Judith Estrada-Larino

Tiwala ang NDRRMC na walang malaking pinsalang idinulot ang bagyong Crising sa mga dinaanang lugar sa Visayas at Mindanao.

Ito ayon kay NDRRMC Spokesperson Mark Timbal ay dahil nakapaghanda naman ang mga apektadong lugar sa pagdating ng nasabing bagyo partikular ang pagsasagawa ng preventive evacuation para sa kaligtasan ng mga residente.

Bahagi rin aniya ng preparasyon sa bagyong Crising ay may kinalaman sa pagsunod sa health and safety protocols para makaiwas sa COVID-19.

Agaran tayong nakapagpalabas ng mga tagubilin sa mga ating local governments and disaster managers para siguraduhin na yung mga areas na flood prone, lanslide prone, pati storm surge prone ay mamatyagang mabuti at kung kakailanganin ay makapagsagawa na ng pre-emptive evacuation. Kasama sa mga paalala na ibinigay sa ating kasamahan dyan sa area is to ensure, kung magkakaroon tayo ng area of movement ng mga tao dapat masigurado natin na ligtas pa rin sila sa COVID-19, yung ating mga preparations kasi ngayon kasama na ‘yan. Advance ang ating paghahanda when it comes to the preparetion of evacuation centers pati na rin yung mga relief items na magagamit ng mga kababayan natin”, ani Timbal.

Sumasailalim na sa evaluation ang application ng Sinopharm para sa emergency use authorization (EUA) ng bakuna nito kontra COVID-19.

Ayon ito kay FDA Director General Eric Domingo matapos silang makipagpulong sa DOH kahapon.

Ipinabatid ni Domingo na naipadala na nila sa vaccine expert panel ang scientific data at maging ang clinical trial data ng bakuna ng Sinopharm para sa kaukulang evaluation at kung may mga concerns ay maipaalam ito sa vaccine manufacturer.

Posible aniyang sa susunod na linggo ay matapos na rin ang evaluation sa EUA application ng Sinopharm na una nang inihain mismo ng DOH.

Target ng Pilipinas na makakuha ng 202 million doses ng COVID-19 vaccines.

Ayon ito kay Vaccine Czar Carlito Galvez, Jr. mula sa paunang target na 148 million doses lamang ng bakuna kontra COVID-19.

Sinabi ni Galvez, na target na ng bansang bumili ng 158 million doses at tumanggap ng dagdag na 44 million doses mula sa Covax Global vaccine sharing facility matapos tumaas ang produksyon ng bakuna.

Kasunod na rin ito aniya nang pagtupad ng World Health Organization at Covax Facility sa commitment nito, pagbabahagi ng mga mayayamang bansa ng sobrang bakuna nila at pakikipag negosasyon ng gobyerno sa vaccine manufacturers.

Inihayag ni Galvez, na nakuha na ng bansa sa murang presyo ang mga bakuna kayat makaka-secure na ang Pilipinas ng 202 million doses nito na kinabibilangan ng 40 million doses mula sa Pfizer BioN’tech kung saan pipirmahan nito at ng Pilipinas ang terms para rito.

Pinasasama ni Health Secretary Francisco Duque III ang Oman at UAE sa mga bansang may travel restrictions matapos maitala ang dalawang kaso ng COVID-19 variant mula sa India.

Sinabi ni Duque na naipaabot na niya sa office of the executive secretary ang nasabing rekomendasyon para mapigil ang mga pasahero mula sa oman at uae na makapasok sa bansa sa loob ng dalawang linggo.

Inaasahang magpupulong ang IATF para tutukan ang posibleng extension at expansion ng ban ng mga pasahero mula sa India, Pakistan, Bangladesh, Nepal at Sri Lanka na magtatapos ngayong araw na ito.

Kapag naaprubahan ang kanyang rekomendasyon sinabi ni Duque na bibigyan nila ng isang araw na

Tsansa ang mga nakapag byahe na at paparating na sa bansa mula sa Oman at UAE.

Halos 88% na ng P22. 9 billion na cash aid sa mga apektadong residente ng MECQ sa NCR plus ang naipamahagi na.

Iniulat ito ni DILG Secretary Eduardo Año  sa Pangulong Rodrigo Duterte kung saan 87. 4% o 20, 028, 688 beneficiaries’ ang nabigyan ng tig-P1,000 cash assistance hanggang kahapon.

Sa mga naipamahaging pondo ang mga residente sa NCR ang pinakamaraming nakatanggap na ng ayuda o nasa P9.5 billion.

Mayruon na lamang hanggang bukas, Mayo 15 ang local government units para maipamahagi ang cash aid.

Matapos ang Mayo 15 deadline ipinabatid ni Año na bibigyan pa nila ng sampung araw ang LGU’s para magkasa ng supplemental payroll upang maibigay ang hawak pang cash sa mga pamilyang kuwalipikado namang tumanggap ng ayuda subalit wala sa listahan.