Isinusulong ng isang senador na maibalik ang Philippine history sa high school curriculum.
Sa kanyang Bill, binigyang-diin ni Sen. Robinhood “Robin” Padilla na mahalagang malaman ng mga kabataan ang historical roots at cultural heritage ng bansa.
Matatandaang tinanggal ang nasabing asignatura sa pamamagitan ng Department Order No. 20 ni dating DepEd Secretary Armin Luistro upang bigyang-daan ang K-12 program.
Ikinalugod ng Climate Change Commission o CCC ang pahayag ng Department of Education ukol sa pagpapaigting ng climate education sa K to 12 curriculum.
Ayon kay CCC Secretary Robert Borje, mahalagang maisama ang usapin ng pagbabago ng klima sa education curriculum na isa sa mga susi upang itaas ang kamalayan tungkol dito sa hanay ng mga kabataan.
Matatandaang bumuo ang DepEd ng Disaster Risk Reduction and Management Service o DRRMS para matiyak ang integrasyon ng climate literacy sa basic education alinsunod na rin sa Climate Change Act of 2009.
Mas palalakasin pa ni Pangulong Ferdinand Marcos Jr. ang bilateral relations sa pagitan ng Pilipinas at India.
Ito ang naging commitment ng Pangulo matapos makausap sa telepono si Prime Minister Narendra Modi na bumati rin sa kanya sa pagkapanalo niya bilang ikalabimpitong Pangulo ng bansa.
Sa kalatas naman na inilabas ng Ministry of External Affairs ng India, nangako rin si Modi na susuportahan nito ang mga development programs ng bansa sa ilalim ng administrasyong Marcos.
Nagpadala ng relief items ang National Intelligence Coordinating Agency o NICA para sa mga residenteng apektado ng lindol sa Northern Luzon.
Sa isang turnover ceremony, tinanggap ng Diocese of Abra ang donasyon sa pamamagitan ni Bishop Leopoldo Jaucian.
Nabatid na nag-ambagan ang lahat ng mga opisyal at personnel ng NICA sa pangunguna ni Director General Ricardo de Leon upang maisakatuparan ang relief effort.
Nasa kalahating milyong piso ang nakalap ng ahensya kaya’t nakabili ito ng bigas, grocery food items, tolda o water-proof tarpaulin, kumot, sabon, tubig at food packs mula sa isang fast-food chain.
Hinamon ng Korte Suprema ang mga commissioners’ ng Integrated Bar of the Philippines–Commission on Bar Discipline (IBP-CBD) na bilisan ang pagresolba sa mga kaso laban sa mga abogado at iba pang miyembro ng Philippine Bar.
Ayon kay Chief Justice Alexander Gesmundo, mahalaga ito upang maigawad sa mga complainant ang hustisyang hinihingi nila.
Sa “First CBD Commissioners’ Summit” na ginanap sa Diamond Hotel sa Maynila, sinabi ng punong mahistrado na importanteng makagawa agad ng rekomendasyon ang mga nag-iimbestigang commissioners upang maaksyunan ito ng kataas-taasang hukuman sa lalong madaling panahon.
Isiniwalat ni Gesmundo na nasa 902 cases pa ang kasalukuyang nakabinbin sa IBP na kailangan nitong resolbahin bago i-endorso sa Supreme Court.
Arestado ang isang “high-value individual” matapos mahulihan ng 1.224 million pesos na halaga ng hinihinalang shabu sa ikinasang buy bust operation sa Barangay Palinpinon, Valencia, Negros Oriental.
Kinilala ng Negros Oriental Provincial Police Office o NOPPO ang suspek na si Don Emilio Cordova Cariño, 35 taong gulang, at residente ng Barangay Batinguel.
Nasabat mula kay Cariño ang pitong plastic sachets na naglalaman ng umano’y shabu na tinatayang tumitimbang ng 180 grams.
Mahaharap ang suspek sa reklamong paglabag sa Republic Act 9165 o Comprehensive Dangerous Drugs Act of 2002.
Nagdiwang ng kanyang ika-58 kaarawan ang singer na si Gary Valenciano sa “ASAP Natin To”.
Bilang tribute, ang show ay binuksan nina Ogie Alcasid, Regine Velasquez, Martin Nievera at Zsa Zsa Padilla sa pamamagitan nang pagkanta ng mga awitin ni Gary V.
Nagpapasalamat naman ang binansagang “Mr. Pure Energy” sa lahat ng mga sumusuporta sa kanya at maging sa Maykapal sa loob ng 40 years niya sa entertainment industry.
Umarangkada na ang mas pinaigting na kampanya ng Land Transportation Franchising and Regulatory Board o LTFRB Central Luzon laban sa mga kolorum o illegal public utility vehicles na bumibiyahe sa rehiyon.
Ayon kay LTFRB-3 Director Nasrudin Talipasan, anim na sasakyan ang agad nilang nasampulan at in-impound matapos isyuhan ng Inspection Report Summons o IRS dahil sa pag-o-operate nang walang ‘proper authority’ mula sa ahensya.
Bukod dito, labing-siyam na iba pa ang hinuli dulot ng iba’t ibang paglabag tulad ng overcharging, cutting trips o wala sa ruta, at hindi pagsusuot ng uniporme.
Paliwanag ni Talipasan, hangad ng LTFRB na itaguyod at protektahan ang karapatan ng mga law-abiding operators at ang mga mananakay tungo sa isang malinis at malusog na kumpetisyon sa public transportation.
Nasungkit ng nag-iisang mananaya mula sa Taytay, Rizal ang mahigit 163 million pesos na jackpot prize sa Ultra Lotto 6/58.
Ayon sa PCSO o Philippine Charity Sweepstakes Office, natumbok ng lone bettor ang tamang kumbinasyon na 04-46-58-20-34-28.
Labimpitong mananaya naman ang nakahula sa limang numero o kumbinasyon at parehong makakatanggap ng 120,000 pesos bawat isa.
Ang Ultra Lotto 6/58 ay binobola tuwing Martes, Biyernes at Linggo.
Sampu ang kumpirmadong nasawi habang limampu’t limang iba pa ang sugatan sa sunod-sunod na missile attacks ng Israel sa Gaza Strip sa Palestine.
Sinasabing kabilang sa mga namatay ang isang kumander ng Islamic Jihad group at isang batang babae.
Ayon sa health ministry, kasalukuyang nilalapatan ng lunas sa ospital ang mga sugatan.
Wala pang pahayag ang Israel ukol sa nasabing insidente.