Judith Estrada-Larino

Umapela si Senate Energy Committee Chair Sherwin Gatchalian sa mga kinauukulan partikular sa Local Government Units na payagan ang onsite meter readings sa mga lugar na naka-lockdown.

Ito ayon kay Gatchalian ay para matiyak ang tamang pag kuwenta ng bayarin sa kuryente ng mga consumer at huwag nang maulit ang naranasang bill shock nuong isang taon.

Binigyang diin ni Gatchalian na kung tama ang singil sa kuryente, walang dahilan para hindi bayaran ang nakunsumong kuryente.

Kasabay nito, nanawagan din si Gatchalian sa ERC na himukin ang iba pang distribution utilities na sumunod sa No Disconnection Policy ng Meralco habang nasa ECQ at MECQ ang mga nasasakupang lugar.

Kumpirmasyon ng matagal nang sinasabi ng mga senador hinggil sa mga kapalpakan at pagkukulang ng Department of Health sa pagtugon sa pandemya.

Ito ayon kay Senador Francis Kiko Pangilingan ang pinatutunayan ng report ng Commission on Audit (COA) hinggil sa hindi maayos na paggamit ng DOH sa mahigit P67 bilyon na pondo para sa laban kontra COVID-19 na dahilan din kayat itinuturing ang Pilipinas bilang worst performer sa COVID-19 response sa buong Western Pacific Region.

Sinabi naman ni Senador Joel Villanueva na maaaring kailangang kumuha ng DOH ng mahusay na tao na mangangasiwa sa pagbili at pag deploy ng medical supplies.

Dahil lumilitaw aniya sa COA report na hindi nabili ang P2 bilyong halaga ng mechanical ventilators at walumput walong X-ray machines na kailangan ng COVID-19 patients gamit ang naturang pondo.

Kawalang kakayahan o pagiging incompetent ng mga namumuno sa Department of Health.

Ito ayon kay Senador Panfilo Lacson ang lumalabas kasunod ng findings ng COA hinggil sa deficiency o hindi maayos na pangangasiwa at paggamit ng DOH sa mahigit P67 bilyon na pondo para sa COVID-19 response.

Sinabi ni Lacson na mula sa pag drop the ball o pagka unsyami sa ini-lobby ng bakuna sa Amerika nina DFA Secretry Teodoro Locsin Jr. at Ambassador Babes Romualdez. Ngayon naman ay hindi kinikilala ng hongkong ang iniisyung vaccination card sa bansa.

Nadagdag pa aniya ngayon ang hindi nagagamit na halos P68 bilyon na pondo habang nagmamakaawa ang health workers na mabayaran sa kanilang P5,000 special risk allowance.

Magugunitang kinuwestyon nuon ng mayorya ng mga senador ang kakayahan ni Health Secretary Francisco Duque na pangasiwaan ang laban sa COVID-19 pandemic kasunod ang pagpapasa ng resolusyon na nagsusulong na magbitiw na sa puwesto ang kalihim.

Isinusulong ni Senate President Vicente Sotto III ang pagbusisi sa usapin ng vaccination card.

Ito ay matapos hindi kilalanin ng Hongkong ang vaccination card na bitbit ng mga OFW.

Ayon kay Sotto, mas mabuting magsagawa ng pagdinig ang senado upang malaman kung ano ang uubrang gawin para maresolba ang problema at mabatid kung talaga bang kailangan ang vaccination cards na tinututulan ng ilang sektor.

Samantala, muling isinulong ni Senador Grace Poe ang pag iisyu sa mga fully vaccinated na ng vaccine passport na isang standard vaccine card na mayruong central database na maaaring may QR code at kaukulang safety features upang mabilis ma verify at maiwasang mapeke.

Mayorya ng mga nasasawi sa COVID-19 sa Visayas Region ay hindi bakunado.

Ayon ito kay Dr. Helen Madamba, Chief Implementer ng COVID-19 Health Facility ng Vicente Sotto Memorial Medical Center sa Cebu City matapos i-report na nasa 47 COVID-19 deaths ang naitala nila mula Agosto 1 hanggang 8 at ilan sa mga nasawi ay bata.

Sinabi ni Madamba na binabantayan nila ang bilang ng mga nasasawi sa COVID-19 sa kanilang ospital dahil nagkaka problema sa paglalabas at pagdadala ng mga labi sa punenarya at paglilibing sa mga ito sa mga sementeryo.

Ang nasabing ospital ay end referral center para sa virus patients sa Cebu.

Nasa Alert level 0 na o normal na ang estado ng Bulkang Pinatubo.

Ito’y ayon sa Phivolcs ay matapos ang tuluyang pagbaba ng earthquake activity at bumalik sa tinatawag na baseline seismic parameters.

