Ipinagmalaki ng Russian defense ministry na sumuko na ang huling grupo ng Ukrainian forces na nagtago sa Azovstal steelworks sa Mariupol.
Sa kabilang banda, kinumpirma naman ng Ukrainian government na tinamaan ng missile ng Russia ang isang cultural centre sa Kharkiv region.
Wala pang opisyal na pahayag ang mga Ruso ukol dito.
Nasungkit ng mga Filipino athletes na sina Ruben Gonzales at Treat Huey ang gintong medalya sa SEA Games men’s doubles title.
Ito’y matapos pataubin ng dalawa ang mga kapwa nila Pinoy na sina Jeson Patrombon at Francis Alcantara sa kanilang laro sa Hanoi, Vietnam.
Samantala, nangibabaw din si Rubilen Amit laban kay Chezka Centeno sa isang all-Filipino final sa women’s 10-ball singles sa nasabing laro.
Nanawagan sa Food and Drug Administration o FDA ang isang mambabatas na pagkalooban ng ‘full approval’ ang mga magagandang brand ng bakuna kontra COVID-19 na mayroon nang emergency use authorizations o EUA.
Ayon kay Senior Citizen Party-list Rep. Rodolfo Ordanes, sa pamamagitan nito’y tiyak na tataas ang vaccination rates sa bansa dahil mabibigyan na ng ‘certificate of product registration’ ang ilang brand ng bakuna.
Sa kasalukuyan, mahigit 68 million Filipinos na ang fully vaccinated laban sa virus.
Nagbabala sa publiko ang Catholic Bishops’ Conference of the Philippines (CBCP) laban sa phishing scams na gumagamit ng pangalan ng Apostolic Nunciature sa Maynila.
Ayon kay CBCP Secretary General Msgr. Bernardo Pantin, sa pamamagitan ng e-mail ay nagpapanggap ang mga scammer bilang si Archbishop Charles Brown ang Apostolic Nuncio to the Philippines.
Dahil dito, nagbabala si Pantin sa mga deboto na huwag i-click ang ipapadalang link sa kanila dahil maaaring ito’y phishing attempt para makuha ang mga detalye ng kanilang e-mail account.
MAHIGIT anim na raang milyong pisong halaga ng mga pekeng produkto ang nasabat ng mga elemento ng Bureau of Customs o BoC sa magkahiwalay na operasyon sa Cavite at Bulacan.
Bitbit ang Letters of Authority o LOA na inisyu ni Customs Commissioner Rey Guerrero, unang ininspeksiyon ang warehouse ng Maclane Storage Facility sa Niog Road, Bacoor City kung saan nadiskubre rito ang mga counterfeit goods na tinatayang nagkakahalaga ng P590 milyon.
Sa hiwalay namang operasyon, aabot sa P78 milyong halaga ng mga peke ring produkto ang natagpuan sa warehouse ng Fochun Industrial Compound sa Balagtas, Bulacan.
Posibleng ipagharap ang dalawang kompanya ng mga kasong paglabag sa Intellectual Property Code of the Philippines, Consumer Act of the Philippines, at Customs Modernization and Tariff Act.
Nahaharap sa kasong kriminal ang isang limampu’t walong taong gulang na empleyado ng Land Transportation Office matapos maaresto sa ikinasang entrapment operation ng Criminal Investigation and Detection Group o CIDG sa Quezon City.
Ayon kay CIDG chief Maj. Gen. Eliseo Cruz, ang suspek na si Maria Fe Carpina Doringo, releasing & receiving officer na nakatalaga sa LTO Novaliches District Office, ay nahuli dahil sa reklamo ng mga kinatawan ng Anti-Red Tape Authority o ARTA.
Sinabi ni Cruz na nanghihingi umano ng pera si Doringo kapalit ng mabilis na pagre-release ng student permits at driver’s license ng mga aplikante.
Mahaharap ang suspek sa kasong paglabag sa Republic Act No. 11032 o ang Anti-Red Tape Act.
Hindi na matutuloy ang clinical trial ng Ivermectin bilang gamot laban sa COVID-19.
Ito ang inanunsiyo ni Department of Science and Technology Secretary Fortunato de la Peña kasunod na rin ng rekomendasyon ng Department of Health at ng Governing Council ng Philippine Council for Health Research and Development o PCHRD.
Paliwanag ni de la Peña, ang kakulangan aniya sa clinical benefits ng ivermectin ang isa sa mga dahilan kung bakit hindi na matutuloy ang clinical trial ng naturang gamot.
Ibinabala ng United Nations o UN na posibleng makaranas ng matinding pagkagutom o sever hunger ang tinatayang labingwalong milyong mamamayan sa Sahel Region sa Africa sa susunod na tatlong buwan.
Ayon sa UN, ito’y dulot ng giyera sa pagitan ng Russia at Ukraine, coronavirus pandemic, climate change, at pagtaas ng presyo ng mga bilihin.
Maliban dito, nagbabala rin ang Office for the Coordination of Humanitarian Affairs o OCHA na maaaring ito rin ang magtulak sa maraming mamamayan para mag-migrate sa ibang lugar.
Binanggit pa ng UN na apektado rin ng hunger crisis mula pa noong 2014 ang apat na bansa sa Africa na kinabibilangan ng Burkina Faso, Chad, Mali at Niger.
Timbog ang isang barangay official sa ikinasang buy bust operation sa bayan ng Bacuag sa Surigao del Norte.
Kinilala ng Philippine Drug Enforcement Agency o PDEA-Caraga ang suspek na si Alter Dusaran, konsehal ng Barangay Pautao.
Nasabat mula kay Dusaran ang tinatayang 4,000 pesos na halaga ng hinihinalang shabu.
Sasampahan ang suspek ng kasong paglabag sa Comprehensive Dangerous Drugs Act.
Sinagip ng mga tropa ng pamahalaan ang isang sugatang lider ng New People’s Army (NPA) sa bayan ng Jabonga sa Agusan del Norte.
Ayon sa 29th Infantry Battalion (29IB) ng Philippine Army, nakasagupa ng mga sundalo ang isang grupo ng mga rebelde sa Barangay Bangonay.
Makalipas ang ilang minutong sagupaan, natagpuan nila ang sugatang rebelde na si Elgelbert Bongaos na sinasabing squad leader ng North Eastern Mindanao Regional Committee.
Ayon kay 29IB commander Colonel Jason Saldua, iniligtas at ipinagamot nila si Bongaos bilang pagtalima sa International Humanitarian Law.