Judith Estrada-Larino

Ipatutupad ng Department of Public Works and Highways (DPWH) ang lahat ng mga hakbangin para mabawasan o tuluyang buwagin ang korupsyon sa ahensya, batay na rin sa mahigpit na utos ng Pangulong Rodrigo Duterte.

Tiniyak ito ni DPWH Secretary Mark Villar kung saan kabilang sa ipinag-utos ng pangulo ang pag-reshuffle sa district engineers.

Sinabi ni Villar na kakausapin niya sa susunod na linggo ang mga sinibak ng Pangulong Duterte na district engineers.

Hiningi aniya sa kanya ng pangulo ang listahan ng lahat ng district engineers sa bansa matapos ibunyag ang pakikipagsabwatan ng ilan sa mga ito sa kongresista para sa katiwalian.

Binalaan ni Villar ang mga district engineers ng matinding parusa kapag napatunayang sangkot sa korupsyon.

Sinita ng Department of Trade and Industry (DTI) ang ilang firecracker vendors sa Bocaue, Bulacan dahil sa pagbebenta ng ilang paputok na hindi rehistrado.

Sa pag-iikot ng DTI team sa pangunguna ni DTI Consumer Protection Undersecretary Ruth Castelo, hindi nakalusot ang mga vendors dahil kinumpiska ng mga otoridad ang mga ibinibentang paputok na dapat ay mayroong label kung saan ito nagmula at PS mark ng ahensya.

Kasama sa team na nag-ikot ay mula sa Bureau of Fire Protection na nagpaalala sa vendors na dapat maglagay ng drum na may tubig sa tabi ng mga puwesto para kaagad maapula sakaling magkaroon ng sunog.

Bitbit naman ng Philippine National Police ang listahan ng mga ipinagbabawal na paputok tulad ng “thunder” at “baby dynamite”.

Una nang humihirit ang mga negosyante ng paputok na huwag muna silang ipasara dahil maraming manggagawa nila ang mawawalan ng trabaho.

Halos 2-milyon na ang naturukan ng unang dose ng coronavirus disease 2019 (COVID-19) vaccines sa Amerika.

Ayon sa US Centers for Disease Control and Prevention, mahigit 11-milyong doses na ng bakuna ang naipamahagi mula sa Moderna at Pfizer/BioNTech.

Ipinabatid ng US CDC na mahigit 100,000 bagong kaso ng COVID-19 ang naitatala sa Amerika kung saan mahigit 1,000 naman kada araw ang nasasawi dahil sa COVID-19.

Mahigpit na nagbabala ang Bangko Sentral ng Pilipinas (BSP) laban sa mga pekeng pera.

Kasunod na rin ito nang pagsalakay ng mga otoridad sa isang pagawaan ng pera sa Sampaloc, Maynila.

Ayon sa BSP, tatlong bagay ang kailangang gawing para matukoy kung peke ang perang hawak.

Una ay salatin, tingnan at itagilid ang pera kung saan, ang tunay na pera ay maaaring masalat ang security paper, embossed prints at tactile marks.

Makikita rin ng malinaw ang watermark, security fiber, asymmetric serial number at see-through mark ang tunay na pera.

At kapag nakatagilid, makikita ang security thread, concealed value, optically variable ink at enhanced value panel para sa P500 at P1, 000 at optical variable device patch.

Nagpaalala ang BSP sa publiko na ugaliing i-check ng mabuti ang bank notes para maiwasang makakuha o makatanggap ng pekeng pera.

Umalma ang ilang kongresistang tinukoy ng Pangulong Rodrigo Duterte na may kickback sa mga proyekto ng Department of Public Works and Highways (DPWH).

Tinawag na “grossly unfair” ni Occidental Mindoro Representative Josephine Ramirez-Sato ang pagkakasama niya sa nasabing listahan dahil walang ginawang imbestigasyon sa anumang proyekto sa kanilang lalawigan ang Presidential Anti-Corruption Commission (PACC) anumang ahensya ng gobyerno.

Itinanggi rin ni Northern Samar Representative Paul Daza ang pagkakasangkot sa korupsyon dahil maaaring mga kalaban niya sa local politics ang nagbigay ng libelous information sa PACC.

Binigyang diin naman ni Ifugao Representative Teddy Baguilat, Jr. na hindi sana siya naghihirap at tumutulong magbenta ng Cordillera products kung tumatanggap siya ng kickback.

Isabela 4th District Representative Alyssa Sheena Tan itinanggi ring sangkot sa korupsyon

Itinanggi ni Isabela 4th District Representative Alyssa Sheena Tan ang paratang na korupsyon sa kanya ng punong ehekutibo.

Ito ang naging reaksyon ni Tan makaraang idawit siya ng pangulo sa umano’y mga mambabatas na sangkot sa korupsyon batay sa listahang ibinigay ng Presidential Anti-Corruption Commission (PACC).

