Judith Estrada-Larino

Hindi na mapipigilan ang patuloy na pagsirit ng kaso ng COVID-19 sa bansa na maaaring pumalo pa sa 18k hanggang 19k ang mga bagong kaso kada araw.

Babala ito ni Professor Jomar Rabajante ng UP COVID- 19 pandemic response team kasunod nang pagtaas pa ng kaso ng COVID-19 dahil sa delta variant ng coronavirus.

Sinabi ni Rabajante na ang Pilipinas ay mayroong mahigit 20% na positivity rate o katumbas ng isa sa limang sumalang sa COVID-19 test ay positibo.

Binigyang diin ni Rabajante na tuluy tuloy ang pagtaas ng COVID-19 cases sa mga susunod na araw dahil hindi naman kaagad mararamdaman ang epekto ng ECQ.

Kasabay nito, umapela si Rabajante sa gobyerno na huwag lamang i-focus sa Metro Manila ang interventions nito dahil malaki rin ang pagsirit ng kaso ng COVID-19 sa mga lalawigan.

Pinamamadali ni Congressman Ronnie Ong ang pag-apruba sa panukala niyang vaccination passport law.

Ito ayon kay Ong ay para maiwasang maharang ang mga Pilipinong lalabas ng bansa tulad nang sinapit ng ilang OFW pa Hongkong na hindi kinilala ang dala nilang locally issued vaccination cards.

Binigyang diin ni Ong na maayos sanang makakapasok ng Hongkong ang mga OFW kung naging mas pro active lamang ang gobyerno sa paggawa ng isang national vaccination database at national vaccination card.

Hindi aniya masisisi ang Hongkong sa hindi pagkilala sa vaccination cards ng in-bound OFWs dahil wala talagang paraan para i-verify ang authenticity ng mga dokumento.

Sinabi pa ni Ong na napepeke na ang RT-PCR COVID-19 swab test result kaya’t malaki ang posibilidad na mapeke rin ang vaccination cards.

Nakatakdang magpalabas pa ngayong araw na ito o bukas ng dagdag na P278 milyon ang national government.

Ito ayon kay Budget OIC Undersecretary Tina Canda ay para mas maraming residente pa sa Metro Manila ang makatanggap ng ayuda sa gitna nang umiiral na ECQ hanggang Agosto 20.

Kasabay nito, ipinabatid ni Canda na mayruon na ring notice of approval para sa financial assistance sa Laguna at Bataan at posibleng maipamahagi ito ngayong araw o bukas.

Mayruon na rin naman aniyang approved budget para sa cash aid ang Iloilo, Gingoog, Misamis Oriental at Cagayan de Oro.

Subalit nilinaw ni Canda na hindi kasama sa nabigyan ng alokasyon ang Tuguegarao na naka 10 day lockdown.

Ginagamit na ring bakunahan ang Borongan Cathedral sa Eastern Samar.

Kasunod na rin ito nang inilaan ng Local Government Unit ng borongan na 560 doses ng Moderna vaccine para sa mga senior citizens, persons with comorbidities at economic frontliners.

Ayon sa Eastern Samar Provincial Health Office, nasa 59,000 residente na ng bayan ng Borongan ang nakatanggap ng unang dose ng bakuna habang nasa 31,000 na ang naka kumpleto ng kanlang ikalawang dose.

Pasok na rin ang mga buntis sa priority groups para mabakunahan kontra COVID-19.

Inihayag ni Health Undersecretary Maria Rosario Vergeire na rerepasuhin nila ang kanilang mga panuntunan para mapabilang ang mga buntos sa expanded A3 group.

Ayon kay Vergeire, batay sa rekomendasyon ng DOH experts, ligtas para sa mga buntis ang COVID-19 vaccines at mahigpit na inirerekomenda ang pagbabakuna sa mga nasa ikalawa o ikatlong trimester na ng kanilang pagbubuntis.

Uubra rin aniyang mabakunahan ang mga buntis na nasa unang trimester ng kanilang pagdadalangtao bagamat kailangan ng medical clearance mula sa kanlang duktor.

