Judith Estrada-Larino

Nasa moderate hanggang critical ang occupancy rate ng NCR dahil sa pagsirit ng kaso ng COVID-19 sa Metro Manila.

Ayon kay Dr. Bernadette Velasco, Operations Manager ng One Hospital Command Center, 55.7% ang critical care utilization rate ng NCR sa government hospitals, 50 hanggang 55% ang occupancy sa COVID-19 ward bed at nasa 45 hanggang 50% naman ang occupancy rate sa isolation beds sa mga government hospital.

Ipinabatid pa ni Velasco na nasa moderate risk level naman ang ICU beds sa mga pribadong ospital na nasa 65 hanggang 70% habang nasa 45 hanggang 50% nang okupado ang COVID-19 ward beds samantalang nasa 58% naman ang antas ng isolation beds.

Sinabi naman ni Dr. Alfonso Nuniez, Medical Director ng East Avenue Medical Center na tumaas ang kaso ng COVID-19 sa pagpasok ng huling linggo ng Hulyo at ang ICU utilization rate nila sa nakalipas na dalawa hangang tatlong linggo ay nasa pagitan ng 50 hanggan 60% subalit sa ngayon ay nasa 90% na ang ICU beds.

Sa Philippine General Hospital (PGH) naman, inihayag ni Dr. Jonas Del Rosario, Spokesperson ng ospital na nasa 153 ang naka admit sa kanila ngayon gayung ang bed capacity ay nasa 225 at malaking hamon sa kanila kung severe o critical at ICU set up.

Ikinasa na ni Vice President Leni Robredo ang ikatlong installment ng COVID-19 vaccination program ng kanyang tanggapan sa mga local officials ng Iriga City sa Camarines Sur.

Sa gitna na rin ito nang panawagan ni Robredo sa gobyerno na pabilisin ang pagbabakuna dahil sa pag usbong ng mas nakakahawang Delta variant ng coronavirus.

Tinaguriang Irigavax express ang naturang bakunahan sa Iriga ay isinagawa sa pakikipag ugnayan sa LGU na nagbigay ng COVID-19 vaccine supply at inaasahang mababakunahan ang 5,000 senior citizens.

Ang hakbang ayon kay Robredo ay bahagi ng patuloy at pinaigting na effort ng OVP para magkaloob ng logistics support sa LGU’s, makatulong sa mas mabilis at higit na efficient na pamamahagi ng bakuna sa mga residente.

Ipinag utos ni PNP Chief General Guillermo Eleazar sa lahat ng police commander na mahigpit na makipag ugnayan sa local chief executives hinggil sa sistema ng bakunahan sa kanilang lokalidad.

Ito ayon kay Eleazar ay para maiwasan ang pagdagsa ng mga tao gayundin ang pinangangambahang super spreader events sa mga lugar bakunahan sa Metro Manila.

Kasunod nito, pinakilos ni Eleazar ang lahat ng police regional offices na bumuo ng pulutong o balangay na magsisilbing quick reaction force na nakaantabay para tumugon sa sandaling dumagsa ang mga tao sa mga vaccination sites.

Kailangan aniyang maging handa ng mga quick reaction unit para ipakalat kaagad at makipag ugnayan sa mga LGU sa mga posibleng kanselasyon ng bakunahan sakaling mahirapan nang pigilan ang dagsa ng tao.

Nakabalik na sa bansa ang 202 Pinoy mula sa Macau na naapektuhan ng COVID-19 pandemic.

Ipinabatid ito ng DFA na nagsabi ring nasa 3,995 Pinoys ang nakinabang na sa repatriation program ng konsulado ng bansa.

Ayon kay Philippine Consul General to Macau Sar Porfirio Mayo, Jr.,tuluy tuloy ang pagtulong nila sa lahat ng mga Pilipinong nasa Macau na nais nang umuwi ng Pilipinas.

Ang nasabing batch ay ika-20 na aniyang repatriation flight na ikinakasa ng konsulado simula pa nuong Marso 2020 at sa Agosto 13 ang susunod na repatriation flight ng mga Pinoy mula sa Macau.

Inihayag ng konsulado na maaaring magpa rehistro sa https://tinyurl.com/repatmacau ang mga Pinoy sa Macau na gusto nang magbalik Pinas.

Pinalawig pa ng Baguio City government hanggang Agosto 15 ang pansamantalang suspensyon ng non-essential travels sa tinaguriang Summer Capital of the Philippines.

