Judith Estrada-Larino

Umalma si Budget Secretary Wendel Avisado sa panukalang magpabakuna muna bago mabiyayaan ang mga kasali sa Pantawid Pamilyang Pilipino Program 4p’s.

Sa gitna na rin ito ng report na mayorya ng mga Pilipino ay tumatangging magpabakuna laban sa COVID-19.

Ayon kay Avisado,hindi tamang gawing compulsory ang pagpapabakuna para sa mga tatanggap ng biyaya sa ilalim ng 4p’s dahil wala itong basehan sa ilalim ng batas.

Ang pahayag aniya ng Pangulo ay dapat magpa bakuna sana ang lahat para sa kanilang kabutihan subalit kung ayaw ng iba ay hindi sila dapat munang lumabas  para hindi maapektuhan ng virus.

Una nang pinalutang ni Presidential Spokesman Harry Roque ang bakuna muna bago 4p’s dahil sa mababang porsyento pa ng mga nagpapaturok kontra COVID 19.

Pinuri ni Japanese Prime Minister Suga Yoshihide ang gobyerno ng Pilipinas sa paninindigan nito sa 2016 arbitral ruling sa West Philippine Sea.

Kasunod na rin ito nang pag-uusap nina suga at Pangulong Rodrigo Duterte na una nang naggiit ng nasabing paninindigan sa 75th united nations general assembly high level general debate noong nakalipas na taon.

Sinabi ng palasyo na hinangaan ng Punong Ministro ng Japan ang anito’y maprinsipyong posisyon ng Pangulong Duterte sa arbitral ruling pabor sa Pilipinas kaugnay sa pinag-aagawang teritoryo Sa West Philippine Sea.

Binigyang diin ng Pangulo sa Japanese official ang kahalagahan ng kooperasyon para maisulong ang maritime domain awareness, maritime security and safety, Jalayaan sa paglalayag at maritime connectivity and commerce.

Ipinaabot din ng Pangulo kay suga ang pangangailangang lutasin sa mapayapang pag uusap ang gusto sa wps upang maiwasan ang hindi pagkakaintindihan sa Asia Pacific Region.

Nagkasundo naman sina Pangulong Duterte at suga na magtulungan para matiyak ang seguridad at katatagan sa rehiyon nang naaayon sa rule of law.

Sumirit pa ang kaso ng COVID-19 sa bansa sa 1,165,155 matapos maitala sa 6, 100 ang mga bagong kaso ng virus.

Ayon sa DOH nasa 51,912 ang active cases ng COVID- 19 kung saan 93. 1% ang mild, 2.1% ang asymptomatic, 1.31% ang moderate, 2% ang severe at 1.5% ang critical condition.

Pumapalo na sa 1,093,602 ang total recoveries kasama na ang 4, 071 na mga bagong gumaling sa COVID-19

Umakyat naman sa 19, 641 ang total deaths matapos maitala ang 136 na mga bagong nasawi sa virus.

Hindi pa muna ipatutupad ng MMDA ang number coding scheme.

Ito ayon kay MMDA Chairman Benhur Abalos ay dahil manageable pa ang trapiko sa Metro Manila kaya’t libre pa ang lahat ng mga sasakyan para na rin makapag hanap buhay.

Subalit sinabi ni Abalos na kapag lumala ang trapiko kaagad din naman nilang ibabalik ang number coding scheme.

Sa ngayon aniya ay may pinaiiral na truck ban ang MMDA sa Metro Manila.

Inihayag naman ni Presidential Spokesman Harry Roque na wala namang problema sa daloy ng trapiko sa EDSA mula nang buksan ang mga connector tulad ng skyway at iba pang bagong kalsada.

Kasado na ang petsa nang pagbubukas ng klase ngayong school year 2021-2022.

Ayon kay Education Undersecretary Annalyn Sevilla ,ang panukala nila kaugnay sa pagbubukas ng klase ay ilalatag sa Pangulong Rodrigo Duterte at sa gabinete para kanilang pag apruba.

Sinabi ni Sevilla na isa lamang sa mga option ang lumutang na pagbubukas ng klase sa Agosto 23  dahil mayroon namang mandato ang DEPED na buksan ang klase ng hindi lalampas ng Agosto maliban na lamang kung may ibang direktiba ang pangulo hinggil dito.

Hulyo 2020 nang lagdaan ng Pangulong Duterte ang Republic Act 11480 na nagpapahintulot sa Chief Executive na itakda kahit kailan ang petsa nang pagbubukas ng klase sa panahon ng kalamidad o emergency.

Pinayuhan ng Malakaniyang ang mga Pilipinong mangingisda na ituloy ang pangingisda sa traditional fishing grounds sa West Philippine Sea.

Kasunod na rin ito nang paghahain ng protesta ng Department of Foreign Affairs (DFA) sa fishing ban na ipinatupad ng China sa South China Sea.

