Judith Estrada-Larino

Mahigit 1,000 pamilya na ang nailikas ng provincial government ng Batangas simula nang mag-alburuto ang Bulkang Taal nuong isang linggo.

Ipinabatid sa DWIZ ni Ginoong Lito Castro, pinuno ng PDRRMC na nasa 1, 563 families o katumbas ng mahigit 5,000 indibidwal ang nasa mga evacuation center na.

Pinakamarami aniya silang nailikas kagabi matapos maitala ang mataas na pagbuga ng sulfur dioxide ng Bulkang Taal na nasa mahigit 22,000 tons.

Tiniyak pa ni Castro ang patuloy na supply ng pagkain sa mga apektadong residente partikular yung mga nasa evacuation center.

Ayon pa kay Castro, kailangan pa nilang bumili ng dagdag na N95 mask para na rin sa proteksyon ng mga residente laban sa volcanic   smog na ibinubuga ng Bulkang Taal.

Uubrang i-reimburse ng mga empleyado ng gobyerno ang gastos nila sa internet connection matapos mag work from home dahil sa pandemya.

Ipinabatid ito ni Budget Secretary Wendel Avisado matapos tukuyin ang nakasaad sa kanilang circular na maaaring ibalik ang P75.00 hanggang P300.00 kada buwan na gastos sa internet ng mga government employee na naka work from home.

Kailangan lamang aniyang magsumite ng mga kinakailangang dokumento ang mga regular, casual at contractural workers para maibalik sa kanila ng gobyerno ang gastos sa internet.

Mahaharap sa kaso ang mga healthcare worker na mapapatunayang sinadya ang pagkakamali sa pagturok ng COVID-19.

Tiniyak ito ni Health Undersecretary Maria Rosario Vergeire matapos sulputan sa social media ang video ng pagkakamali sa pagtuturok ng nasabing bakuna.

Gayunman binigyang diin ni Vergeire na wala naman silang nakikitang masamang intensyon o sasadyain ng isang healthcare worker na maliin ang pagturok ng bakuna dahil expert na ang mga ito sa pagbabakuna.

Una nang inihayag ng DOH na isasailalim nila sa re-orientation ang mga vaccinator upang matiyak na hindi na mauulit ang mga insidene ng tila pagmimintis sa pagbabakuna.

Tila sinermunan ni dating Ilocos Sur governor ngayong Narvacan Mayor Luis Chavit Singson si Senador Manny Pacquiao.

Sa gitna na rin ito nang tila banggaan nina Singson at Pacquiao sa pagtataas ng buwis sa tabako.

Sinabi sa DWIZ ni Singson na dapat pag-aralan muna ni Pacquiao ang isyu bago ito magbitiw ng mga salita hinggil dito.

Nakiusap na aniya siya kay Pacquiao na huwag nang isulong ang pagtataas ng buwis sa tabako dahil kawawa ang mga magsasaka at mamamatay ang industriya.

Malaking benepisyo sa mga bansang may limitadong supply ng COVID-19 vaccine ang mix and match ng iba’t ibang brand ng bakuna.

Ayon kay Health Undersecretary at Treatment Czar Leopoldo Vega, magbibigay ng matibay na immune response ang paghahalo ng doses ng bakunang Pfizer at AstraZeneca.

Bukod dito, sinabi ni Vega na  nananatiling dependent ang Pilipinas  sa isinasagawang clinical trials ng World Health Organization (WHO).

Aniya, kung magkakaroon man ng malinaw na rekomendasyon ay posibleng i-adopt ng national vaccination implementation ang naturang mix and match ng bakuna.

Una nang inanusiyo n Department of Science and Technology (DOST) ang pagsisimula ng pag-aaral para sa safety and efficacy ng mixing and matching ng limang COVID-19 vaccines ngayong buwan ng Hulyo.

Umamin ang Pangulong Rodrigo Duterte sa tila pagla-lobby ng ilang miyembro ng gabinete na masibak ang kapwa cabinet member nilang si Health Secretary Francisco Duque III.

Subalit sinabi ng pangulo na walang dahilan para sibakin si Duque na aniya’y nagta trabaho lang naman.

Ayon pa sa Pangulong Duterte irerespeto niya sakaling magpasya si Duque na magbitiw subalit nahihiya siyang tanggalin ang isang tao na walang kasalanan.

Mismong siya aniya ang nangumbinsi kay Duque na samahan siya sa kanyang administrasyon.

Magtitipon ngayong araw  ang mga multi-sectoral group upang isulong ang kandidatura ni Manila Mayor Isko Moreno sa pagka-pangulo sa susunod na eleksyon.

Inaasahang ngayong araw isasagawa ang pagpupulong ng mga grupo na manggagaling sa Metro Manila, Rizal at Cavite.

Ang nasabing pagpupulong ay para ipahayag kung karapat dapat na maging susunod na pangulo ng Pilipinas si “Yorme” sa sandaling mapagdesisyunan na nitong kumandidato sa 2022 elections.

Pangungunahan ni dating  Metro Manila Development Auhority (MMDA) general manager at “Ikaw Muna Pilipinas” lead convenor Tim Orbos.

Samantala, kabilang naman sa inaasahang magpapahayag ng kanilang mensahe ng pagsuporta  ang constitutionalist at dean  of graduate school of law ng San Beda College na si Fr. Ranhilio Aquino.

Malaya ang sinumang miyembro ng ruling party PDP Laban na mag-ober da bakod sa ibang partido.

Ayon ito kay Cabinet Secretary Karlo Nograles dahil walang pipigil sa kahit sinong miyembro nila kung nais nang kumalas sa ruling party.

Gayunman iginiit ni Nograles na nananatiling solido ang partido at walang paksyon.

Binigyang diin ni Nograles na isa lamang ang layunin ng partido at ito ay suportahan ang Pangulong Rodrigo Duterte bilang chairman ng PDP Laban sa gitna nang isyu nito kay Senador Manny Pacquiao na pangulo ng partido.