MAS pinaigting pa ng Valenzuela City Business Inspection and Audit Team o CBIAT ang kampanya nito laban sa mga nagbebenta ng mga pekeng gamot.
Sinampolan agad ang isang sari-sari store sa Barangay Malinta matapos itong ipasara nang mapatunayang nagbebenta ito ng pekeng paracetamol tablets.
Nagbabala naman sa publiko ang Valenzuela LGU na bumili lamang sa mga lehitimo at awtorisadong botika upang makasiguro na orihinal ang mga binibili nilang gamot.
POSIBLENG magpatuloy sa pagbaba ang antas ng tubig sa tatlong malalaking dams sa Luzon ngayong buwan.
Batay sa pinakahuling assessment ng Philippine Atmospheric, Geophysical and Astronomical Services Administration o PAGASA, tinatayang aabot sa 191 meters ang water level sa Angat Dam, 203.50 meters sa Pantabangan Dam, at 174 meters naman sa Magat Dam.
Ayon kay PAGASA hydrologist Adele Duran, kahit pa umulan ngayong buwan sa mga watersheds ay hindi pa rin ito sapat para mapaangat ang antas ng tubig sa mga nasabing pasilidad.
Kasabay nito, ibinabala rin ni Duran ang posibleng pagkakaroon ng water shortage sa Pantabangan at Magat dams.
SUMAMPA na sa mahigit 112 million doses ng coronavirus vaccines ang na-administer sa buong bansa.
Ayon sa National COVID-19 dashboard, fully vaccinated na ang hindi bababa sa 52 million Filipinos.
Maliban dito, higit tatlong milyon naman ang nakatanggap na ng booster doses bilang dagdag proteksiyon kontra COVID-19.
Samantala, nakumpleto na ang procurement ng pamahalaan ng 13 million doses ng Moderna matapos dumating ang karagdagang 150,540 doses noong Biyernes.
PUMALO na sa isang bilyong piso ang halaga ng humanitarian assistance na inilaan ng Estados Unidos para mga sinalanta ng bagyong Odette.
Sa pamamagitan ng US Agency for International Development (USAID), ibinuhos ng Department of Social Welfare and Development (DSWD) ang 129,400 food packs sa Caraga, Central Visayas, Mimaropa, Western Visayas, at iba pang bahagi ng Luzon.
Nabatid na sa pakikipagtulungan din ng World Food Program, nakapaglatag din ang international organization ng 12 mobile storage units at isang generator sa itinayo nitong emergency logistics hub sa Surigao City, Surigao del Norte.
Laya na ang political prisoner na si Juanito Itaas matapos makulong ng tatlumpu’t dalawang taon.
Ayon sa grupong Kapatid, si Itaas ang “longest-held Filipino political prisoner” na naaresto noong 1989 sa Davao at nahatulan ng 39 taong pagkakabilanggo dahil sa pagpatay kay American Col. James Rowe, dating hepe ng Army Division ng Joint RP-US Military Advisory Group (JUSMAG).
Si Rowe ay nasawi makaraang tambangan noong April 21, 1989 habang papasok sa kanyang trabaho sa JUSMAG office sa Quezon City, bagay na inako naman ng New People’s Army (NPA).
Habang nakakulong si Itaas sa New Bilibid Prison (NBP) ay doon na rin ito nagka-asawa at nagkaroon ng tatlong anak.
Inihayag ni “filipino flash” Nonito Donaire Jr. na handa siyang bumalik ng Junior Bantamweight Division para sagupain ang mga mababangis na tulad nina Roman “chocolatito” Gonzales at Juan Francisco Estrada.
Ayon kay Donaire, handa siyang itaya ang kanyang korona laban kay Gonzales o kaya kay Estrada.
Si Donaire ay four-division champion na sumabak din sa flyweight, junior bantamweight at super bantamweight classes.
Hawak ngayon ng Pilipino boxer ang WBC 118-pound champion at siya ang pinakamatandang kampeon na may hawak ng nasabing korona.
Pumanaw na ang aktor na si Sidney Poitier sa edad na 94 taong gulang.
Si Poitier ay nakilala sa mga ginampanan niyang papel sa mga pelikulang “Guess Who’s Coming to Dinner,” “In the Heat of the Night,” “To Sir, with Love,” at iba pa.
Nakuha rin ni Poitier ang history-making best actor oscar award para pelikulang “Lilies of the Field” noong 1963.
Bawal na sa Quezon City ang mass gathering activities sa mga religious festivals at community celebrations habang nasa ilalim ng Alert level 3 o mas mataas na antas ng alerto.
Batay inilabas na memorandum ng Quezon City LGU, ipinagbabawal ang pagdaraos ng mga parada at prusisyon sa nalalapit na Chinese New Year.
Maliban dito, bawal din ang mga aktibidad sa pista tulad ng Santacruzan, variety shows, fireworks displays, contact sports activities, at iba pa.
Tuloy-tuloy ang power restoration works sa mga lugar na sinalanta ng bagyong Odette.
Ito’y ayon kay Department Of Energy Undersecretary Felix William Fuentebella sa kabila aniya ng pagsirit ng mga kaso ng COVID-19 sa bansa.
Sinabi ni Fuetebella na may nakahanda silang contingency measures upang hindi maapektuhan ng pandemya ang restoration efforts sa Cebu, Bohol at Leyte.
Matatandaang inihayag ng National Grid Corp. Of The Philippines (NGCP) na naibalik na ang 92% ng lahat ng mga apektadong transmission lines sa mga naturang lugar.
Inilipat umano sa isang ospital sa Maynila ang murder suspect at dating board member ng Philippine Charity Sweepstakes Office na si Sandra Cam dahil sa iniinda nitong karamdaman.
Ayon sa ulat, mula sa National Police General Hospital ay dinala si Cam sa Medical Center Manila sa United Nations Avenue.
Si Cam, kasama ang kanyang anak na si Marco Martin at limang iba pa, ay nahaharap sa kasong murder matapos madawit sa kasong pagpatay kay Batuan, Masbate Vice Mayor Charlie Yuson III sa Maynila noong October 2019.