Beinte kuwatro (24)oras na naka-monitor ang Batangas PDRRMO sa mga aktibidad ng Bulkang Taal.
Tiniyak ito sa DWIZ ni Lito Castro, pinuno ng batangas PDRRMO matapos magsimulang mag alburuto ang bulkang taal kahapon.
Ayon kay Castro, naka-antabay din sila sa advisory ng Phivolcs hinggil sa sitwasyon ng bulkan bagama’t kalmado pa ito ngayong mag-hapon
Mahigpit na binabantayan ng Phivolcs ang posibleng pamamaga ng bunganga ng Bulkang Taal.
Ayon ito kay Phivolcs Director Renato Solidum bagama’t sa ngayon ay wala pang matinding pressure para magtulak sa pamamaga ng bunganga ng bulkan.
Kumpleto naman aniya sila ng mga gamit para matukoy kung mayruon nang pamamaga.
Sisimulan na sa Hulyo 3 ang tuwing Sabado nang biyahe ng Pasig River Ferry Service.
Ayon ito sa MMDA kung saan libreng makakasakay sa ferry service mula lunes hanggang sabado at magtungo sa alinman sa labing isang istasyon na kinabibilangan ng Pinagbuhatan, San Joaquin, Maybunga, Guadalupe, Valenzuela, Hulo, Lambiangan, Sta. Ana, PUP, Lawton at Escolta.
Ipinaalala ng MMDA ang pagdadala ng identification card ng sasakay sa ferry service gayundin nang pagsusuot ng face mask at face shield bilang bahagi ng security and health protocols.
Higit pang titindi ang mga pag-atake sa Malayang Pamamahayag sa bansa habang papalapit ang 2022 national elections.
Ayon ito kay Gilbert Andres ng Center for International Law dahil posibileng lumala ang problema nang paglaganap ng fake news para maitakda ang agenda sa mga botante na para aniyang nangyari nuong 2016.
Sinabi ni Andres na inaasahang mas lalaganap din ang mga troll army na magsisilbing makinarya para atakihin ang mga kritiko sa gobyerno.
Mayruon din aniyang mga legal na paraan para atakihin ang media tulad nang ginawa ng gobyerno sa dating media giant na ABS-CBN na hindi na binigyan ng bagong prangkisa ng Kongreso at panggigipit sa Rappler.
Umakyat na sa 18 ang death toll mula sa gumuhong 12 storey condominium building sa surfside Miami sa Florida, USA.
Ayon kay Miami Dade Mayor Daniella Levine Cava naabisuhan na nila ang pamilya ng 12 pa lamang sa mga biktima matapos umabot sa 30 organisasyon ang nagtulung tulong para mabilis na mahukay o makuha ang nasa 150 pang biktima.
Tiniyak ng Florida Housing Finance Corporation na patatayuan ng bahay ang mga biktima.
Tiwala pa rin si Miami Dade Fire Chief Alan Cominsky na makakakuha pa sila ng survivors kaya’t epektibo pa rin ang search and rescue operations sa gumuhong gusali.
Inararo ng isang ten wheeler dump truck ang halos 20 piraso ng concrete barrier sa southbound lane ng C5 sa Pasig kaninang alas-2 ng madaling araw.
Ipinabatid ito sa DWIZ ni Dang Rasaleda ng MMDA metrobase matapos isara pansamantala ang service road dahil sa aksidente.
Ayon pa kay rasaleda kaagad tumakas ang driver ng truck na may kargang buhangin at may plakang NFV 8819.
Kuwento naman ng pahintante ng truck magde-deliver sana sila ng buhangin sa Candelaria, Quezon nang makatulog sila ng driver habang binabagtas ang C5.
Inihayag ng MMDA na P5,000 hanggang P7,000 ang multa sa kada concrete barrier na sinagasaan ng nasabing dump truck.
Ibinabala ng Phivolcs ang pagsambulat ng Bulkang Taal anumang oras.
Ayon ito kay Phivolcs Director Renato Solidum kasunod ng pagtaas nang pagbuga ng asupre at gas ng Bulkang Taal gayundin ang pag init ng mga tubig sa ilalim ng bulkan at sa mismong lawa.
Inalerto ng Phivolcs ang publiko partikular ang mga residente ng Batangas kaugnay sa posibleng paglanghap ng asupre mula sa Bulkang Taal.
Ito ayon kay Phivolcs Director Renato Solidum ay kayat pinapayuhan nila ang mga residente na magsuot ng face mask at kaagad uminom ng tubig kapag nakalanghap ng maraming asupre.
Mabuti na rin aniyang mag-evacuate pansamantala ang mga direktang apektado ng pagbuga ng asupre ng Bulkang Taal.
Nadagdagan ang mga alkalde at bise alkalde sa North Cotabato na nagpositibo sa COVID-19.
Ipinabatid ni DILG Cotabato Provincial Director Ali Abdullah na walong mayors at tatlong vice mayors na ang dinapuan ng virus.
Kabilang sa mga nagpositibo sa virus ang alkalde ng mga bayan ng Makilala, Magpet, Tulunan, Banisilan, Alamada, Carmen, Arakan at Aleosan.
Nag positibo rin sa COVID-19 ang bise alkalde sa mga bayan ng Makilala, Matalam at Antipas.
Ang mga naturang local officials ay nadale ng COVID-19 dahil sa pag-iikot ng mga ito sa kani-kanilang mga bayan.
Inulan ng yelo ang isang barangay sa bayan ng Pikit sa North Cotabato.
Ayon sa mga residente ng Barangay Kalakacan nagulat sila sa biglang pag ulan ng yelo na kasinglaki ng holen kasabay ng malakas na buhos ng ulan.
Sinabi ng mga residente na ito ang unang pagkakataon na kanilang naranasan ang hailstorm kayat ilan sa kanila ang natakot samantalang ang iba naman ay namulat pa ng yelo.
Nilinaw naman ng PAGASA na kadalasan ay magkakaruon ng hailstorm kung mayruong thunderstorm.