Jenn Patrolla

Pinamamadali na ng Department of Health ang pagbuo ng mga ‘world-class emergency medical response team’ sa buong bansa bilang paghahanda sa mas malakas na pagyanig sa bansa.

Kabilang ito sa paghahanda sa tinatawag na ‘The Big One’ na inaasahang napakalakas na lindol sa Metro Manila dahil sa posibleng paggalaw ng West Valley Fault.

Binigyang diin ni Health Secretary Ted Herbosa ang pangangailangang bumuo pa ng mas maraming medical response team sa buong bansa.

Gayunman, may mga bagong national-level team na binubuo ngayon ang DOH sa mga pangunahing rehiyon para sa mas mabilis na deployment.

Itinanggi ng Commission on Elections ang umuugong na balita na sinasabing nagka-aberya sa unang araw ng botohan sa ibang bansa gamit ng internet.

Kasunod ito ng reklamo ng ilang Overseas Filipino Workers sa social media na hindi makita ang pangalan ng mga kandidatong ibinoto at maraming code ang lumalabas.

Ayon kay COMELEC Chairman George Garcia, normal lamang ang naranasan ng ilang OFW dahil bahagi ito sa security features para sa proseso ng pagboto sa internet.

Gaya rin anya ito sa local set up kung saan hindi pinapayagan ang mga botante na kunan ng litrato ang mga opisyal na balota at mga resibo nito.

Mahigpit ding ipinagbabawal ang pagkuha ng mga larawan o screenshot sa online voting.

Gayunman, tiniyak ng Poll Body Chief sa publiko na maayos ang sistema ng halalan para sa 2025 polls na dumaan sa maraming source code review, na sinaksihan ng mga poll watchdog at iba pang stakeholder ng halalan.

Anunsyo para sa konsyumer ng Maynilad!

Makararanas ng water interruption ang ilang lugar sa Muntinlupa, Las Piñas, Parañaque, Bacoor, at Imus simula ngayong Miyerkules Santo hanggang Huwebes Santo.

Ito’y upang bigyang-daan ang pagkukumpuni sa Poblacion Water Treatment Plant sa Muntinlupa City para mapabuti pa ang serbisyo mga konsyumer ng Maynilad.

Batay sa anunsyo ng Maynilad, kabilang sa mga lugar na mawawalan ng tubig ang Molino 2 hanggang 7, Molino II-IV, Molino VII, Queens Row Central, Queens Row East at Queens Row West sa Bacoor, simula alas diyes ng gabi hanggang alas sais ng umaga.

Maging ang Pasong Buaya 1 at 2 sa Imus, mula alas diyes ng gabi hanggang alas sais ng umaga.

Gayundin ang Almanza Uno, Pilar, Talon Dos, Talon Singko sa Las Piñas simula alas sais ng gabi hanggang alas sais ng umaga.

BF Homes, Marcelo Green, at San Antonio sa Parañaque simula alas sais ng hapon hanggang alas sais ng umaga.

Dahil dito, pinayuhan ang mga apektadong customer na mag-imbak ng sapat na tubig bago ang nakatakdang maintenance.

Aalisin na ang travel ban ng 17 Overseas Filipino Workers sa Qatar matapos maaaresto ng Qatari authorities dahil nagsagawa ng illegal na kilos protesta sa nabanggit na bansa.

Ito mismo ang kinumpirma ni Migrant Workers Secretary Hans Leo Cacdac kasabay ng pagbasura sa kaso ng mga OFW.

Ayon sa Kalihim, ilang bansa na ang naka-monitor sa aktibidad ng Filipino communities partikular ang kanilang ginagawang mass actions kaya nanawagan ito sa mga OFW na mag-ingat at sundin ang mga patakaran ng kanilang host country.

Una nang tiniyak ng Qatari government na hindi na papatawan ng multa at mananatili pa rin ang mga Pilipino sa kanilang trabaho.

Pinaghahandaan na ng Metropolitan Manila Development Authority ang matinding daloy ng trapiko sa Semana Santa.

Ayon sa MMDA, mahigit dalawang libong kawani nito ang ide-deploy sa iba’t ibang pangunahing kalsada sa Metro Manila.

Bukod sa pagtiyak ng maayos na daloy ng trapiko, tutulong din ang ahensya sa mga pasaherong buntis, nakatatanda at mga pasaherong may bitbitin upang maging mabilis ang kanilang pagsakay at pagbaba sa mga transport terminal.