Sa isang post online, sinabi ni Tan na hindi totoong nagmamay-ari siya ng isang construction company na doon umano inaward ang proyekto para sa kanyang distrito.

Giit pa nito, wala siyang shares sa anumang construction companies.

Sa huli, iginiit ni Isabela 4th District Representative na mabalis lang naman para sa mga ahensya ng gobyerno na i-validate kung totoo ba ang akusasyon. —sa panulat ni Ace Cruz

Malinis ang konsensya ko —Quezon 4th District Representative Angeline ‘Helen’ Tan 

Malinis ang konsensya ko.

Ito ang iginiit ni Quezon 4th District Representative Angeline ‘Helen’ Tan sa Presidential Anti-Corruption Commission (PACC) sa gitna ng akusasyon dito na siya’y dawit sa korapsyon sa Department of Public Works and Highways (DPWH).

Ani Tan, kanyang hinahamon si PACC Commissioner Greco Belgica na pumunta mismo sa Gumaca sa Quezon para bisitahin ang ipinupukol sa kanyang maanomalyang road project.

Giit pa ni Tan, hindi dapat nagbabase sa mga anonymous na sulat o sumbong ang PACC at dapat aniya itong iberipika.

Kasunod nito, paliwanag ni Tan, totoo namang may nasirang bahagi ng Bypass Road sa Gumaca dahil sa bagyo.

Pero, ani Tan, nang masira ito, agad niyang hinginan ng paliwanag ang DPWH.

Sa huli, naniniwala si Tan na political operation lamang ang isyung ito na gawa ng kanyang mga kalaban sa pulitika. —sa panulat ni Ace Cruz

Ipagpaliban muna ang pagbabakasyon sa Pilipinas.

Ito ang payo ni Labor Secretary Silvestre Bello III sa mga Overseas Filipino Workers (OFWs) sa United Kingdom na nais umuwi ng Pilipinas para magbakasyon dahil sa bagong strain ng coronavirus disease 2019 (COVID-19).

Sinabi ni Bello na sasailalim sa 14 na araw na quarantine ang sinumang biyahero mula sa UK kaya’t para hindi masayang ang mga araw ay mas mabuting hintayin na lamang ang pagganda ng panahon at sitwasyon.

Una nang inihayag ng Pangulong Rodrigo Duterte na susugal na lamang ang mga Pilipinong nais umuwi ng bansa mula sa UK sa pag-asang hindi sila carrier ng bagong variant.

Ang mga Pilipinong dumating sa bansa bago mag-Pasko ay inobligang sumailalim sa 14-day quarantine bilang bahagi ng pagpapatupad ng mahigpit na seguridad dahil sa bagong SARS-CoV-2 variant na kumakalat sa UK.

Dapat nang magpatupad ng travel ban ang gobyerno sa lahat ng biyahero na galing ng United Kingdom.

Ito, ayon kay health advocate Dr. Anthony Leachon, ay kasunod nang paglaganap ng bagong variant ng coronavirus disease 2019 (COVID-19).

Kinuwestyon ni Leachon si Health Secretary Francisco Duque III kung ano pa bang transmission ang hinihintay bago isulong ang mas mahigpit at malawak na travel ban.

Sinabi ni Leachon na kailangang gayahin ang ginawa ng Japan na mabilis ang pag-aksyon sa pagsasara ng kanilang borders dahil mayroon nang transmission ng bagong variant sa UK at iba pang mga bansa.

Magandang balita naman aniya ang inihayag ng BioNTech na ang kanilang bakuna ay kayang labanan ang bagong variant ng COVID-19 subalit problema pa rin ito sa mga bansang wala pang bakuna laban sa COVID-19 tulad na lamang ng Pilipinas.

Mistulang ginagawang mangmang ng gobyerno ang Estados Unidos.

Binigyang diin ito ni Senador Panfilo Lacson matapos magbanta ang Pangulong Rodrigo Duterte na hindi irerenew ang Visiting Forces Agreement (VFA) kapag nabigo ang Amerika na maglaan ng 20-milyong coronavirus disease 2019 (COVID-19) vaccine ng Pfizer sa Pilipinas.

Sa kanyang tweet, sinabi ni Lacson na dahil sa bantang “no vaccines no VFA” ni Duterte, maaaring mauwi na nga lang ang Pilipinas sa pagbili ng Sinovac vaccine ng China kaysa sa US-made na Pfizer BioNTech at Moderna vaccines.

No vaccines no VFA! Treating the Americans like a bunch of yokels might have sealed our fate to settle for China’s Sinovac in lieu of the US made Pfizer BioNTech and Moderna vaccines.

— PING LACSON (@iampinglacson) December 28, 2020

Magugunitang noong nakalipas na Inter-Agency Task Force briefing, tinukoy ng pangulo na malapit nang mapaso ang VFA at hindi niya ito irerenew kapag hindi nakakuha ang Pilipinas ng Pfizer vaccine. —ulat mula kay Cely Ortega-Bueno (Patrol 19)