Judith Estrada-Larino

Naubos na ang bakunang gawa ng Pfizer sa maraming lungsod sa Metro Manila matapos itong dagsain sa iba’t ibang vaccination sites.

Sa Maynila, inamin ni Dr. Lei Lacuna, councilor at pangulo ng Liga ng mga Barangay, na maraming gustong gumamit ng Pfizer vaccine kaya’t sa kauna-unahang pagkakataon ay dinumog ang isang vaccination site kung saan itinurok ang Pfizer vaccine.

Ipinabatid ni Manila Mayor Isko Moreno na nasa mahigit 1,000 ang nabakunahan ng Pfizer, 900 sa vaccination site at 186 na inilaan para sa may malubha at nakakahawang sakit.

Sa Muntinlupa, nasa 3,500 katao ang nabigyan ng first dose ng Pfizer at naitabi na rin sa storage facility ang pang-second dose ng Pfizer sa lungsod.

Samantala, naka-schedule namang iturok ang Sinovac at AstraZeneca ngayong araw na ito sa iba pang lungsod sa Metro Manila tulad ng Parañaque, Las Piñas at Makati.

Walang pilitan sa sinumang ayaw magpabakuna laban sa coronavirus disease 2019 (COVID-19).

Ayon ito sa Pangulong Rodrigo Duterte subalit nakikiusap siya sa mga ayaw magpabakuna na huwag munang lumabas ng bahay.

Sinabi ng pangulo na mahihirapang makamit ng bansa ang herd community kung mananatili sa labas ang mga walang bakuna.

Iginiit pa ng pangulo na walang napapaulat na nasawi dahil sa bakuna at wala aniyang basehan ang takot ng mga ayaw mabakunahan kontra COVID-19.

Binigyang diin pa ng pangulo na hindi maaaring mamili ng brand ng bakuna ang mga Pilipino dahil pare-pareho namang epektibo ang kahit anong brand na aprubado ng health officials ng bansa.

Hinimok ni Senior Citizen Party-list Representative Rodolfo Ordanes ang mga ahensya ng gobyerno na tulungan ang Philippine General Hospital (PGH) na bumalik sa normal operations matapos masunog ang isang bahagi nito.

Sa isinumite niyang resolusyon, nanawagan si Ordanes sa Department of Health, Department of Social Welfare and Development (DSWD) at Department of Finance para magbigay ng tulong pinansyal, personnel, infrastructure at supply assistance sa ospital.

Sinabi ni Ordanes na malaking dagok sa health care system ng bansa na niyanig na ng pandemya ang pagkatupok ng PGH na puntahang ospital ng mga mahihirap na Pilipino.

Kailangan aniyang mabigyan kaagad ng pondo ang PGH at magkaroon ng reconstruction sa ospital para bumalik na sa normal ang operasyon nito sa mga susunod na araw.

Nagpositibo sa coronavirus disease 2019 (COVID-19) si House Deputy Speaker Henry Oaminal.

Ipinabatid ito ni Ozamiz City Mayor Sancho Ando Oaminal na nagsabing ang ama ay naka-home quarantine bilang pagsunod sa protocols.

Ayon sa batang Oaminal, nag-abiso na sila sa mga nakasalamuha ng kaniyang ama simula noong Sabado, ika-15 ng Mayo para boluntaryong magquarantine.

Humihingi si Mayor Oaminal ng dasal para sa agarang paggaling ng amang kongresista na huling pisikal niyang nakita noong Huwebes, ika-13 ng Mayo.

Ika-4 ng Mayo nang unang isinalang sa vaccination ang senior citizens kabilang si Congressman Oaminal laban sa COVID-19 sa Ozamiz City.

Aapela ang isang grupo ng mga magsasaka kaugnay sa kautusang pagpapababa sa taripa na inaangkat na bigas.

Ayon kay dating Agriculture secretary Leonardo Montemayor, board chairman ng Federation of Free Farmers (FFF), aapela sila sa kongreso at Malacañang para mairekunsidera ang Executive Order 135 na inilabas ng Malacañang, dalawang araw lamang bago bumalik sa sesyon ang Kongreso.

