Gilbert Perdez

NADAKIP ng mga ahente ng Bureau of Immigration ang isang Chinese national na wanted sa Pilipinas dahil sa kasong may kaugnayan sa ipinagbabawal na gamot.

Ayon kay BI intelligence chief Fortunato Manahan Jr., ang dayuhang si Lin Guanxiu ay sasakay na sana sa isang commercial flight sa NAIA Terminal 2 nang maharang nila ito.

Si Lin ay may nakabinbin na arrest warrant na inilabas ng Trece Martires City Regional Trial Court noong June 10, 2019 dahil sa umano’y pagkakasangkot nito sa iligal na droga.

HINDI mandatory o sapilitan ang pagsusuot ng face shield sa Marikina City.

Ito ang nilinaw ng lokal na pamahalaan sa gitna ng pagsirit ng COVID-19 cases sa Pilipinas.

Ayon sa Marikina LGU, optional ang pagsusuot ng face shield at bahagi lamang ito ng ibayong pag-iingat sa mga congested areas kaya’t nangangahulugan na wala itong kaakibat na penalty o multa.

Muli namang umapela ang Lokal na Pamahalaan sa kanilang mga residente na gawin ang ibayong pag-iingat lalo pa’t nariyan ang banta ng Omicron variant.

KALABOSO ang dalawang kilabot umanong tulak ng droga sa ikinasang buy bust operation sa Candasa St., Brgy Tuktukan, Taguig City.

Kinilala ang mga suspek na sina Pablito Asas at Danton Rey Garcia, parehong nakatira sa nasabing lungsod.

Maliban sa P500 buy bust money, nasabat mula sa mga suspek ang mahigit P70K halaga ng umano’y shabu.

Nakatakdang sampahan ng kaukulang reklamo sa Taguig Prosecutor’s Office ang mga naturang suspek.

Muling ginawang mandatory ng Marikina City local government ang pagsusuot ng face shield sa mga vaccination center, pampublikong sasakyan, at pampublikong lugar tulad ng palengke, parke, at iba pa.

Pahayag ni City Mayor Marcy Teodoro, ginawa ang hakbang bilang pag-iingat dulot ng sumisirit na kaso ng COVID-19 sa bansa.

Maliban dito, inaasahang ipatutupad din ito sa mga mall sa lungsod.

Sa kasalukuyan, mahigit isang libo na ang active cases sa Marikina. –Mula sa ulat ni Jaymark Dagala (Patrol 9)

NAGWAKAS ang maliligayang araw ng isang babaeng tulak umano ng ipinagbabawal na droga matapos madakip ng mga awtoridad sa Aguilar St. Brgy. Tejeros, Makati City.

Kinilala ni City Chief of Police Col. Harold Depositar ang suspek na si April Reyes, na nakatira sa nasabing lungsod.

Nasabat mula kay Reyes ang mahigit P80,000 halaga ng shabu, isang pitaka, at P500 buy bust money.

Inihahanda na ang kaukulang reklamong isasampa laban sa suspek.

LAGLAG sa kamay ng mga awtoridad ang isang miyembro umano ng notoryusong Lalaine Saligumban Criminal Group na hinihinalang sangkot sa robbery holdup at illegal drug activities sa Pasay, Makati at Maynila.

Kinilala ang suspek na si Lariz Guevarra na nadakip habang may bitbit na improvised na baril sa Kamagong St., Brgy. 145 sa Pasay.

Magsasagawa sana ng buy bust operation sa Brgy. Sto. Niño ang mga pulis nang mamataan ang isang grupo ng mga lalaki na walang suot na face mask at nang sitahin ay nagpulasan ang mga ito.

Isang improvised na baril na may kasamang bala ang nasabat mula kay Guevarra na ngayo’y nahaharap sa mga kaukulang reklamo.

NABUWAG ng mga awtoridad ang isang drug den kung saan nasabat ang mahigit isang milyong pisong halaga ng hinihinalang shabu sa ikinasang operasyon sa Dinggin Bayan St., Brgy. Ibayo-Tipas, Taguig City.

Ayon kay Southern Police District o SPD Director BGen. Jimili Macaraeg, naaresto rin sa operasyon sina Nerilita Jumaquio, Jon-Jon Cajucom, Jobelle Cruz, Norudin Bandong, Raida Ali, at Crisanto San Jose na isang senior citizen.

Pinangunahan ng mga elemento ng District Drug Enforcement Unit o DDEU at Taguig PNP ang operasyon kung saan nakumpiska ang mahigit  1.3 million pesos na halaga ng hinihinalang shabu, limang daang pisong buy bust money, isang shoulder bag, dalawang pouch, dalawang ID at dalawang timbangan.