Jenn Patrolla

Tumaas ng mahigit 70% ang mga scam call sa bansa nitong unang quarter ngayong taon.

Batay sa datos ng anti-scam application na Whoscall, umabot sa 351,699 ang nakakatanggap ng scam call, na mas mataas kumpara sa 201,760 na naitala noong huling quarter noong 2024.

Ayon kay Gogolook Philippines Country Head Mel Migriño, Whoscall App Developer, bukod sa text scam, lumipat na ang mga scammer sa scam call o mang-iscam sa pamamagitan ng tawag sa social media platforms tulad ng Viber.

Dahil dito, hinimok ni Migriño ang National Telecommunications Commission at cybercrime investigation and Coordinating Center na i-update ang mga miyembro ng mga platform upang maiwasan.

Ibinunyag ng pamahalaan na nangunguna ang National Capital Region sa may pinakamataas na bilang ng insidente ng vote-buying sa bansa.

Ito ang sinabi ni Commission on Elections Commissioner Ernesto Ferdinand Maceda batay sa kasaysayan ng mga nakaraang halalan.

Ayon kay Commissioner Maceda, nasa mahigit dalawampung reklamo ang nakahain sa comelec na may kinalaman sa vote-buying.

Pumapangalawa naman ang Region 4-A o Mega Manila sa mga lugar na may mataas na bilang ng vote-buying incidents.

Sa mga probinsya naman, kabilang sa top five ang Palawan, Abra, at Camarines Sur.

Inaalam na ng mga otoridad sa Qatar kung sino ang event organizer sa isinagawang political demonstration ng mga Overseas Filipino Workers sa naturang bansa.

Kasunod ito ng pagkakaaresto ng halos 200 pilipino sa Qatar dahil sa illegal na pagsasagawa ng kilos-protesta kasabay ng kaarawan ni dating Pangulong Rodrigo Duterte.

Sa panayam ng DWIZ, sinabi ni foreign Affairs Undersecretary Eduardo De Vega, na posibleng managot ang event organizer pero walang umaamin kung sino ang nanguna sa ilegal na demonstrador.

Dagdag pa ng DFA Official na maaaring makulong ng tatlong taon ang mga nagsasagawa ng political rally sa Qatar.

Doble-kayod na rin anya ang pamahalaan para mapalaya ang mga Pilipinong inaresto sa nabanggit na bansa.

Posibleng umabot ng 50,000 katao ang mamamatay, oras na tumama ang ‘the big one’sa bansa.

Ito ayon kay PHIVOLCS Director Doctor Teresito Bacolcol, at binigyan-diin na batay sa kanilang pag-aaral, tinatayang nasa mahigit 30,000 katao ang mamamatay sa mismong lindol na posibleng tumama sa National Capital Region  habang na sa 18,000 ang kargdagang mamatay dahil sa sunog.

Bukod pa anya rito, nakikita rin nilang aabot sa 12 hanggang 13% ng mga residential building ang maaapektuhan sa nasabing lugar.

Paliwanag pa ng PHIVOLCS Chief, bagama’t imposibleng malaman ang eksaktang araw at oras ng pagtama nito hindi tulad ng bagyo, nakita nila ang posibilidad ng ‘the big one’ dahil sa banta ng West Valley Fault na nasa silangang bahagi ng Metro Manila.

Ang tinatawag na ‘The Big One’ ay ang 7.2 magnitude o  nasa intensity 8 na lindol na nakikitang tatama sa NCR at mga kalapit na lugar.

Dumepensa ang Malakanyang sa panibagong banat ni Vice President Sara Duterte na sinasabing papunta basurahan ang Pilipinas dahil sa administrasyong Marcos.

Sinabi ni Palace Press Officer Undersecretary Claire Castro, na maaaring nasasabi ito ni VP Sara dahil bulag ito sa mga ginagawa ng pamahalaan.

Marahil anya ay sadyang hindi inaalam ng Bise Presidente ang mga programa at proyekto ng administrasyon na nakatutulong sa taumbayan.

Nagpasaring pa si Undersecretary Castro kay VP Duterte sa pagsasabing ang kinakantyawan nitong walang ginagawa ay nasa Pilipinas at nagta-trabaho samantalang siya ay nasa ibang bansa.

Nilinaw ng isa sa tatayong prosecutor ng impeachement trial na hindi obligadong umuwi sa Pilipinas si Vice President Sara Duterte mula sa The Hague, Netherlands upang sagutin ang kinakaharap nitong pitong articles of impeachment.

