Judith Estrada-Larino

Tiniyak ni Health Secretary Francisco Duque III na hindi masasayang ang bagong dating na 2-milyong doses ng AstraZeneca vaccine na mag-eexpire na sa Hunyo at Hulyo.

Sa report ng National COVID-19 Vaccine Operations Center, 1.5-million ng doses ng AstraZeneca ang mag-eexpire sa ika-30 ng Hunyo at 525,000 doses naman ay hanggang sa ika-31 ng Hulyo na lang.

Sinabi ni Duque na magagamit ang mga naturang bakuna para sa mga nasa A1 category upang makumpleto na ang turok sa health care workers, A2 o senior citizens at mga mayroong comorbidities.

Nilinaw ni Duque na mahigit kalahating milyong ng mga nasabing doses ng AstraZeneca vaccine ay gagamitin bilang second dose at ang nalalabi ay bilang first dose.

Nakipag-ugnayan na aniya siya kay Metropolitan Manila Development Authority (MMDA) Chairman Benhur Abalos para magamit ang mga naturang bakuna bago mag-expire o maabot ang 120,000 pagbabakuna kada araw sa kalakhang Maynila na mangyayari sa loob lamang ng 10 araw.

Hindi nakahawa ang dalawang Overseas Filipino Workers (OFWs) bago na-detect sa mga ito ang India variant ng coronavirus disease 2019 (COVID-19).

Ito, ayon kay Health Secretary Francisco Duque III, dahil sa ipinatutupad na mahigpit na border protocols kaya’t nai-quarantine aniya ang mga nasabing pasyente bilang pagsunod na rin sa isolation, testing at quarantine protocols.

Sinabi pa ni Duque na imposibleng ma-expose sa iba ang dalawang kasong nakumpirmang B.1.167 nang hindi aniya nalalaman ng mga otoridad.

Kasabay nito, ipinabatid ni Duque na irerekomenda niya ang mas mahigpit na border control para sa mga pasahero mula sa mga bansa sa Middle East, base na rin sa rekomendasyon ng kinatawan ng World Health Organization (WHO) sa Pilipinas.

Hihilingin din aniya niya ang advice ng WHO kaugnay sa pagpapalawig ng travel ban sa mga bansang may kaso ng India variant.

Pagaganahin ng Department of Agriculture (DA) ang resources nito para matulungan ang local government units (LGUs) na matugunan ang problema sa African Swine Fever sa kani-kanilang mga nasasakupan.

Ayon kay Agriculture Secretary Wiliam Dar, batid nilang limitado lamang ang quick response fund ng LGUs para sa ASF lalo’t nagamit na ito para tugunan ang coronavirus disease 2019 (COVID-19) pandemic.

Kasabay nito, tiwala si Dar na maipapalabas na ng Department of Budget and Management (DBM) ang P461-milyong pondo bilang ayuda sa mga apektadong hog raisers.

Una nang idineklara ng Pangulong Rodrigo Duterte ang state of calamity dahil sa ASF at ito ay tatagal ng isang taon maliban na lamang kung i-lift o i-extend.

Walang dagdag na bayad ang walong tagapagsalita ng National Task Force to End Local Communist Armed Conflict (NTF-ELCAC).

Ipinabatid ito ni National Security Adviser Hermogenes Esperon, Jr., vice chairman ng NTF-ELCAC, dahil ang suweldo aniya ng mga spokersons na ito, kung saan anim ang bago, ay magmumula sa kanilang mother agencies.

Kaya aniya wala siyang nakikitang dahilan kung bakit dapat katakutan ang pagkakaroon ng maraming spokesperson ng nasabing task force.

Sa katunayan, sinabi ni Esperon na dagdag-trabaho pa sa mga ito ang pagiging tagapagsalita ng task force na kinabibilangan nina Lt. General Antonio Parlade at Presidential Communications Operations Office  (PCOO) Undersecretary Lorraine Badoy.

Itinalaga namang bagong spokespersons ng NTF-ELCAC sina Department of the Interior and Local Government Undersecretary Jonathan Malaya, Presidential Human Rights Committee Secretariat Undersecretary Severo Catura, Presidential Task Force on Media Security Executive Director Joel Egco, Metropolitan Manila Development Authority (MMDA) Spokesperson Celine Pialago, Atty. Marlon Bosantog at Gaye Florendo na assistant spokesperson ng NTF-ELCAC Public Affairs.

