Prayoridad ng Aklan Provincial Health Office ang staff ng Kalibo International Airport para sa coronavirus disease 2019 (COVID-19) testing.
Kasunod na rin ito nang pagpapatigil sa mass testing ng hotel workers sa Boracay Island matapos magpositibo sa COVID-19 ang walong empleyado ng Kalibo International Airport.
Una nang naisalang sa mass testing ang 80% ng 1,400 hotel workers sa Isla ng Boracay.
Ang Aklan ay nakapagtala ng 451 infections, 66 rito ay active cases samantalang 15 ang nasawi.
Interesado si Retired 6 Division Champion Oscar Dela Hoya na makasagupa sa ikalawang pagkakataon si Floyd Mayweather, Jr. sakaling magbalik ito sa boxing ring.
Sinabi ni Dela Hoya na nais niyang lumaban sa isang tunay na boxing match at hindi exhibition lamang.
Maliban kay Floyd, Jr. ipinabatid ni Dela Hoya na pag iisipan pa niya ang posibilidad na harapin ang kababayang si Saul Canelo Alvarez.
Huling nagsagupa sa ibabaw ng ring sina Dela Hoya at Mayweather noong 2007 kung saan nagwagi ang Amerikano sa pamamagitan ng split decision para makuha ang WBC World Junior Middleweight title.
2017 nang mag retiro si Mayweather matapos pilayan si mixed martial arts superstar Conor Mcgregor.
Personal na bumisita si PNP Chief General Debold Sinas sa burol ng tinaguriang hero cop na si Police Corporal Dexter Rey Teves.
Si Teves ay nasawi matapos maka-engkuwentro ang dalawang drug suspects sa Caloocan City habang nagsasagawa ng oplan sita.
Nagpaabot ng pakikiramay si Sinas sa pamilyang naulila ng pulis.
Personal ding iniabot sa naulilang pamilya ni Teves ang tulong pinansyal mula sa PNP.
Magdamag na bumuhos ang malakas na ulan na may kasamang malakas na hangin sa Southern Quezon.
Pasado alas 2:00 kaninang madaling araw nang umapaw ang ilog sa barangay Sta. Cecilia sa Tagkawayan, Quezon kaya’t binaha ang ilang bahagi ng lugar kung saan pinasok din ng baha ang ilang bahay.
Binaha rin ang ilang lugar sa bayan ng bayan ng Lopez, sa Maharlika Highway sa Gumaca nagkaroon naman ng pagguho ng lupa at bato na kaagad nalinis ng lokal na pamahalaan.
Kanselado naman ang biyahe ng mga pampasaherong bangka patungo sa mga isla ng Alabat at Polillio samantalang may mga pasaherong stranded sa Atimonan Port at Real Port.
Nagpatuloy ang sama ng panahon hanggang kaninang umaga.
Hindi sumuko ang mga Pilipino sa kabila ng napakaraming pagsubok na pinagdaanan ng bansa sa taong 2020 kabilang ang mga sakuna at kalamidad.
Binigyang diin ito ni Vice President Leni Robredo bilang mensahe ngayong bagong taon.
Sa pagkakataong ito aniya ay muling napatunayan na walang Pilipinong nag-iisa at hindi kayang pasukin ng 2020 ang mga Pilipino.
Sa pagsalubong sa bagong taon sinabi ni Robredo na magiging mas malalim ang pagdiriwang at mas maluwang ang pahinga sa pagsasara ng taong 2020.
Ipinaalala ng Bise Presidente na hindi pa mawawala ang virus sa pagpapalit ng kalendaryo kaya’t hinihimok niya ang bawat Pilipino na patuloy na mag-ingat at sumunod sa health protocols.
Humabol pa ang magandang pamaskong regalo ngayong New Year sa isang mananaya ng lotto sa Baguio City.
Ito ay matapos magwagi ang nasabing bettor ng mahigit P20-M na jackpot prize sa Megalotto 6/45.
