Judith Estrada-Larino

Nauubusan na ng pera ang mga OFW patungong Hongkong habang naghihintay sa pagkilos ng gobyerno kaugnay sa kanilang vaccination cards.

Kasunod na rin ito nang hindi pagkilala ng Hongkong government sa vaccination card ng mga Pinoy na magtatrabaho rito maliban na lamang ang vaccination certificate na kikilalanin ng World Health Organization para papasukin ang mga dayuhang domestic workers sa lungsod.

Dahil dito, nangangamba na ang maraming OFW kung makakapag-trabaho pa sa Hongkong lalo pa’t halos apat na buwan na silang nasa Maynila mula sa mga lalawigan habang naghihintay ng kanilang vaccination cards o certificate para tuluyang makapasok ng Hongkong.

Tiniyak naman ng Malakaniyang na kumikilos ang gobyerno para magkaruon ng basehan na kilalanin ang vaccination cards na iniisyu ng pamahalaan kasabay ang apela sa WHO na pangunahan ang hakbangin para sa universal acceptance ng vaccination cards.

Kailangan pa ng pag-aaral bago maisulong ng gobyerno ang plano nitong paggamit ng COVID -19 vaccine ng Astrazeneca bilang second dose sa Sputnik V.

Ayon ito kay FDA Director General Eric Domingo dahil ang unang component ng Sputnik V ay tinatawag na Sputnik light na maaaring ibigay bilang single dose na dapat pang busisiin.

Ini-evaluate na aniya ng vaccine experts ng bansa ang sputnik light at maaaring magpalabas ng resulta ng pag- aaral sa mga susunod na araw o linggo.

Gayunman ..ipinabatid ni Domingo na halos magkapareho ng component ang Astrazeneca at Sputnik V vaccines na mayroong magkaibang components para sa una at ikalawang dose nito.

Una nang inihayag ni Vaccine Czar Carlito Galvez, Jr. na posibleng gamitin ang Astrazeneca vaccine bilang second dose kapag hindi dumating ang supply ng Sputnik V sa bansa.

Inaasahang darating bukas, Agosto 13 ang 15K doses ng component number 2 ng Sputnik V o ikalawang shot nito.

Pinapaplantsa na ng DILG ang anito’y mga sablay sa unang araw nang pamamahagi ng ayuda sa mga lugar na nasa ilalim ng ECQ.

Gayunman inihayag ni DILG Undersecretary Jonathan Malaya na naipaliwanag na sa mga recipient na mayroong schedule na dapat sundin ang pamamahagi ng ayuda kayat hindi ito madadaan sa pag-uunahan.

Binigyang diin ni Malaya na hindi pinupulitika ang pamamahagi ng ayuda dahil sa monitoring sila upang matiyak na walang makikialam na iba maliban sa mga opisyal na itinalagang mangasiwa nito.

Naging maayos naman ang pamamahagi ng ayuda sa lungsod ng Maynila kung saan nasa halos P75 milyon ang naipalabas na para sa mahigit 18k beneficiaries.

Tiniyak ni DFA Secretary Teodoro Locsin ang pormal na pakikipag-ugnayan kay Hongkong Chief Executive Carrie Lam.

Ayon kay Locsin, kukumbinsihin niya si Lam na kilalanin ng Hongkong government ang mga vaccination card ng mga Pilipinong magtutungo sa Hongkong.

Ipinabatid ni Locsin na gumagawa na rin ng paraan ang konsulado ng bansa sa Hongkong para magkaroon ng vaccination Certificates mula sa Philippine Bureau of quarantine.

Magugunitang hindi kinikilala ng Hongkong  government ang vaccination card ng mga Pinoy na magta-trabaho rito, maliban na lamang ang vaccination certificate na kikilalanin ng World Health Organization para papasukin ang mga dayuhang domestic workers sa lungsod.

Kailangang mag-focus ang gobyernong Duterte sa pagtugon sa COVID-19 pandemic.

Ito ayon kay Vice President Leni Robredo ay sa halip na mamahiya ng tao sa kanilang nakaraan.