Binigyang diin ni Montemayor na matatag din ang suplay ng bigas sa bansa kaya’t walang basehan para ibaba ang taripa sa imported rice kasabay ang paglilinaw na walang inflation na nagmumula sa bigas.

Dinagsa ng halos 3,000 residente ng Maynila ang isang hotel para magpaturok ng 900 doses ng Pfizer vaccine kontra coronavirus disease 2019 (COVID-19).

Ibinukas na ang Pfizer para sa categories A2 o senior citizens at A3 o may comorbidities kaya’t marami ang pumila bagamat una nang itinurok ang ilang dose nito sa medical frontliners noong nakalipas na linggo.

Hatinggabi at madaling araw pa ang ilan sa mga pumila subalit alas-6 na ng umaga ang umpisa ng screening process at alas-8 naman sinimulan ang mismong pagbabakuna.

Bukod dito, tuluy-tuloy din ang pagbabakuna sa 18 vaccination sites sa Maynila.

Halos wala nang tulugan ang mga Pilipino sa Israel dahil sa takot sa mga pinauulang rocket ng Hamas militant group.

Ayon ito kay Ador Tucay, isang Pinoy caregiver at 15 taon nang nagtatrabaho sa Israel.

Sinabi sa DWIZ ni Tucay na nakabukas palagi ang shelter sa ilalim ng kanilang mga bahay para takbuhan nila gayundin ng napakalaking bus station sakaling may mga rocket na inaasahang babagsak sa Israel.

Magkakaiba ng strategy ang mga lugar sa Israel sa pagtugon sa rocket launch ng Hamas na sinasalo ng iron dome na siyang life saver ng mga Israeli at mga dayuhang tulad nila na nasa nasabing bansa.

Ipinabatid pa ni Tucay na halos 3,000 rocket na ang pinakawalan ng Hamas militant group sa mahigit isang linggo nang bakbakan nito at ng Israel.

Depende po kasi ‘yan sa city, kung halimbawa po sa city ng Tel’Abim, before 2 minutes po dumating ang rocket sa Tel’Abim. May 2 minutes po kami para tumakbo sa shelter, tyaka po sasalubungin ng iron dome ‘yon. Napaka-hi-tech po. Napakalakas po ng sirena maririnig magsa-siren po ng napakalakas,” ani Tucay. —sa panayam ng Balitang Todong Lakas

Nakatanggap na ng P1.5-milyong tulong-pinansyal ang halos 300 vendors, pedicab drivers at iba pang tourism workers sa Intramuros, Maynila matapos apektuhan ng coronavirus disease 2019 (COVID-19) pandemic.

Nakakuha ng tig-P5,000 ang 138 vendors, 87 security personnel, 20 pedicab drivers, 20 janitorial services workers at 30 calesa drivers.

Ang nasabing ayuda ay bahagi ng Department of Tourism- Department of Labor and Employment (DOLE) cash assistance program ng Bayanihan to Heal as One Act.

Suportado ng kalahati ng halos 40 alkalde sa lalawigan ng Camarines Sur ang posibleng pagtakbo ni Vice President Leni Robredo bilang gobernador dito sa 2022.

Kasunod na rin ito nang inisyung manifesto of support ng grupong Anduyog para kay Robredo na nakikitaan nila ng kakayahang pamunuan ang Kapitolyo ng Camarines Sur.

Kasabay nito, umalma si Anduyog Provincial Chairman, Camarines Sur 4th District Congressman Arnie Fuentebella sa kumakalat na edited copy ng kanilang manifesto kung saan lumalabas sa minanipulang dokumento na ipinost sa Facebook ang pagsusulong ng grupo kay Robredo bilang pangulo ng bansa.

Si dating Camarines Sur 1st District Congressman Rolando Andaya, Jr. ang itinalaga ng Anduyog Party na makipag-usap kay Robredo hinggil sa hiling nilang tumakbo itong Camarines Sur governor.