Ayon sa PCSO nakuha ng nasabing bettor ang winning numbers combination na 6, 25, 15, 29, 12 at 23 sa megalotto draw kagabi.
Ang winning ticket ay binili sa lotto outlet sa Benguet.
Naharang ng immigration officer ang pagpasok sa bansa ng tatlong pasaherong may travel history sa ilang bansang kabilang sa ikinakasang travel ban para hindi kumalat ang bagong variant ng coronavirus sa bansa.
Ayon ito kay Immigration Spokesman Dana Sandoval kaya’t kaagad pinabalik sa kanilang pinagmulang bansa ang mga nasabing dayuhan.
Sinabi ni Sandoval na kahit hindi direktang nanggaling sa bansang nasa travel ban list subalit nanggaling doon sa nakalipas na labing apat na araw hindi pa rin papapasukin sa Pilipinas ang mga ito.
Ipinabatid ni Sandoval na puspusan ang pagsasagawa nilang passport inspection para matiyak na hindi nagmula ang sinumang darating sa bansa na nag biyahe sa mga bansang nakapagtala na ng bagong variant ng coronavirus.
Gayunman nilinaw ni Sandoval na hindi naman itataboy ang Pilipinong darating sa bansa mula sa 20 bansa kasama sa listahan nang pinaiiral na travel ban subalit ire-refer sila sa one stop shop para sa mahigpit na pagpapatupad ng 14 day quarantine.
Kasado na ang pagsasama ng sex education sa online learning modules ngayong school year.
Ipinabatid ni Undersecretary Juan Antonio Perez III, Executive Director ng Commission on Population and Development (POPCOM), Oktubre pa lamang ay nagsasagawa na ang Department of Education (DepEd) ng mga sesyon at diskusyon sa kanilang regional offices kaugnay sa pagsasama ng sex education sa mga bagong learning modalities.
Ang sex education topic ay isasama sa modules na ginagamit ng mga mag-aaral sa Ilocos Region, Central Visayas at Davao Region.
Sinabi ni Perez na lumalabas sa datos na mataas ang adoslescent pregnancy o mga menor de edad na nabubuntis sa mga nasabing lugar lalo na sa Region 11.
Una nang inihayag ng POPCOM na inaasahang papalo sa halos 111-M ang populasyon ng bansa sa susunod na taon dahil sa inaccessible reproductive health services sa gitna ng COVID-19 pandemic.
Nakapagtala na rin ng kaso ng bagong variant ng COVID-19 sa California, USA.
Inanunsyo ito mismo ni California Governor Gavin Newsom na nagsabi ring ang nasabing kaso ay na-detect sa Southern California.
Ayon naman kay Dr. Anthony Fauci Director ng National Institute of Allergy and Infectious Diseases maaaring sa mga susunod na araw ay magkaroon na rin ng kaso ng bagong COVID-19 variant sa iba pang estado lalo pa at mas mabilis itong makahawa.
Gayunman inihayag ni Fauci na wala namang indikasyon na mas deadly ang bagong strain ng coronavirus.
Nagpaliwanag ang PhilHealth kaugnay sa nakaambang pagtataas ng buwanang kontribusyon matapos batikusin ang nasabing hakbangin.
Ayon sa PhilHealth para sa taong 2021 ipatutupad ang adjustment sa contribution at income ceiling upang matiyak ang sapat na pondo ng ahensya na inilalaan sa benepisyong medikal ng 110 milyong miyembro nito.
Binigyang diin ng PhilHealth na ang pagtataas ng kontribusyon ay nakasaad sa Republic Act 11223 o Universal Health Care Law.
Ipinabatid pa ng PhilHealth na mas marami naman ang magiging pakinabang ng kanilang mga miyembro sa ilalim ng UHC law.
Umaapela ang PhilHealth sa publiko na pagtiwalaan ang bagong pamunuan ng ahensya para ipatupad ang mga reporma at baguhin ang sistema.
Tiniyak din ng PhilHealth na ang pinaghihirapang kontribusyon ng mga miyembro ay mapupunta naman sa mga benepisyo.