Judith Estrada-Larino

Kasado na ang isasagawang repatriation ng Department of Foreign Affairs (DFA) sa Dubai, bukas.

Gayunman, sinabi ni Consul General Paul Raymund Cortes na iilang Overseas Filipino Workers (OFWs) lamang ang mag-aavail sa nasabing flight dahil sa mahigpit na mga panuntunan sakaling umalis muli sila ng Pilipinas.

Ayon kay Cortes, pumapalo sa 8,000 request para sa repatriation ang kanilang natanggap.

Ang sweeper flight ay nakatakdang umalis ng Dubai bukas ng 11:45 ng umaga pa-Manama sa Bahrain para sunduin ang mga OFW bago tuluyang lumipad pa-Maynila at inaasahang darating ng alas-4 ng madaling araw ng ika-1 ng Enero.

Priority ang mga OFWs na mayroon ng expired visit visas at kanseladong residency visas gayundin din ang mga walang sapat na pondo para sa plane tickets.

Nagbabala ang Philippine National Police (PNP) sa pekeng Facebook account ni PNP Chief General Debold Sinas na ginagamit para mangikil ng pera.

Naglabas ng screenshots ang PNP ng pekeng Facebook account kasama ang pakikipag-usap ng nagpapanggap na PNP sa isang ginang na namatayan ng pulis na asawa.

Humihingi ng tulong ang ginang para mairelease na ang pensyon at death claims para sa nasawi niyang mister.

Sa nasabing pag-uusap, sinabi ng nagpapanggap na Sinas na tutulungan niya ang ginang subalit dapat ayusin niya o bigyan ng pera ang mag-aayos ng kaniyang concern.

Ayon sa PNP, nakipag-ugnayan na sila sa computer forensics para mahanap ang nasa likod ng pekeng account at makasuhan ito ng paglabag sa anti-cybercrime act.

Pinayuhan din ang mga netizen na maging maingat sa paggamit at pagpapadala ng mensahe sa social media.

Ibinunyag ni Defense Secretary Delfin Lorenzana na smuggled ang coronavirus disease 2019 (COVID-19) vaccine na itinurok sa mga miyembro ng Presidential Security Group (PSG).

Ayon kay Lorenzana, hindi otorisado ang pagpasok sa bansa ng mga nasabing bakuna na tanging ang Food and Drug Administration (FDA) lamang ang mayroong otorisasyon sa pagpasok at paggamit ng mga COVID-19 vaccines.

Sinabi ni Lorenzana na hindi siya papayag na maturukan ng bakuna laban sa COVID-19 ang mga sundalo ng Armed Forces of the Philippines hangga’t walang otorisadong bakuna.

Walang basbas ng Pangulong Rodrigo Duterte ang pagpapabakuna ng mga tauhan ng Presidential Security Group (PSG) laban sa coronavirus disease 2019 (COVID-19).

Ito, ayon kay PSG Commander Brigadier General Jesus Durante III, ay dahil hindi naman sila humingi ng permiso sa pangulo bago isinagawa ang pagpapabakuna kaya’t nagulat na lamang ito sa nangyari.

Sinabi ni Durante na sila-sila lang sa PSG ang nag-administer ng bakuna sa pamamagitan ng kanilang medical team.

Ang mga close-in security aniya ng pangulo ay tumanggap na ng dalawang dose ng bakuna noon pang Setyembre at hindi nito tinukoy kung saan galing ang nasabing bakuna.

Napasakamay na ng unang batch ng mga pensioner ng Social Security System (SSS) ang kanilang pensyon para sa January 2021.

Maagang naipasok ang pensyon sa pamamagitan ng PESONet (Philippine EFT System and Operations Network) at iba pang checkless disbursement channels.

Simula kahapon, December 29, natanggap na ng mga pensioner ang kanilang pensyon kung saan ang petsa nito ay sa pagitan ng ika-1 hanggang ika-15 ng buwan.

Tinatayang aabot sa P1.5-milyon ang halaga ng unang barch ng January 2021 pension releases ng SSS.

Ang second batch naman ng January 2021 pensions ay matatanggap simula sa January 15.

Tinupok ng apoy ang isang bodega sa Marilao, Bulacan at residential area sa Quezon City.

Nasa 100 pamilya ang nawalan ng bahay sa sunog sa Luzon Avenue sa  Barangay Culiat, Quezon City mag-aalas-10 kagabi.

Umabot ng ikalimang alarma ang nasabing sunog na nagmula sa live wire ng isang 2-palapag na bahay sa Luzon Avenue.

Naitala ang danyos sa P75,000.

Samantala, nilamon ng apoy ang dalawang bodega ng iba’t ibang produkto sa Barangay Prenza sa Marilao.

Umabot ng ikalawang alarma ang nasabing sunog na under control, pasado ala-1 ng madaling araw.

Iniimbestigahan na ng mga otoridad ang dahilan ng mga nasabing sunog.

Umaapela ang grupo ng health professionals sa gobyerno na maging transparent sa usapin ng coronavirus disease 2019 (COVID-19) vaccines.

Ayon sa Healthcare Professionals Alliance Against COVID-19 (HPAAC), nakakaalarma ang pagpapaturok ng mga sundalo ng bakunang hindi pa rehistrado sa Food and Drug Administration (FDA).

Sinabi ng HPAAC na mahalagang maging transparent ang pamamahagi ng bakuna kapag naaprubahan na ito dahil nangangailangan ang bakuna ng mabusising storage at transportation.

Apela ng grupong binubuo ng mahigit 160 health profession organizations na tugunan ng gobyerno ang mga concern kaugnay sa bakuna ng mga miyembro ng Presidential Security Group at gabinete na pangunahing usapin dito.

Nanawagan ang Pangulong Rodrigo Duterte ng pagkakaisa at pagiging makabayan ng mga Pilipino na magdudulot ng pagbabago sa buong bansa ngayong araw na ito.

Bahagi ito ng virtual message ng pangulo sa flag raising at wreath laying ceremony sa Rizal Park kaugnay sa paggunita ng ika-124 na anibersaryo ng kabayanihan ng pambansang bayaning si Dr. Jose Rizal.

Ayon sa pangulo, nakikiisa siya sa paggunita ng kabayanihan ni Rizal at ang mga hamong kinakaharap ng bansa ngayong taon ay nag resulta sa pag-usbong ng mga bagong bayani na nagpakita ng katapangan sa gitna ng mga pagsubok.

Hinimok ng pangulo ang mga Pilipino na patuloy na magkaisa para magkaruon ng tunay at makabuluhang pagbabago sa bansa.

Samantala, pinangunahan naman nina Manila Mayor Isko Moreno at Defense Secretary Delfin Lorenzana ang nasabing paggunita.

Isang programa rin ang isinagawa sa Rizal Park, sa pangunguna nina Moreno at Lorenzana na kapwa nag alay din ng bulaklak sa bantayog ni Rizal.

BASAHIN: Mensahe ni Pangulong Rodrigo Duterte ngayong Rizal Day https://t.co/HHOy7zaafm pic.twitter.com/94aq3D6LUw

— DWIZ Newscenter (@dwiz882) December 30, 2020