Subalit ipinabatid ni Vergeire na tanging ang COVID-19 vaccine na Sputnik V lamang ang hindi maaaring iturok sa mga buntis.

Tuluy tuloy ang hawahan ng COVID-19 sa buong bansa sa gitna na rin na banta ng higit na nakakahawang Delta variant ng Coronavirus.

Ayon ito sa OCTA Research Group matapos nitong maitala sa 1.41 ang reproduction number ng COVID-19 sa buong bansa.

Nasa 21% naman ang national positivity rate o bilang ng COVID-19 tests sa bansa na nag positibo.

Dahil dito, ibinabala ni Professor Guido David, fellow ng OCTA Research Group na mas lalala pa ang sitwasyon dulot ng COVID-19 sa mga susunod na araw.

Sinabi ni David na nangunguna ang Quezon City sa listahan ng Local Government Units na nakapagtala ng pinakamaraming bagong kaso o nasa 467 mula Agosto 5 hanggang 11.

Pasok din aniya sa limang LGU na nakapagtala ng  pinakamataas na bagong kaso ng COVID-19 ang lungsod ng Maynila – 304 cases, Cebu City – 275, Makati City – 195 at Davao City – 175.

Ipinabatid ni David na ang Cebu City, Imus at Tuguegarao ay nasa critical level kapwa sa naitatalang average daily attack rate at ICU occupancy.

Ayaw pang magpaka kampante ng PNP kahit pa naging maayos at generally peaceful ang unang araw ng pamamahagi ng ECQ ayuda sa Metro Manila.

Ipinabatid ito ni PNP Chief Police General Guillermo Eleazar matapos bumisita sa ilang ayuda centers sa mga lugar sa Maynila at Quezon City.

Kabilang sa mga ininspeksyon ni Eleazar ang ayuda centers sa Benigno Aquino Elementary Schools sa Barangay Commonwealth at Corazon Aquino Elementary School sa Barangay Batasan na kapwa nasa Quezon City.

Pagkatapos nito ay nag tungo naman sa ayuda centers sa manila High School at Marcelo Agoncillo Elementary School sa lungsod ng Maynila.

Sinabi ni Eleazar na patuloy ang paalala ng PNP sa publiko lalo na sa mga kukuha ng ayuda na sumunod sa mga itinakdang panuntunan para maiwasan ang anumang aberya. — ulat mula kay Jaymark Dagala (Patrol 9).

Pinag-aaralan na ng PNP na tanggalin ang mga inilatag na checkpoint sa Metro Manila.

Kasunod na rin ito ng mga reklamong nagsisilbi lamang chokepoints ang mga nasabing checkpoints dahil nagiging sanhi ito ng mabigat na daloy ng trapiko.

Ayon kay PNP Chief Police General Guillermo Eleazar, magandang hakbang sana ito para sa kanila lalo pa’y mailalagay nila ang mga pulis sa mga lugar kung saan sila mas higit na kinakailangan tulad ng ayuda centers.

Gayunman, sinabi ni Eleazar na mangyayari lamang ang pag alis ng checkpoints kung magagawa na ng mga Pilipinong sumunod sa quarantine at health protocols para hindi kumalat ang COVID-19.

Samantala, muling nag ikot si Eleazar para tingnan ang barangayanihan partikular sa katimugang bahagi ng Metro Manila. — ulat mula kay Jaymark Dagala (Patrol 9).

Patuloy na iniimbestigahan ng Bureau of Fire Protection ang naganap na gas leak sa isang construction site sa harap ng Akari building sa 21st Drive sa BGC, Taguig.

Ayon kay Fire Supt Bernard Rosete, posibleng ang naging sanhi ng sunog ay ang damaged gas pipe sa construction site kung saan maaaring nagdi-drill at mayruong tinamaang pipeline, naiwan ang drilling machine kayat nagkaruon ng pagliyab.

Magugunitang isang lalaki ang nagtamo ng third degree burns sa nasabing gas leak na nagdulot ng pagsabog.