Judith Estrada-Larino

Kailangan pa rin ang pagsusuot ng face mask kahit sa loob ng bahay.

Ito ayon sa Phivolcs ay matapos umabot na sa Metro Manila ang smog o vog na nagmumula sa Bulkang Taal.

Ibinabala ng Phivolcs ang masamang epekto sa kalusugan ng nasabing vog na mga pinong droplets na naglaman ng sulfur dioxide na acidic at nagdudulot ng iritasyon sa mata, lalamunan at baga.

Sinabi ni phivolcs na bukod sa Metro Manila ang haze mula sa Bulkang Taal ay nakaabot din sa Batangas, Cavite, Laguna at Rizal gayundin sa Bulacan, Bataan, Pampanga at Zambales.

Isinusulong ni Senador Sherwin Gatchalian ang paggamit ng renewable energy.

Ayon kay Gatchalian, panahon na para palakasin ang renwable energy sources dahil tumataas na rin ang paggamit sa ilang power sources tulad ng solar, geothermal at biomass.

Sinuportahan din ni Gatchalian ang plano ng Department of Energy na magpatupad ng moratorium sa paggamit ng coal kasabay ang pagkakasa ng mga panuntunan na humihimok sa pagbuo ng flexible systems tulad ng energy storage.

Sinabi ni Gatchalian na bumagsak ang paggamit ng coal dahil sa ipinatupad na lockdown sa gitna naman ng pagbaba ng demand sa operasyon ng industrial facilities at pagbagal ng operasyon ng commercial establishments.

Halos P18. 4 billion na hindi nagamit na pondo ang babalik sa kabang bayan kasunod nang pag-lapse o matapos ang pagiging epektibo kahapon ng Bayanihan 2 o Bayanihan to Recover as One Act.

Ayon ito kay Senador Francis Pangilinan kaya’t nakabitin ang maraming programa para tugunan ang COVID-19 pandemic.

Kabilang dito aniya ang P6.6 billion na pondo para sa laboratory testing service at pagkuha ng health workers at tig-P4.6 billion na pondo para sa digital learning resources and student subsidies at service contracts para sa public transport workers.

Ilan sa mga apektado ng pag lapse ng Bayanihan 2 law ang public hospital employees sa ilalim ng alliance of health workers na una nang nadismaya sa anito’y mabagal na pag aksyon ng gobyerno kayat hindi naipalabas sa tamang oras ang P3,000 COVID-19 hazard pay nila.

Milyun-milyong piso ang kinaltas sa mga allowance ng hospital workers dahil sa late o huli nang pagpapalabas ng health benefits ng mga ito na nakasaad sa Bayanihan 2.

Una nang iginiit ng mga mambabatas ang special session para mapalawig ang validity ng Bayanihan 2.

Nanawagan ang Volunteers Against Crime and Corruption (VACC) ng mahigpit na monitoring sa pagmamay-ari ng baril matapos isulong ng Pangulong Rodrigo Duterte ang pag-aarmas sa civilian organizations.

Ito ayon kay VACC Spokesperson Arsenio Boy Evangelista ay dahil posibleng gamitin ng ilang sibilyan ang kanilang mga armas sa iligal na paraan.

Sila aniya ay talagang mayroong baril bilang proteksyon sa kanilang mga sarili lalo na’t karamihan sa kanila o kanilang kaanak ay biktima ng karahasan.

Sinabi sa DWIZ ni Evangelista na tutulong sila sa PNP para sa mas mahigpit na pagbusisi sa mga impormasyon bago maaprubahan ang permit na makapagbitbit ng baril ang isang sibilyan.

“Major participation namin dito sa coalition is to gather vital informations, assessments, validations ng information to be given sa PNP for them to validate pero non-combatants po kami we won’t engage presently meron naman kami mga armas.” Ani Evangelista sa panayam ng DWIZ.

Tataas pa ang insidente ng hindi tamang paggamit ng armas gayundin ng kamatayan.

Ayon ito kay Norman Cabrera, Secretary General ng Gunless Society of the Philippines bilang tugon sa panukala ng Pangulong Rodrigo Duterte na armasan ang civilian organizations.

Sinabi ni Cabrera na lalong lalala ang patayan gamit ang armas habang pinagpalawig ng bansa ang pagkakaroon ng baril sa Pilipinas.

Sa katunayan aniya ay kultura sa Amerika ang sinusunod na panuntunan na bansa at nakikita naman ang resulta nito.

Ayon pa kay Cabrera dadami rin ang bilang ng mga iligal na magmamay-ari ng baril kapag ipinatupad ang pag-aarmas sa mga sibilyan.

Pinaalalahanan ng DOH ang publiko na iligal ang pagbubunyag ng anumang impormasyon nang pagtataglay ng HIV o AIDS ng isang tao ng walang pahintulot nito.