Sinabi ni Presidential Spokesman Harry Roque na andiyan naman ang Philippine Coast Guard para protektahan ang mga mangingisda.

Wala aniyang extra territorial application ang mga batas ng dayuhang bansa tulad nang ginawa ng China.

Naghain ng resolusyon ang Makabayan bloc ng kamara para kilalanin si Ana Patricia Non at iba pang organizers ng community pantries.

Si Non ang nagpasimula ng community pantry sa Maginhawa Street sa Quezon City para tumulong sa mga apektado ng pandemya at ito ay ginaya ng mga grupo at tao sa iba’t ibang paraan hindi lamang sa Metro Manila kundi maging sa iba pang lalawigan.

Binigyang diin ng Makabayan bloc sa pamamagitan ng House Resolution 1763 na binuhay ni Non ang espiritu ng bayanihan na kilalang ugali ng mga Pilipino at pagkakaisa sa mga panahong ganito kung saan maraming tao ang talagang nangangailangan ng tulong.

Hindi anito alintana ni Non ang mga banta sa kanyang buhay sa pagpapatuloy ng Maginhawa community pantry.

Ipinabatid ng Makabayan bloc na mahigit 6,000 pantry ang naitayo na sa buong bansa.

Ang mga pabigat o pasaning assets at properties ng gobyerno ang mga dapat ibenta.

Ayon ito kay Senador Panfilo Lacson bilang tugon sa pahayag ng Pangulong Rodrigo Duterte na handa ang gobyerno na magbenta ng mga ari-arian para mapondohan ang gastusin sa pagtugon sa pandemya.

Sinabi ni Lacson na makabubuting piliing mabuti kung anong asset ang maaaring maibenta na.

Marami aniyang real estate at assets sa ilalim ng government owned and controlled corporations ang taun-taon ay tumantanggap ng subsidy sa national government dahil kung hindi na mismanage ay ginawa itong gatasan ng mga tiwaling opisyal nito.

Isinusulong ni Lacson ang agarang pagsasagawa ng audit at pag-imbentaryo sa lahat ng assets para mabatid kung alin ang kumikita sa nalulugi o nagiging pabigat pa sa gobyerno na siyang dapat na ibenta samantalang ang mga performing assets at nakakapagremit ng revenues sa gobyerno ay dapat lamang panatilihin.

Una nang inihayag ng Pangulong Duterte na umaabot na sa P1-trilyon ang nagastos ng gobyerno sa pagtugon sa pandemya kaya’t handa silang magbenta ng ari-arian para patuloy na mapondohan ang mga gastusin may kaugnayan sa pandemya.

Isinusulong ng mga kongresista na gawing vaccinators kontra coronavirus disease 2019 (COVID-19) ang mga dentista at medical technologists.

Kasunod na rin ito nang inihaing House Bill 9354 nina House Committee on health Chair Helen Tan, Marikina Congresswoman Stella Quimbo at Quezon City Congressman Kit Belmonte bilang amiyenda sa Republic Act 11525 o COVID-19 vaccination program act of 2021.

Ayon sa kasalukuyang batas, ang mga doktor, nurses at trained pharmacists at midwives ang maaaring mag bakuna sa COVID-19 roll out ng gobyerno.

Binigyang diin ng mga kongresista na malaki ang maitutulong ng dagdag na medical personnel para mapalawak ang COVID-19 vaccination ng gobyerno.

Kailangan aniyang mabilisan ang pagtututok at maagapan ang posibleng expiration o pagkasayang ng mga bakuna, sa harap na rin nang inaasahang pagdating ng mas maraming bakuna sa bansa.

Tuluy-tuloy ang pagbuti ng internet speed sa bansa.

Batay sa pinakahuling Ookla Speedtest Global Index Report para sa April 2021, ang fixed broadband speed sa bansa ay tumaas sa 49.31 Megabits per second (Mbps)  kumpara sa 46.25 Mbps lamang noong Marso.

Ang mobile speed naman ay nakapagtala ng average download speed na 29.12 Mbps kumpara sa 45.43 Mbps noong Marso.

Simula noong November 2020, umangat na ng 23 points sa global ratings ang Pilipinas pagdating sa fixed broadband at 26 points naman sa mobile internet.

Umabot na sa 523.38% ang itinaas ng fixed broadband speed habang 291.40% namn ang itinaas ng mobile internet speed, simula nang maupo sa puwesto ang Pangulong Rodrigo Duterte.

Sa 176 na bansang inevalute ng Ookla, ang fixed broadband speed ng Pilipinas ay nasa ika-80 puwesto, habang ang mobile naman ay ika-84 na puwesto mula sa 134 countries sa mundo.

Sa 50 bansa naman sa Asya, ang Pilipinas ay nasa ika-21 pwesto sa fixed broadband at ika-26 sa mobile.