Ang pahayag ay kaugnay sa pag kuwestyon ng Pangulong Rodrigo Duterte sa moral ascendancy ni Manila Mayor Isko Moreno na dating sexy actor para pangunahan ang bansa.

Binigyang diin ni Robredo na “all in” dapat ang pagtugon sa pandemya at huwag ungkatin ang nakalipas ng isang tao at mas maraming magagawa kung itutuon ang lakas sa pagtutulungan.

Hindi aniya nakakatulong na decongest o mapaluwag ang mga  ospital, paggaling ng COVID-19 patients o makapagbigay ng trabaho sa mga nawalan ng hanapbuhay dahil sa quarantine restrictions ang pakikipag-away o pakikialam sa nakalipas ng isang tao.

Hinimok ni Supreme Court Associate Justice Marvic Leonen ang bar applicants na magpa-bakuna kontra COVID-19 partikular ang mga nasa priority group tulad ng senior citizens at persons with co-morbidities.

Ito ayon kay Leonen ay para na rin sa proteksyon ng bar personnel at examinees.

Kaugnay nito, ipinabatid ni Leonen na nakikipag ugnayan na sila sa COVID-19 Task Force para mapasama sa pagbabakuna ang mga aplikanteng hindi bahagi ng priority groups.

Dapat aniyang matiyak na full vaccinated na bago ang November Bar Examination ang mga bar applicant.

Walang balak ang Kamara na patahimikin ang OCTA research group sa mga report nito kaugnay sa COVID-19.

Ayon ito kay Congressman Jesus Bong Suntay matapos isulong ang imbestigasyon sa OCTA Research Group.

Hindi aniya witch hunt ang imbestigasyon sa Kamara hinggil sa operasyon ng grupo matapos niyang mabalitaang tila nabahala ang isa sa mga convenor ng OCTA Research na si Professor Ranjit Rye na matulad sa sinapit ng ABS-CBN.

Una nang iginiit ni Suntay kasama sina Congresswomen Bernadette Herrera-Dy, Kristine Singson-Meehan, Sharon Garin at Stella Luz Quimbo na mabusisi ng Kamara ang qualifications, research methodologies, partnerships at composition ng OCTA Research Group kaya’t wala anilang dapat itong ikabahala sa naturang imbestigasyon.

Binakbakan ng Makabayan Bloc ang Pangulong Rodrigo Duterte matapos nito anilang malisyosong atakihin si Manila Mayor Isko Moreno.

Ayon sa Makabayan Bloc, may hugot pulitikal ang iniisyu ng pangulo kay Moreno na isa sa mga posibleng presidentiable sa 2022 National Elections.

Inihayag ng grupo ng mga kongresista sa Kamara na nakakalungkot ang pamemersonal ng Pangulong Duterte laban kay Moreno hindi dahil sa bigo ito sa kanyang tungkulin bilang public servant kundi nakikita itong kalaban ng palasyo sa pina-plano anitong Duterte Dynasty sa 2022.

Binigyang-diin pa ng Makabayan Bloc na ang gobyernong Duterte ang hindi organisado sa pagtugon sa COVID-19 pandemic matapos kuwestyunin ng grupo ang kabiguan ng pamahalaan na ipalabas ang mahigit P10-B na tulong pinansiyal sa ilalim ng Bayanihan 1 at 2.

Bukas si Caloocan City Mayor Oscar Malapitan sa posibilidad na mapalawig pa ang umiiral na ECQ sa Metro Manila.

Ayon kay Malapitan, suportado ng city government ang anumang mga panuntunang ipalalabas sakaling ma-extend ang ECQ sa Kalakhang Maynila.

Marami pa naman aniyang araw para i-monitor ang trend ng bilang ng COVID-19 sa NCR.

Inamin ni malapitan na mahigit pa sa doble ang pagsirit ng kaso ng COVID-19 sa lungsod kung saan naitatala ang 70 hanggang 100 bagong kaso araw araw mula sa 30 lamang noong nakalipas na buwan.

Subalit nasa 50% lamang ng hospital beds sa kanilang lungsod ang okupado.