Sa gitna na rin ito ng kontrobersya hinggil sa komento ng isang abogado sa ikinamatay ng dating Pangulong Noynoy Aquino.

Tinukoy ng DOH ang Republic Act 11166 o Philippine HIV and Aids Policy Act o nagbibigay ng garantiya sa confidentiality at privacy ng sinumang nag-positibo sa HIV o AIDS o na-expose sa nagtataglay ng nasabing sakit.

Ayon sa DOH maaaring panagutin sa batas ang sinumang masasangkot sa pagbubunyag ng walang pahintulot ng impormasyon na mayroong aids ang isang tao, sumalang sa HIV related test, may HIV infection o HIV related illness o na expose sa HIV.

Walang record ang Bureau of Immigration na lumabas ng bansa si suspected drug lord Peter Lim.

Ipinabatid ito ni Immigration Spokesperson Dana Sandoval matapos nilang i-verify sa kanilang system gayundin sa mga dokumento na tumutukoy kay Peter Go Lim.

Sinabi ni Sandoval na made-detect din ng kanilang equipment sakali mang pumuslit palabas ng bansa si Lim gamit ang pekeng pasaporte.

Ayon naman kay Justice Secretary Menardo Guevarra, hindi matiyak kung nasa bansa pa si Lim lalo na’t malawak ang karagatang sakop ng bansa at maraming backdoors sa southern part ang maaaring gamitin sa pagpuslit palabas ng Pilipinas.

Samantala, bini-verify naman ng PNP kung nakalabas na nga ng bansa si Lim.

Dahil dito, inatasan ni PNP Chief Guillermo Eleazar ang Directorate of Intelligence, CIDG at PNP Drug Enforcement Group na i-check kung wala na nga ba sa Pilipinas si Lim tulad ng naunang pahayag ni Dilg Secretary Eduardo Ano na nakatanggap sila ng impormasyong nakapuslit na si Lim palabas ng bansa.

Sakali mang wala na si Lim sa bansa, inihayag ni Eleazar na wala pa rin itong takas dahil makikipag ugnayan sila sa kanilang counterparts sa ibang bansa.

Nagpasaklolo kay Valenzuela City Mayor Rex Gatchalian ang isang factory worker matapos makuha ang suweldong 1, 056 pesos na tig-5 at 10 sentimong barya.

Sa kanilang twitter post, ipinabatid ng Valenzuela City Government na ang nasabing halaga ay dalawang araw na suweldo ng nasabing empleyado.

Ayon sa City Government, nakipag pulong na si Gatchalian sa mga kinatawan ng Next Green Factory at sa mismong Factory Worker.

Isa pang pulong ang ipapatawag ni Gatchalian para talakayin ang reklamo laban sa may ari ng kumpanya na wala sa bansa.

Iginiit ni Gatchalian na hindi dapat ma demoralize ang industry workers.

Pumapalo na sa 1,403, 588 ang kabuuang kumpirmadong kaso ng COVID-19 matapos maitala sa 5, 604 ang mga bagong kaso ng nasabing virus.

Ito ayon sa DOH ang pinakamababang naitalang mga bagong kaso ng COVID-19 sa nakalipas na apat na araw.

Naitala sa 52, 029 ang active cases kung saan 90.1 percent ang mild cases, 5 percent ang asymptomatic, 1.4 percent ang critical cases, 2.1 percent ang severe cases at 1. 49 percent ang moderate cases.

Sumirit na sa 24,456 ang death toll matapos madagdag ang 84 na bagong nasawi sa COVID-19.

Umakyat na rin sa 1,327, 103 ang total recoveries kasama na ang 6, 154 na mga bagong gumaling sa nasabing sakit.

Ipinadedeklara ni Senador Risa Hontiveros ang National West Philippine Sea Victory tuwing July 12.

Bahagi na rin ito ayon kay Hontiveros nang pagbibigay parangal sa dating Pangulong Noynoy Aquino.

Sinabi ni Hontiveros na si PNoy ang ama ng matagumpay na arbitration case ng Pilipinas kontra China noong 2016.

Inihayag pa ni Hontiveros na ang isang araw na pagdiriwang ay pangontra sa mga fake news at pangmamaliit sa nasabing tagumpay ng Pilipinas bukod pa sa maipapaunawa sa taumbayan ang kahalagahan na ipaglaban ang WPS.

Binigyang diin ni hontiveros na kundi dahil sa commitment ni Aquino na unahin ang interes ng Pilipinas hindi makukuha ang nasabing tagumpay kung saan kinilala ang mga karapatan ng Pilipinas sa West Philippine Sea at kinontra ang pag-angkin dito ng China.