Judith Estrada-Larino

Sumuko sa mga otoridad sa President Quirino sa Sultan Kudarat ang 13 miyembro ng Bangsamoro Islamic Freedom Fighters (BIFF) – Karialan Faction.

Bukod sa mga sumuko, narekober ng mga tauhan ng 40th Infantry Battalion ang 13 armas na kinabibilangan ng tatlong M14 rifles, tig dalawang M79 grenade launchers, RPG launchers, 9mm submachine gun, tig isang Thomson rifle, M1 Garand rifle, Eddy’s US rifle at .50 sniper rifle kasama ang ilang round ng bala.

Ayon kay Major General Juvymax Uy, Commander ng Joint Task Force Central at 6th Infantry Division, nais nang mabuhay ng maayos ng mga nasabing rebelde kaya’t nananawagan sila sa iba pang rebelde na magbalik-loob na sa gobyerno at maging matiwasay na ang buhay kasama ang kanilang pamilya.

Tila naging ghost town ang mga supermarkets sa unang araw ng pagpapatupad muli ng ECQ sa kalakhang Maynila.

Ito ayon kay Steven Cua, pangulo ng Philippine Amalgamated Supermarkets Association ay dahil walang masyadong namili sa mga supermarket sa Metro Manila bagamat napuno ang mga supermarkets bago ang pagsisimula ng ECQ kahapon, Agosto 6.

Kasabay nito, pinaalalahanan ni Cua ang mga mamimili na naka depende sa mga supermarket ang patakaran bago pumasok dito habang nasa ilalim ng ECQ ang Metro Manila.

Nililimitahan din aniya ang mga taong pumapasok sa mga supermarket na ang ilan ay humihingi pa ng quarantine pass o kaya naman ay vaccination card.

Tinukoy ni Cua ang mahigpit na ipinatutupad ng pagmamay-ari niyang Wellcome Supermarket na health and safety protocols tulad ng temperature check at pagpapasuot ng face mask at face shield.

Tuluy-tuloy ang mahigpit na monitoring ng PNP sa implementasyon ng ECQ sa Metro Manila simula kahapon hanggang Agosto 20.

Ayon ito kay PNP Chief Police General Guillermo Eleazar sa gitna na rin nang pagkakasa ng adjustments sa ECQ implementation.

Sinabi pa sa DWIZ ni Eleazar na tuwing hapon naman ay nagkakaroon ng assessment ang Task Force COVID-19 shield sa naging sitwasyon sa buong mag hapon.

“Everytime na nagkakaroon ng unang implementasyon ng bagong quarantine, ay nagkakaroon ng mga konting adjustments. Ang atin namang Joint Task Force COVID-19 Shield ay nagkakaroon ng assessment every afternoon base dun sa mga input at reports na nakuha natin coming from the different units natin, ay napag-usapan yun para mas mai-apply natin ng mas maayos pa na implementasyon sa mga susunod na araw,” wika ni Eleazar

Tiwala naman si Eleazar na makukumpleto na ng mga non-APOR ang mga dokumentong kailangan para  sa checkpoint sa paghahatid ng mga APOR pagsapit ng araw ng Lunes.

“Inaasahan natin na yung binigay na palugit sa hapon at saka pati yung over the weekend, today at saka bukas, makakuha ng mga necessary documents itong mga non-APOR driver na dapat nilang ipakita doon sa mga nagtatrabaho na sa kanilang paglabas sa iba’t ibang lugar,” si PNP Chief Police General Guillermo Eleazar sa panayam ng DWIZ. —ulat ni Cely Ortega Bueno (Patrol 19)

Hihilingin ng DILG na mapasa sa panukalang Bayanihan 3 ang nasa halos P7-B para ipansuweldo sa dagdag na 25,000 contact tracers na tutulong sa COVID-19 response ng bansa hanggang sa susunod na taon.

Ayon ito kay DILG Undersecretary Epimaco Densing,III matapos nilang mapagpasyahan ang panukala para maabot ang ideal contact tracing ratio na 1 is to 800.

Bukod dito, ipinabatid ni Densing na dapat ding kumuha ang LGU ng sariling contact tracers nito para makatulong sa gobyerno na tukuyin ang mga posibleng may dala o nagtataglay ng Coronavirus.

Una nang inanunsyo ng DILG na inaprubahan na ng Pangulong Rodrigo Duterte ang pondo para sa rehiring ng 15,000 contact tracers na makakatuwang ng gobyerno sa pagtugon sa COVID-19 pandemic hanggang sa katapusan ng taong ito.

Sa kalagitaan ng susunod na linggo na ipapalabas ang cash assistance para sa mga pamilyang apektado ng muling pagsailalim sa ECQ ng Metro Manila simula kahapon.

Ayon ito ay DILG Undersecretary Epimaco Densing, III matapos maipasok sa bank accounts ng Local Government Units ang halos P11-B na cash assistance sa Metro Manila residents.

Gayunman, ipinabatid ni Densing na kailangan munang lumagda  ang DILG, DND at DSWD sa isang Joint Memorandum Circular na magsisilbing basehan sa cash DOLE distribution bago tuluyang ipalabas ang pera.

Kaugnay pa nito, sinabi ni Densing na gagamitin proseso sa pamamahagi ng cash assistance ang template na ginamit sa ipinatupad na ECQ noong Abril kaya’t inaasahan ng DILG na gagamitin ng LGU’s ang parehong listahan ng mga beneficiary.

Halos 2,000 ang nahuling lumabag sa curfew sa Metro Manila sa gitna nang ipinatutupad na ECQ sa Metro Manila.

Ayon kay PNP Chief Police General Guillermo Eleazar sa 1,848 curfew violators, 605 ang binigyan ng warning, 1, 235 ang pinagmulta at walo pang pinag community service.

Una nang ikinasa ang 8pm-4am curfew hours para na rin sa ipinatutupad na ECQ sa Metro Manila hanggang Agosto 20.