga deboto sa loob ng Quiapo Church.

Una nang inihayag ni Fr. Douglas Badong, spokesman ng Quiapo Church na hindi na muna kabilang sa pagdiriwang ng kapistahan ng Itim na Nazareno ang prusisyon at salubong o pahalik para maiwasan ang COVID-19 transmission.

Umaapela ang National Democratic Front of the Philippines (NDFP) sa ibang bansa na magsalita laban sa anito’y ‘misdesignation’ ng Duterte administration sa Communist Party of the Philippines-New People’s Army (CPP-NPA) bilang terror groups sa pamamagitan ng anti-terrorism council.

Binigyang diin ng NDFP na ang armadong pakikibaka ng mga Pilipino ay kinikilala ng domestic at foreign groups bilang lehitimong pag-aaklas laban sa mapanupil na hakbangin.

Partikular na tinatawagan ng NDFP na kumontra sa pag-tag ng Duterte goverment bilang terror group sa CPP-NPA ang mga bansang Amerika, European Union, New Zealand, Australia at United Kingdom.

Ayon sa NDFP, ang pagbura sa CPP-NPA mula sa terror list ng mga dayuhang bansa ay makatutulong sa mga Pilipino at human rights advocate para ilalaglag ang fascist dictatorship na pinaiiral ng gobyernong Duterte at para na rin maitakda ang mga kondisyon para sa muling pagbubukas ng peace talks sa pagitan ng pamahalaan at NDFP.

Dapat magkaroon ng pormal na reklamo bago imbestigahan ng National Bureau of Investigation (NBI) ang mga napaulat na pagbebenta ng hubad na larawan ng ilang estudyante online, para umano may ipantustos sa distance learning.

Binigyang diin ito sa DWIZ ni NBI Spokesman Deputy Director Ferdinand Lavin.

Sinabi sa DWIZ ni Lavin na kailangang manggaling mismo sa mga magulang o mga biktima ang reklamong sexual exploitation para kaagad nilang maaksyunan.

Kailangan magreklamo po ang victim para matibay ang ating imbestigasyon… ‘Yun pong customer, dapat [magreklamo] at itong nagpakita [ng mga sensitive parts], kung ito ay menor edad, dapat silang guardian o parents ay magreklamo rin dito,” ani Lavin.

Tiniyak ni Lavin ang pag-a-update sa imbestigasyon at paglalabas ng rekomendasyon sa nasabing usapin.

From time-to-time we will be reporting to the secretary of Justice,” ani Lavin. —sa panayam ng Santos at Lima sa 882

Hindi kailangang magbanta ng Pangulong Rodrigo Duterte na tutuldukan ang Visiting Forces Agreement (VFA) sa Amerika kapag nabigo itong magbigay ng coronavirus disease 2019 (COVID-19) vaccines sa Pilipinas.

Ayon ito kay Vice President Leni Robredo dahil maayos naman aniya ang programa ng Pilipinas pagdating sa pagbili ng mga bakuna kontra COVID-19.

Binigyang diin ni Robredo na maraming bagay na hindi kailangan sa mga panahon ngayon tulad na lamang nang pakikipag-away na wala namang basehan dahil hindi naman aniya ito nakakatulong sa problemang kinakaharap ng bansa sa gitna ng pandemya.

Sa ngayon aniya ay tuloy ang diyalogo sa pagitan ng Pilipinas at Pfizer, Moderna at iba pang manufacturers para sa suplay ng COVID-19 vaccines.

Sinabi ni Robredo na ang dapat gawin ng gobyerno ay tutukan na lamang ang pagbibigay ng mahahalagang impormasyon sa publiko hinggil sa vaccination program sa halip na magbanta sa iba pang bansa para mapakampante ang publiko sa hinihintay na bakuna kontra COVID-19.

Una nang itinanggi ng Malacañang na bina-blackmail ng pangulo ang Amerika sa pagsasabi na iginigiit lamang ng chief executive ang independent foreign policy ng Pilipinas.