Mula Hulyo 1 hanggang Agosto 11, nasa 104 volcanic earthquakes ang naitala sa Bulkang Pinatubo o dalawa hanggang tatlong events kada araw.

Samantala,naitala ang 141 volcanic earthquake sa taal volcano sa nakalipas na 24 oras habang nananatili ito sa Alert level 2 .

Mayruon ding mga pagyanig na naitatala kada dalawa hanggang 30 minuto.

Nauubusan na ng pera ang mga OFW patungong Hongkong habang naghihintay sa pagkilos ng gobyerno kaugnay sa kanilang vaccination cards.

Kasunod na rin ito nang hindi pagkilala ng Hongkong government sa vaccination card ng mga Pinoy na magtatrabaho rito, maliban na lamang ang vaccination certificate na kikilalanin ng World Health Organization, para papasukin ang mga dayuhang domestic workers sa lungsod.

Dahil dito, nangangamba na ang maraming OFW kung makakapag trabaho pa sa Hongkong lalo pa’t halos apat na buwan na silang nasa Maynila mula sa mga lalawigan habang naghihintay ng kanilang vaccination cards o certificate para tuluyang makapasok ng Hongkong.

Tiniyak naman ng Malakaniyang na kumikilos ang gobyerno para magkaruon ng basehan na kilalanin ang vaccination cards na iniisyu ng pamahalaan kasabay ang apela sa WHO na pangunahan ang hakbangin para sa universal acceptance ng vaccination cards.

Mahigit 600 pulis ang ipinakalat ng PNP para magbantay sa pamamahagi ng ayuda sa iba’t ibang lugar sa Metro Manila.

Ayon ito kay PNP Spokesperson Brigadier General Ronaldo Olay, bilang dagdag puwersa na rin sa iba pang otoridad na nagbabantay sa ayuda distribution tulad ng Barangay officials.

Ipinabatid pa ni Olay na nakita mismo ni PNP Chief Gullermo Eleazar ang maayos na pamamahagi ng ayuda sa apat na lugar na pinuntahan mismo nito para makita ang sitwasyon.

Ayos naman, at lahat ay sumusunod sa pila sa pagkuha ng kanilang ayuda at nakipag-enggage pa nga siya sa mga local leaders doon sa mga pinuntahang siyudad. Dito sa San Juan pinuntahan nya ‘yan, sa may Mandaluyong, sa Manila tsaka Quezon City. ‘Yong ating NCRPO naman ay naglatag din ng kanilang security sa mga bigayan ng ayuda. At merong 1,192 na personnel na ginamit sa security elements natin. At syempre hindi naman lahat magagampanan ‘yan. May katuwang tayo mga cross multipliers from the barangay. 803 ang nagamit natin dyan.

Si PNP Spokesperson Brigadier General Ronald Olay sa panayam ng DWIZ.

Naka depende sa kung gaano kabilis ang gobyerno na makakuha ng supply ng Pfizer vaccines ang pag babakuna sa mga kabataan sa bansa.

Ayon ito kay FDA Director General Eric Domingo na nagsabing tanging ang Pfizer lamang ang aprubadong brand ng COVID-19 vaccine para maiturok sa mga may edad 12 pataas.

Magugunitang ibinalita ni vaccine Czar Carlito Galvez, Jr. na maaaring gumulong sa katapusna ng Setyembre o unang bahagi ng Oktubre ang pagbabakuna sa mga bata, depende sa supply ng Pfizer vaccines.

Ito ay bagamat iginigiit naman ni Health Secretary Francisco Duque III na mananatili ang polisiya ng gobyerno na i-delay muna ang pagbabakuna sa mga bata at teenagers sa bansa.

Kailangan pa ng pag-aaral bago maisulong ng gobyerno ang plano nitong paggamit ng COVID-19 vaccine ng Astrazeneca bilang second dose sa Sputnik V.

Ayon ito kay FDA Director General Eric Domingo dahil ang unang component ng Sputnik V ay tinatawag na Sputnik light na maaaring ibigay bilang single dose na dapat pang busisiin.

Ini-evaluate na aniya ng vaccine experts ng bansa ang Sputnik light at maaaring magpalabas ng resulta ng pag-aaral sa mga susunod na araw o linggo.

Gayunman, ipinabatid ni Domingo na halos magka pareho ng component ang Astrazeneca at Sputnik V vaccines na mayruong magkaibang components para sa una at ikalawang dose nito.

Una nang inihayag ni Vaccine Czar Carlito Galvez, Jr. na posibleng gamitin ang Astrazeneca vaccine bilang second dose kapag hindi dumating ang supply ng Sputnik V sa bansa.

Inaasahang darating bukas, Agosto 13 ang 15,000 doses ng component number 2 ng Sputnik V o ikalawang shot nito.