Judith Estrada-Larino

Bubuo ng Special Investigation Task Group (SITG)  ang PNP kaugnay sa nangyaring pamamaril kay Sulu Police Chief Police Colonel Michael Bawayan, Jr. Kahapon sa isang quarantine control point sa Barangay Asturias sa Jolo.

Ayon kay PNP Spokesman Brigadier General Ronaldo Olay, ang task group ay bubuuin kasama ng crime laboratory, regional investigation and detection ng BARMM at CIDG.

Wala pang ibang detalyeng inilabas si Olay dahil hinihintay pa aniya nila ang dagdag pang report mula sa Provincial Police Office partikular ang motibo sa nasabing krimen.

Si bawayan ay binaril ni Police Senior Staff Sergeant Imran Jilah na napatay din ng security detail ng hepe ng Sulu police.

Nananatiling bukas si Vice President Leni Robredo na tumakbo sa pagka Pangulo sa 2022.

Ito ayon kay Atty. Barry Gutierrez, Spokesperson ni Robredo ay kayat hindi pa kinukunsider ng Bise Presidente ang pagsuporta sa isang Presidentiable.

Kabilang dito aniya si Senador Panfilo Lacson na una nang nakausap ni Robredo na inalok ng senador ng pagkakaisa sa pamamagitan nang pagtakbo sa 2022 ng isa lamang sa kanila.

Sinabi ni Hutierrez na maaaring sa mga susunod na araw ay magpasya na si Robredo kung papalaot sa 2022 presidential elections.

Community transmission ang nasa likod nang pagkaka ospital ng ilang bata dahil sa COVID-19.

Ayon ito kay Dr. Jonas Del Rosario, spokesperson ng UP PGH matapos kumpirmahing isa sa mga batang isinugod sa kanilang ospital ang nasawi dahil sa Multi System Inflammatory Syndrome in Childhood (MIS-C) na isa sa mga epekto ng COVID-19 sa mga bata.

Gayunman sinabi sa DWIZ ni Del Rosario na hindi naman lahat ng kaso ng MIS-C ay nasasawi.

Namatay po. Meron po siyang tinatawag na Multi System Inflammatory Syndrome in Childhood. ‘Yan po ay isang effect ng COVID sa bata. Ang nangyayare po, magkaka-COVID ang isang bata. Tapos after a few weeks, 1-2 weeks or even a little bit more, bigla syang makaka-experience ng hyper inflammation ng marami nyang organs or any organs. Kidney, heart, tapos po they come in shock. Mababa po ang blood pressure, minsan po kailangan mabigyan ng support, mga gamot po sa puso. Minsan po it becomes complicated

Ipinabatid pa ni Del Rosario na ito rin ang findings ng mga duktor sa ibang bansa kapag nadale ang ilang bata ng COVID-19.

Yan po kahit sa abroad ang napansin kasi kadalasan talaga mild lang sa mga bata. Ito po ‘yung kinatatapos yung MIS-C. Ito pong a couple of weeks, napansin namin bihira kame makatanggap ng MIS-C sa PGH. Meron po kaming nakuhang dalawa kaagad in the same weeks which we felt like bakit ganon, parang mas nagiging sicker ‘yong mga pasyente nating bata.

Si Dr. Jonas del Rosario, Spokesperson ng UP PGH, sa panayam ng DWIZ.

Sisimulan na bukas, Agosto 8 ang 24 oras na bakunahan sa lungsod ng Maynila.

Inanunsyo ito mismo ni Manila Mayor Isko Moreno matapos aniyang maglabas ng guidelines ang DOH na dapat sundin ng bawat LGU para matiyak ang ligtas at efficient na pagbabakuna sa gitna ng umiiral na ECQ sa Metro Manila.

Kaugnay nito, tiniyak ni Moreno ang pagpapatupad ng mahigpit na scheduling system para sa pagbabakuna sa mga paaralan kung saan bibigyan ang bawat barangay ng slot numbers na ipapamahagi sa kanilang mga residenteng nais magpa bakuna.

Samantala, suspendido muna ngayong araw na ito ang pagbabakuna sa lungsod ng Maynila para bigyang daan ang ilang adjustments sa vaccination protocols habang nasa ECQ ang kalakhang Maynila at pagsisimula ng 24/7 na pagbabakuna kontra COVID-19.

Itinatwa ng University of the Philippines (UP) ang OCTA Research Group.

Ayon sa pamunuan ng UP, hindi sila affiliated sa nasabing research group at wala silang inindorsong anumang pag-aaral ng grupo hinggil sa COVID-19.

Binigyang diin ng UP na bagamat hinihimok nila ang kanilang alumni na magsagawa ng research at palakasin ang kanilang expertise para sa mga Pilipino, ang OCTA Research ay hiwalay sa research units ng unibersidad.