Tiniyak naman ng mmda na maaayos ang kanilang mga kagamitan tulad ng mga ambulansya na ide-deploy din sa iba’t ibang bahagi ng Edsa.

Mas bumagal ang inflation rate o galaw ng presyo ng mga bilihin at serbisyo sa bansa nitong Marso.

Batay sa datos ng Philippine Statistics Authority, sumadsad sa 1.8% ang inflation noong nakaraang buwan, na mas mababa sa 2.1% na naitala noong Pebrero.

Paliwanag ni PSA National Statistician at Undersecretary Dennis Mapa, isa sa tinitignang dahilan ng pagbagal ng inflation ay ang paggalaw ng presyo ng food at non-alcoholic beverages kabilang ang bigas at karneng baboy.

Samantala, bumagal din ang antas ng inflation sa National Capital Region sa 2.1% nitong marso mula sa 2.3% noong Pebrero.

Posibleng idiskwalipika ng Commission on Elections ang mga kandidatong gumagamit ng jingle ng mga artista at musikero nang walang pahintulot.

Ito mismo ang kinumpirma ni COMELEC Chairman George Erwin Garcia matapos ibunyag ng lola amour na ginagamit ang kanilang kantang “raining in manila” bilang campaign jingle nang walang permiso.

Maliban sa disqualification, sinabi ni Chairman Garcia sa DWIZ, na maaaring sampahan ng kaso ang mga kandidatong lumabag sa mandato ng ahensya.

Binalaan naman ng Poll Body Chief ang mga kandidatong na iwasang magnakaw o mamirata upang hindi ma-disqualify sa 2025 midterm elections.

Iminungkahi ng isang eksperto na dapat magkaroon na ng psychological test ang mga motoristang kukuha ng driver’s license.

Sa kabila ito ng kaliwa’t kanang road rage sa iba’t ibang lugar sa bansa.

Sa panayam ng DWIZ, sinabi ni Doctor CAmille Garcia, na sa halip na renewal sa mga lisensya, isailalim na lamang sa psychological test at drug test ang mga motorista kada tatlong taon upang maibsan ang away kalsada.

Dismayado rin si Dr. Garcia sa mga pilipinong inuuna ang pagvi-video sa halip na awatin.

Pinayuhan naman ng eksperto ang mga motorista na maging mahinahon sa pagmamaneho at maging defensive driver.

Dumami pa ang mga bansang pinatawan ni US President Donald Trump ng taripa mula sa mga  exporting companies.

Ito’y matapos i-anunsyo ni President Trump na magpapataw sila ng taripa upang makabangon muli ang mga magsasaka sa Amerika.

Ayon sa Presidente, ang nasabing taripang ipinataw ay base sa tarrif na sinisingil ng mga bansa sa US.

Kalahati lamang anya ang sinisingil nilang taripa sa Amerika kaya hindi ito maituturing na pang-tapat o ganti.

Kabilang naman sa mga bansang pinatawan ng taripa ang China na 34%; Vietnam, 46%; Taiwan, 32%; Japan, 24%; Pilipinas, 17% at ang Singapore na pinatawan ng 10% tariff.

Nilangaw o walang dumalo na resource person sa panibagong hearing ng Committee on Foreign Relations kaugnay sa pag-aresto kay dating Pangulong Rodrigo Duterte.

Tanging dumating lang sa hearing si Attorney Alexis Medina mula sa academe at dalawang abogado ng Securities and Exchange Commission (SEC).

Nagbiro si Senador Imee Marcos na kakanta at sasayaw na lang ni Senator Ronald Bato Dela Rosa dahil hindi sumipot ang mga imbitadong executive officials.

Inirekomenda naman Senador Dela Rosa na ipa-subpoena ang mga opisyal matapos tumangging dumalo sa pagdinig.

Una nang lumiham si Executive Secretary Lucas Bersamin kina senate president francis chiz escudero at  Senador Marcos na hindi padadaluhin ang mga imbitadong executive officials.

Katwiran ni Bersamin na nasagot na ng mga opisyal ng gobyerno ang mga tanong hinggil sa pag-aresto kay dating Pangulong Duterte. —ulat mula kay Cely Ortega-Bueno (Patrol 19)