Kasunod ito ng hirit ng prosecution team ng Kamara kay Senate President Francis Chiz Escudero na maglabas ng writ of summons para sumagot ang Bise Presidente sa loob ng 10 araw.

Ayon kay Iloilo Third District Representative Lorenz Defensor, may malaking obligasyon ang pangalawang pangulo sa Pilipinas sa kabila ng pag-aruga nito sa kanyang ama na si dating Pangulong Rodrigo Duterte.

Hinamon ng mambabatas si VP Sara na huwag gamiting dahilan ang kanyang ama upang makaiwas sa impeachment trial na ikinasa laban sa kanya, na may kinalaman sa paglulustay ng 612.5 million pesos confidential funds ng Office of the Vice President at Department of Education, na dati niyang pinamunuan.

Inireklamo rin ng mga kongresista ang sinasabing pagbabanta ni VP Sara laban kina Pangulong Ferdinand Marcos Junior, First Lady Liza Araneta-Marcos, at House Speaker Martin Romualdez sa kasagsagan ng imbestigasyon sa confidential funds ng dalawang ahensiya.

Ibinasura ni Senate President Chiz Escudero ang panawagan ng Kamara na obligahing sagutin ni Vice President Sara Duterte ang verified impeachment complaint laban sa kanya habang nasa recess pa ang Kongreso.

Pinasaringan din ng Senate President ang mga mambabatas na tila hindi alam ang rules ng Kongreso.

Malaki anya ang pagkakaiba sa kanilang trabaho kapag may sesyon at kapag naka-recess ang sesyon ng dalawang kapulungan ng kongreso.

Iginiit ni Senate President Escudero na handa naman ang Senado na makipagdebate sa mga Kongresista kung kukwestyunin ito sa Korte Suprema.

Tatalakayin muna ng International Criminal Court ang hirit ni dating Pangulong Rodrigo Duterte na interim release o pansamantalang paglaya sa detention center sa The Hague, Netherlands.

Ayon kay ICC Spokesman Dr. Fadi El Abdallah, may mga kondisyon munang kailangang matupad bago payagan ng ICC ang interim release ng isang akusado.

Gayunman, patuloy na umaasa ang legal team ni Duterte na ipagkakaloob ng korte ang hirit na pansamantalang paglaya ng dating pangulo.

Nanindigan naman ang ICC na may hurisdiskyon sila sa pilipinas kahit pa kumalas na ang Pilipinas sa Rome Statue.

Sinibak sa pwesto ang pitong tauhan ng Bureau of Immigration dahil sa pagkakasangkot sa katiwalian sa Ninoy Aquino International Airport.

Kasabay ito sa pagdating ng mahigit 100 nabiktima ng human trafficking na narecruit para mang-iscam sa myanmar.

Sinabi ni Immigration Commissioner Joel Viado, na may natanggap silang ulat na may kinalaman ang mga B.I. Officer sa pagpapaalis ng mga biktimang Pilipino patungo sa nabanggit na bansa.

Dahil dito, pinadalhan na ng show cause order ang pitong B.I. Personnel matapos tumulong sa pag-byahe ng mga pilipinong nasagip mula sa trafficking at illegal recruitment sa nasabing bansa.

Iimbestigahan na sa Huwebes ang ginawang pag-aresto ng International Criminal Court (ICC) Interpol sa kay dating Pangulong Rodrigo Duterte.

Ayon kay Senate Committee on Foreign Relations, Chairperson Imee Marcos, ipasisiyasat niya ang pag-aresto sa dating pangulo dahil nagiging sanhi na ng matinding pagkakawatak-watak ng bansa.

Mahalaga aniyang makita kung nasunod ang due process sa pag-aresto sa dating pangulo at tiyakin na hindi lang itinaguyod kundi naprotektahan din ang mga legal na karapatan ni duterte.

Iginiit pa ng Senador na kailangang masagot ang isyung ito upang maitaguyod ang hurisdiksyon ng bansa at linawin ang mga panuntunan na sumasaklaw sa mga law enforcement agencies at ang kanilang ugnayan sa mga international tribunals.

Ipapatawag ng Presidential sister sa pagdinig ang mga  opisyal mula sa Philippine National Police; Office for Transportation and Security ng Department of Transportation; National Security Council; Civil Aviation Authority of the Philippines at iba pang resource persons at witnesses. —ulat mula kay Cely Ortega-Bueno (Patrol 19)