Judith Estrada-Larino

Nag isyu na ng Emergency Use Authorization (EUA) ng Food and Drug Administration (FDA) ang  Hayat-Vax vaccine laban sa COVID-19.

Ayon kay FDA Director General Eric Domingo, ang Hayat-Vax vaccine ay inaprubahan para gamitin sa mga may edad 18 pataas.

Ipinabatid pa ni Domingo na ang Hayat-Vax ay identical o kapareho lamang ng Sinopharm vaccine dahil ito ang manufacturer ng naturang bakuna bagamat ang UAE ang pangalan ng  packaging nito.

Sinabi ng FDA na ang Hayat Vax vaccine ay mayroong 86% efficacy.

Gugulong na ngayong buwan ang home care package para sa COVID-19 patients.

Ayon sa DOH, buwan ng Abril nang una nilang binuo ang naturang home care package na ngayo’y isinasapinal na ng PhilHealth.

Sinabi ng DOH na nakikipag ugnayan na rin ang PhilHealth sa barangay health teams na binuo ng DILG para sa roll-out ng home care package sa buong bansa.

Laman ng naturang package ang mga vitamin at paracetamol gayundin ang mga instruction para sa kaukulang medical consultation sa pamamagitan ng telemedicine providers.

Makikinabang sa ayuda ng Taguig City Government ang lahat ng mga residente nito lalo na ngayong umiiral ang ECQ hanggang sa Agosto 20.

Kasunod na rin ito nang pagtiyak ng Taguig City Government sa P250,000 na mapapasakamay ng kada barangay para ipambili ng dagdag na food packs para sa kanilang mga residente bukod pa sa regular na city aid.

Ang barangay assistance ay hiwalay din sa halos 300,000 relief packs na direkta namang ipinamamahagi sa mga mamamayan ng syudad.

Noong isang linggo ay natanggap na ng mahigit 200,000 pamilya ng Taguig City ang food pack na naglalaman ng bigas, de lata, kape, energy drinks at instant noodles.

Ayon kay Taguig City Mayor Lino Cayetano, ang city aid at food packs ay bukod pa sa cash assistance mula naman sa national government at patuloy aniya ang paghahanap nila ng mga paraan para mas protektahan ang bawat taguienio partikular ang paggulong ng vaccination program kontra COVID-19 ng lungsod.

Napasakamay ng bansa ang panibagong supply ng COVID-19 vaccines ng Sinopharm mula sa United Arab Emirates (UAE).

Ang shipment ng 100,000 doses ng Sinopharm vaccines ay dumating sa NAIA pasado alas-2 ng hapon kahapon.

Ipinabatid ni Vaccine Czar Carlito Galvez, Jr. na balak pang mag-donate ng UAE ng 500,000 doses ng Sinopharm na una nang nakatanggap ng Emergency Use Authorization sa Pilipinas noong Hunyo.

Ayon sa World Health Organization (WHO) ang Sinopharm vaccine ay mayroong efficacy rate na 79% laban sa COVID-19 at maging laban sa pagkaka-ospital.

Nananatiling mas mababa sa 3,000 ang napapa-ulat na kaso ng COVID-19 sa National Capital Region (NCR).

Ayon ito sa OCTA Research Group bagamat maaari pa anitong maiba ang projections dahil hindi pa malinaw ang trend.

Sinabi ni Professor Guido David, isa sa mga convenor ng OCTA Research Group na kailangang ma obserbahan pa ang sitwasyon sa mga susunod na araw bagamat nakikita naman nila aniyang mako-contain ang bilang ng mga kaso na hindi na siya lalampas ng 3,000.

Naka depende aniya sa trend kung gaano kabilis itong makontrol lalo na’t mahirap na kalaban ang Delta variant ng Coronavirus kaya’t hindi pa masasabi kung sapat na ang dalawang linggong ECQ.

Iaanunsyo na sa susunod na buwan ng Aksyon Demokratiko ang official candidates para sa 2022 National at Local elections.

Sa gitna na rin ito, ayon kay Ernest Ramel, Jr. , Secretary General ng Aksyon Demokratiko ng commitment ng partido kay Manila Mayor Isko Moreno sakaling tumakbo itong presidente bagamat bukas sila sa iba pang presidentiables maliban lamang sa mga kandidato ng duterte administration.

Sinabi ni Ramel na nakipag-usap na ang kanilang partido kina Vice Presidente Leni Robredo, Senador Panfilo Lacson at posibleng running mate Senate President Vicente Sotto, III.

Pumapalo na sa 68 ang mga unibersidad na nagsisilbing vaccination sites.

Ayon sa Commission on Higher Education (CHED), 11 unibersidad ang ginawang vaccination centers sa Metro Manila.

10 namang unibersidad sa Davao ang nagsisilbing vaccination centers at tig-6  sa CALABARZON, Soccsksargen at Zamboanga Peninsula.

Kaugnay nito, hinimok ni CHED Chair Prospero De Vera, III ang mga unibersidad na maging vaccination hub para mapabilis ang pagbabakuna ng gobyerno.

Palapit na sa Moderate Risk Classification ang Healthcare Utilization Rate (HCUR) ng bansa sa patuloy na pagsirit ng kaso ng nasabing virus.

Ayon ito kay Treatment Czar Health Undersecretary Leopoldo Vega.

Kabilang aniya sa mga hotspots ang Metro Manila, Regions 1, 3, 6, 7 at 10 kung saan mayroong steady increase sa COVID-19 cases ang Laoag, Pampanga at Bulacan.

Sa Mindanao, inihayag ni Vega na bumaba ng bahagya bagamat itinuturing pa ring considerably high ang mga kaso ng COVID-19 sa Mindanao.

Sinabi ni Vega na ang HCUR ng Metro Manila ay tinukoy na bilang moderate risk dahil okupado na ng 58-60% ang mahigit 9,000 COVID 19  beds sa NCR.

Kakayanin ng healthcare system ng bansa ang pagsirit ng COVID-19 cases.

Ito ayon kay Health Undersecretary Maria Rosario Vergeire ay kung severe at critical cases lamang ang maa-admit sa mga ospital.

Sinabi ni Vergeire na sasapat ang kasalukuyang kapasidad ng mga ospital na tumugon sa severe at critical cases kung tuluy-tuloy ang dalawang linggong lockdown hanggang mag MECQ na sa Metro Manila.

Kasabay nito, hinimok ni Vergeire ang mild at asymptomatic COVID-19 patients na magtungo sa mga temporary treatment at monitoring facilities samantalang ilang hotels ang nai convert na bilang COVID-19 facilities para sa mas kumportableng isolaton period.

Nagdulot ng pagguho ng lupa sa Pagudpud, Ilocos Norte ang malakas na ulan dulot ng Habagat.

Ayon sa mga otoridad, naganap ang landslide sa PAN Philippine Highway pasado alas-6 kaninang umaga.

Kaagad namang nagsagawa ng clearing operations ang DPWH kaya’t nakadaan din ang mga sasakyan.