Ipinabatid pa ng UP na may pagkakaiba ang isinusulong ng individual UP researchers sa mga proyekto at programa ng official UP academic and research units na dala ang pangalan ng unibersidad, simbolo at maging approval.

Hindi anito ini-insponsoran, ini-endorso o inorganisa ng unibersidad ang mga initiatives partikular ng UP faculty at research staff members tulad ng polling, research at consultative activities ng OCTA Research Group.

Una nang pinaiimbestigahan ng limang kongresista ang qualifications at background ng nasabing research group.

Nananatiling bukas ang mga gate ng Ambuklao at Binga Dam.

Ayon sa Pagasa, apat na gate ng Ambuklao Dam ang bukas kaninang umaga at lima ang una nang nabuksan kahapon.

Ang reservoir water level (RWL) ng Ambuklao Dam ay nasa 751.66 meters na malapit na sa 752 meter normal high water level (NHWL).

Dalawang gates naman ng Binga Dam ang binuksan ngayong araw na ito tulad din kahapon.

Nasa 573.93 meters ang RWL ng Binga Dam na halos malapit na rin sa 575 meter NHWL nito.

Wala naman nang bukas na gate ang Ipo Dam kumpara kahapon kung kailan isang gate ang nakabukas.

Ibinasura ni US Judge Walter Schwarm ang kahilingan ng paradigm sports management na huwag ituloy ang bakbakan Manny Pacquiao at Errol Spence, Jr. sa Agosto 22.

Ayon kay Schwarm, mahina ang argumento ng paradigm management sa iginigiit na pagpapatigil sa Pacquiao-Spence bout.

Gayunman may tsansa pa ang sports management na ipatigil ang laban dahil inaasahang gagawin ngayong araw na ito ang final ruling ng superior court sa nasabing usapin.

Una nang binigyang diin ng paradigm na lumabag ang pambansang kamao sa naunang kasunduan nilang ang lalabanan ng senador ay si Mikey Garcia.

Tuluy tuloy ang mahigpit na pagpapatupad ng PNP ng health and safety protocols sa border control points sa Metro Manila.

Sa gitna na rin ito ng ikalawang araw nang pagpapatupad muli ng ECQ sa Metro Manila.

Sa ginagawang pagbabantay ng mga otoridad, marami nang pinabalik o hindi pinayagang mga non-apor na makatawid ng boundary.

Sa Batasan San Mateo Road na boundary ng Quezon City at Rizal Province, ilang motorista ang nadiskubreng non-apor kayat pinag u-turn kaagad ang mga ito para bumalik kung saan sila nanggaling.

Ayon pa sa PNP, pinabalik din ang ilang nanggaling sa San Mateo, Rizal na nagtangkang makalusot sa checkpoint sa pagsasabing bibili lamang sa isang fast food outlet sa Quezon City.

Samantala, dalawang pasahero ng isang jeep na may biyaheng pa Muntinlupa mula San Pedro, Laguna ang pinababa ng mga pulis dahil sa walang suot na face shield.

Mahigpit din ang checkpoint sa boundary ng Muntinlupa at San Pedro, Laguna na ang pagitan lamang ay isang tulay kung saan dalawang checkpoints ang itinalaga ng PNP.

Handang ampunin ng PDP Laban si dating Senador Ferdinand Bongbong Marcos, Jr.

Ito ayon kay Atty. Melvin Matibag, Secretary General ng Ruling Party ay kung tatanggapin ni Marcos ang mga panuntunan at prinsipyo ng kanilang partido.

Binigyang diin ni Matibag na tuluy tuloy naman ang recruitment nila ng mga bagong miyembro ng PDP Laban na ngayon aniya ay mayruon nang mahigit 100,000 miyembro.

Naglibot si PNP Chief Guillermo Eleazar sa ilang Quarantine Control Points (QCP) sa Metro Manila.

Ito ayon kay Eleazar ay para matiyak ang maayos na implementasyon ng mga alintuntunin sa unang araw nang pagpapatupad ng Ecq sa Metro Manila.

Kabilang sa mga ininspeksyon ni Eleazar ang QCP sa NLEX Harbor Link Karuhatan Exit, Bagong Barrio EDSA sa boundary ng Caloocan at Quezon City, Rizal Avenue Extension corner Second Avenue sa boundary ng Caloocan City at Maynila, R10 road sa boundary ng Navotas at Maynila, Paranaque Coastal Cavitex at sa PICC.

Ipinabatid ni Eleazar na 1, 203 PNP personnel ang naka deploy para sa law enforcement at public safety operations sa 89 QCP sa ibat ibang lugar sa Metro Manila.

Nasa 4, 346 policemen naman aniya ang nakatalaga sa Mobile Control Points (MCP) sa Metro Manila para sa implementasyon ng uniform curfew hours.

Sa labas naman ng NCR plus bubble, inihayag ni Eleazar na 9,180 police personnel ang idineploy sa 1,103 QCP’s.