Judith Estrada-Larino

Pinarerepaso ni Senador Sherwin Gatchalian ang estado ng paggamit ng Filipino sign language para sa deaf education sa ilalim ng K to 12 program.

Sa harap ito ng patuloy na mga problemang dulot ng coronavirus disease 2019 (COVID-19) pandemic upang maisulong ang edukasyon para sa mga guro at mag-aaral na may kapansanan.

Layon ng Resolution 722 na inihain ni Gatchalian na suriin ang iba’t ibang mga usapin at suliranin ng deaf teachers at learners sa paggamit ng Filipino sign language, lalo pa’t nababahala aniya siya dahil hindi naipapatupad nang maayos ang Filipino Sign Language Act.

Sinabi ni Gatchalian na kulang pa rin ang training o pagsasanay para sa mga guro dahil hindi naisusulong ang pagbibigay ng lisensya sa deaf teachers at nananatiling kulang ang mga kagamitan sa pagtuturo para dito bagay na mas nakita sa ilalim ng distance training.

Sa ilalim ng batas, ang Filipino sign language ay itinuturing na pambansang sign language. —ulat mula kay Cely Ortega-Bueno (Patrol 19)

Pinaglalatag ni Senador Nancy Binay ang Department of Health (DOH) ng protocol kung paano iingatan ng husto ng local government units ang mga bakuna.

Makakabuti, ayon kay Binay, na gumawa ng checklist at briefer hinggil sa tamang paghawak ng bakuna mula sa pagbabiyahe hanggang sa maiturok ito.

Sinabi pa ni Binay na hindi na kailangang magkaroon pa ng ‘Pridyider Czar’ para lamang matiyak na ligtas ang pagbabiyahe sa bakuna at nakahanda na ang mga freezer sa mga paghahatiran nito.

Iginiit din ni Binay sa DOH na tiyakin ang kalidad ng bakuna mula sa panggagalingan para hindi maulit ang nangyari sa 7,500 doses ng AstraZeneca vaccines na kinailangang bawiin mula sa Bicol Region noong Marso dahil alanganin ang handling.

Bagamat nagamit pa rin ang bakuna, inihayag pa ni Binay na hindi dapat maulit ang ganitong alanganing sitwasyon lalo pa’t inaasahan na ang pagdagsa ng milyun-milyong doses ng bakuna sa mga susunod na linggo at buwan. —ulat mula kay Cely Ortega-Bueno (Patrol 19)

Muling ipinatutupad ng Metropolitan Manila Development Authority (MMDA) simula ngayong araw na ito ang truck ban.

Ayon kay MMDA chairman Benhur Abalos, epektibo ang truck ban, Lunes hanggang Sabado, alas-6 ng umaga hanggang alas-10 ng gabi at alas-5 ng hapon hanggang alas-10 ng gabi.

Ipinabatid ni Abalos na exempted naman sa truck ban ang perishables at agriculture produce.

Pinag-aaralan din aniya ng MMDA kung maaaring papasukin ang mga truck kapag Sabado.

Kakasuhan ng Anti-Red Tape Authority (ARTA) sa Ombudsman ang isang departamento ng Food and Drug Administration (FDA).

Ito, ayon kay ARTA Director General Jeremiah Belgica, ay kapag nabigo ang FDA Center for Drug Regulation and Research na magpaliwanag hanggang sa Biyernes sa pagka-delay sa renewal ng halos 600 product registration applications.

Sinabi ni Belgica na isasailalim nila sa lifestyle check ang mga opisyal ng nasabing FDA Department kapag itinuloy ng ARTA ang kanilang imbestigasyon hinggil dito.

Tanging ang FDA, DOH, Ombudsman at Civil Service Commission aniya ang maaaring mag-utos ng preventive suspension ng mga empleyado nito.

Pinakilos ng Land Transportation Franchising and Regulatory Board (LTFRB) ang lahat ng inter-regional at inter-provincial public utility vehicles na gumamit ng Safe, Swift and Smart Passage (S-PaSS) Travel Management System.

Ang S-PaSS ay communication platform na ginawa ng Department of Science and Technology (DOST) para matiyak ang kaligtasan ng mga pasahero na bumabiyahe sa bawat provincial at regional borders upang makaiwas sa pagkalat ng coronavirus disease 2019 (COVID-19).

Batay sa memorandum na pirmado ni LTFRB Chairman Martin Delgra, ang lahat ng mga pasahero ay dapat magrehistro sa S-PaSS system bago makabili ng kanilang ticket sa bus na kailangang ipakita ang registration bago payagang makasakay ng bus.

Bukod pa ito sa travel coordination permit o travel pass through permit na inisyu ng local government sa lugar kung saan ito patungo.

Una nang binuksan ang mahigit 250 na ruta ng bus na binubuo ng 5,000 units na labas-masok sa Metro Manila.

Umapela sa publiko si Manila Bishop Broderick Pabillo na alagaan ang kalikasan.

Ito, ayon kay Pabillo, ay kasunod nang nararanasang matinding init ng panahon gayundin ang matitinding bagyo na kasalanan din ng tao dahil hindi nito inaalagaan ang kalikasan.

Pinalala pa aniya nito ang ilegal na pagmimina sa mga lalawigan.

Pinayuhan ng PAGASA ang publiko na manatili sa loob ng bahay at manatling hydrated habang nasa labas.

Ito, ayon sa PAGASA, ay dahil ang heat index ay inaasahang papalo sa 39°C hanggang 41°C sa susunod na tatlo hanggang apat na araw.

Sinabi ng PAGASA na dapat manatili na lamang sa bahay kung walang gagawing mahalagang bagay sa labas na kung hindi naman maiiwasan ay dapat sumilong at uminom ng tubig para manatiling hydrated.

Muling binuksan ng Department of Tourism (DOT) ang dalawa sa mga kilalang tourist spots sa Intramuros sa Maynila matapos maisailalim sa general community quarantine (GCQ) ang NCR Plus.

Ipinabatid ni Tourism Secretary Bernadette Romulo-Puyat na limitado lamang ang maaaring makapasok sa Fort Santiago at Baluarte De San Diego kung saan iniklian din nila ang operasyon nito sa ilalim ng strict and safety guidelines.

Bukas mula alas-9 ng umaga hanggang alas-6:30 ng gabi ang Fort Santiago at alas-8 ng umaga hanggang alas-5 ng hapon ang operational ang Baluarte De San Diego.

Una nang inihayag ng Inter-Agency Task Force (ITAF) na maaari nang mag-operate ang tourist attractions sa 30% ng venue capacity nito, subalit kailangan pa ring i-obserba ang health and safety protocols.