Ayon kay Baguio City Mayor Benjamin Magalong, kailangang palakasin ang mga hakbangin para hindi makahawa ang COVID-19 partikular ang Delta variant nito.

Gagamitin aniya nila ang panahong suspendido ang non-essential travels para tutukan ang border management, contact tracing at patient management sa lahat ng health facilities ng lungsod.

Tiniyak din ni Magalong ang pagpapalakas ng efforts upang pataasin ang health care capacity, pagbili ng mga gamot at iba pang supplies.

Ang Baguio City ay nakapagtala ng 373 active cases hanggang nitong nakalipas na Agosto 5 at 12 barangay sa lungsod ang kasalukuyang naka lockdown.

Hindi napigil ng ECQ ang Maginhawa Community Pantry.

Ayon kay Ana Patricia Non, founder ng Maginhawa Community Pantry, mismong ang mga volunteer nila ang dumirekta na sa bahay ng mga beneficiary para ibigay ang food packs.

Una nang tiniyak ni Non na itutuloy nila ang community pantry bagamat mismong ang volunteers nila ang magbabahay bahay para hindi na kailangan pang lumabas at pumila ang mga nais mabiyayaan ng kanilang food packs.

Uubra pa ring i-nominate o isulong ang pangalan ni Senador Manny Pacquiao bilang standard bearer ng PDP Laban sa national convention ng partido sa September 8.

Ayon ito kay Atty. Melvin Matibag, Secretary General ng PDP Laban.

Sinabi ni Matibag na mangyayari sa National Convention ang pagpili ng mga isasabong na kandidato ng ruling party tulad sa pagka presidente, bise presidente at senador kung saan nangunguna sa kanilang line up si Senador Manny Pacquiao.

Nuong Huwebes kinumpirma ng PDP Laban officials ang pag nominate sa tambalang Bong Go Rodrigo Duterte sa 2022 national elections.

Maayos sa pangkalahatan ang naging takbo ng unang araw nang muling pagpapatupad ng ECQ sa Metro Manila.

Ayon ito kay Paranaque City Mayor Edwin Olivarez, pinuno ng Metro Manila Council (MMC) ay kasunod na rin nang ikinasang checkpoints ng mga otoridad sa mga boundary ng mga lungsod sa NCR gayundin ng quarantine control points ng mga barangay.

Sinabi ni Olivarez na tila nasanay na ang publiko sa mga patakarang ikinakasa ng gobyerno lalo na’t ikatlong ECQ na ang ipinatutupad sa NCR ngayon.

Ilang motorista ang hindi nakalusot at pinabalik dahil sa kabiguang patunayang APOR sila partikular sa Caloocan, San Jose Del Monte, Bulacan at maging yung iba na nagtangkang pumasok sa Bacoor, Cavite.

Nakapiling na si Hidilyn Diaz ang kanyang magulang matapos ang halos dalawang taong pagkawalay dito.

Lumuwas mula Zamboanga City ang ama ni Diaz na si Eduardo at inang si Emelita kung saan niya excited na ipinakita ang gintong medalya na nakuha sa Tokyo Olympics.

Naging emosyonal ang pagkikita ni Diaz at kanyang mga magulang na pawang fully vaccinated na at sobra aniyang na-miss niya.

Tinatapos na ni Diaz ang kanyang quarantine matapos ang matagumpay na laban sa weightlifting sa Tokyo Olympics.

February 2020 nang tumulak pa Malaysia ang team ni Diaz para mag training sa Tokyo games subalit inabutin ng lockdown duon at hindi na nakabalik ng Pilipinas kaya’t dumiretso na pa Japan para sa Tokyo Olympics.

Wagi ang pambato ng Pilipinas sa Mrs. Tourism Universe 2021.

Nilampaso ni Hemilyn Escudero-Tamayo ang 30 pang kandidata sa idinaos na virtual Mrs. Tourism Universe Pageant.

Bukod sa titulo bilang Mrs Tourism Universe, nakuha rin ni Tamayo ang ilang special awards tulad ng Best in Talent, Best in Speech, Best in YouTube views at most viewed mother sa Facebok.

Nagpasalamat naman si Tamayo sa mga Pilipino at sa kanyang pamilya lalo na sa kanyang asawa na nagsilbing emotional at financial supporter niya.