Iginiit ni Foreign Affairs Secretary Teodoro Locsin, Jr. na tanging siya lamang ang may karapatang magsalita sa mga usaping may kinalaman sa international diplomacy.

Kasunod na rin ito ng pahayag ni Presidential Spokesman Harry Roque na ang Julian Felipe Reef ay hindi bahagi ng exclusive economic zone (EEZ) ng Pilipinas.

Magugunitang ilang beses naghain ang Department of Foreign Affairs ng diplomatic protest sa China dahil sa pananatili ng mga barko nito sa Julian Felie Reef.

Nasabat ng mga otoridad ang kahun-kahong coronavirus disease 2019 (COVID-19) rapid test kits na ibinebenta online sa isang bahay sa Parañaque City.

Kasunod na rin ito nang isinagawang buy-bust operation ng Criminal Investigation and Detection Group  (CIDG) at Parañaque Police sa Barangay Don Bosco.

Ayon sa mga otoridad, walang naipakitang Food and Drug Administration (FDA) approval o anumang certificate ang mga suspek na isang lalaking sales executive at babaeng office clerk.

Kabilang sa mga nakumpiska ang P1.2-millyon marked money, 250 box ng antigen test at 640 box ng rapid test kits bukod pa sa anim na cellphone, computer set, logbooks at Wi-Fi router na hinihinalang ginagamit sa online transactions at isang kahon ng mga bala at baril.

Nakarehistro sa Cebu ang may-ari ng test kits subalit wala itong business permit mula sa Parañaque City.

Demoralisado na umano ang Pinoy nurses dahil sa kabiguang makuha ang makatuwirang kumpensasyon sa paglaban sa coronavirus disease 2019 (COVID-19).

Ayon ito kay Maristela Abenoja, pangulo ng Filipino Nurses United, matapos hindi pa rin nakukuha ng mga nurse sa public hospitals ang starting salary ng Salary Grade 15 o P32,000 habang minimum naman ang kinikita ng mga nurse sa private hospitals.

Nadedelay rin aniya ang pagpapalabas ng special risk allowance ng health workers gayundin ang hazard pay ng mga ito.

Dahil dito, ipinabatid ni Abenojar na demoralisado na ang mga nurse na ang iba ay nag-iisip nang magresign o lumipat ng trabaho dahil hindi nila ramdam na mahalaga sila sa gobyerno o binibigyan sila ng sapat na suporta at pagkalinga sa gitna na rin ng matinding pagod na dinaranas nila.

Sinabi ni Abenojar na maraming nurses na tatlong beses nang nakaranas ng COVID-19 subalit hindi pa rin nakukuha ang kumpensasyon sa unang beses nilang dinapuan ng nasabing virus.

Nangunguna ang mga nurse sa bilang ng health workers na tinamaan ng COVID-19 o 6,000 sa 17,000 medical frontliners sa bansa.

Mas nakakahawa ang coronavirus disease 2019 (COVID-19) variant na nadiskubre sa India.

Ayon ito kay Dr. Eva Dela Paz, executive director ng UP-National Institutes of Health (NIH) matapos kumpirmahin ng Department of Health (DOH) ang dalawang kaso ng B.1.167 variant na kinabibilangan ng dalawang Pinoy workers galing Oman at United Arab Emirates.

Gayunman, sinabi ni Dela Paz na iniimbestigahan pa kung gaano kabangis ang India variant dahil kailangan pang pag-aralan ang iba pang factors sa pagsirit ng kaso ng COVID-19 sa India.

Ayon pa kay Dela Paz, hindi pa rin natutukoy ng Philippine Genome Center ang COVID-19 variant na tumama sa 12 tripulante ng MV Athens Bridge na dumaan sa India, Vietnam at Malaysia bago dumaong sa Sangley Point sa Cavite.

Kasabay nito, muling ipinaalala ni Dela Paz ang mahigpit na pagsunod sa health and safety protocols para makaiwas sa COVID-19.