Nadagdagan pa ang bilang ng mga dinapuan ng coronavirus disease 2019 (COVID-19) sa South Korea.
Ayon sa Center for Disease Control and Prevention, nakapagtala ang SoKor ng 229 kaso kahapon, araw ng Biyernes.
Sinasabing karamihan sa mga nagkaroon ng virus ay ang mga debotong dumalo sa religious services sa isang simbahan kung saan isang 61 taong gulang na matanda ang umano’y nakahawa sa mga ito.
Sa ngayon ay may 433 nang kumpirmadong kaso ng COVID-19 sa SoKor at dalawa dito ang namatay.
Balak nang ilikas ng United States government ang mga American citizen na lulan ng Diamond Princess cruise ship na naka-quarantine at nakadaong sa Yokohama Port sa Japan.
Sa isang liham para sa mga mamamayan nila sa cruise ship, binanggit ng White House na plano nitong magpadala ng isang chartered plane sa Yokohama para sa evacuation.
Gayunman, oobligahin ang mga bakwit na sumailalim muna sa dalawang linggong quarantine sa oras na dumating na sila sa Amerika upang maiwasan ang posibleng pagkalat ng coronavirus disease 2019 (COVID-19).
Kinumpirma ng World Health Organization (WHO) na nakapagtala na ng unang insidente ng pagkamatay dahil sa coronavirus disease 2019 (COVID-19) ang bansang France.
Sa isang press conference sa Munich, binanggit ni Michael Ryan, direktor ng Emergencies Programmes ng WHO na ang biktima ay isang 80 taong gulang na turista na naospital muna bago pumanaw.
11 kaso na ng COVID-19 ang naitala sa nabanggit na bansa.
Nakapagtala na ng unang kaso ng coronavirus disease 2019 (COVID-19) ang bansang Egypt.
Ayon kay Health Ministry spokesman Khaled Mugahed, ito rin ang kauna-unahang kaso ng COVID-19 sa Africa.
Inilarawan ang biktima bilang isang dayuhan na kasalukuyang nasa ospital at naka-isolate.
Gayunman, hindi tinukoy ng Egypt ang nationality ng naturang biktima.
Magpapahinga muna sa basketball si Barangay Ginebra center Greg Slaughter makaraang ang anim na taon sa Philippine Basketball Association (PBA).
Ang pahayag ay ginawa ni Slaughter matapos mapaso ang kanyang kontrata sa Gin Kings.
Ayon kay Slaughter, hindi pa niya alam kung anong kapalaran ang naghihintay sa kanya sa hinaharap pero tiyak ay may nakalaan aniyang mas maganda para sa kanya.
Nagpasalamat naman si Slaughter sa management ng Ginebra, kay Coach Tim Cone at sa kanyang teammates.
Samantala, hinihinalang ite-trade si Slaughter ng Gin Kings sa ibang koponan kaya inunahan na niya ito.
Hindi bababa sa 10 katao ang nasawi makaraang pagbabarilin ng isang sundalo sa lungsod ng Nakhon Ratchasima sa Thailand.
Ayon sa pulisya, bago ang insidente ay nag-post pa ng larawan sa Facebook ang hindi pinangalanang suspek habang may hawak na baril.
Unang namaril ang lalaki sa isang shopping mall bago pinasok naman ang isang bahay at pinagbabaril ang ilang tao.
Kasunod nito, bumili pa umano ng armas ang salarin sa isang gun store bago nilusob ang isang military base.
Nakatakas ang suspek na sundalo at patuloy itong tinutugis ng mga awtoridad.
Ipapalabas na ngayong buwan ng Pebrero ang comeback project ni Julia Montes.
Sa unang pagkakataon, ipinasilip na ang ilang detalye ng action-drama mini series na may pamagat na “24/7.”
sa trailer ng mini series na produksiyon ng Dreamscape Entertainment, sumabak si Montes sa matinding aksyon at drama.
Gagampanan ni Montes ang papel ng isang security officer na nakatalaga sa isang pagamutan kung saan magkakaroon ng virus outbreak at tatamaan nito ang kanyang anak.
Makakasama ni Montes sa serye sina Joross Gamboa, J.C. Santos, Arjo Atayde, Joem Bascon, Pen Medina, Meryll Soriano , Melissa Ricks, at marami pang iba.
Nangako si Lebron James na ipagpapatuloy niya at ng kanyang teammates sa Los Angeles Lakers ang legacy ni club icon Kobe Bryant na pumanaw dahil sa helicopter crash noong Lunes.
Sa harap ng kanilang fans sa staples center bago ang kanilang laro laban sa Portland Trail Blazers, nanawagan si James sa lahat ng mga tagahanga na ipagdiwang ang buhay at karera ni Bryant na kinabibilangan ng limang NBA titles sa loob ng 20 taon kasama ang Lakers.
Sa nabanggit na laban, kumamada si Lebron James ng 22 points, 10 assists at 8 rebounds, habang nagdagdag si Kyle Kuzma ng 17 points at 15 rebounds.
Ngunit sa kabila nito, natalo ng Blazers ang Lakers sa score na 127-119.
Sinuspinde na ng Vietnam ang lahat ng mga flights patungong China dahil sa coronavirus outbreak.
Ayon sa Civil Aviation Authority, ito’y bahagi ng “strengthening measures” laban sa posibleng pagkalat ng virus.
Dahil dito, nagpahayag ang Vietnam Airlines at budget airline Jetstar Pacific na hindi na ito lilipad patungong China, kabilang ang Hong Kong at Taiwan.
Dismayado naman ang mga turista na magtutungo sana ng China, kasama ang isang AFP correspondent, matapos silang pababain ng eroplano nang ilabas ng gobyerno ang naturang kautusan.
Patay ang 3 hinihinalang miyembro ng New People’s Army (NPA) makaraang makasagupa ng militar sa bayan ng Sen. Ninoy Aquino sa Sultan Kudarat.
Ayon sa Western Mindanao Command, ang mga napatay ay pawang mga kasapi ng Daguma front ng far South Mindanao Regional Command ng NPA na pinamumunuan ng isang “kumander rayray.”
Sinasabing umabot ng 30 minuto ang bakbakan ng mga sundalo at ng tinatayang 25 rebelde sa Sitio Sinuksok, Barangay Bugso sa naturang bayan.
Pahayag ni Maj. Gen. Diosdado Carreon, kumander ng Joint task force central, patuloy ang ginagawang pursuit operation ng mga tropa ng pamahalaan laban sa mga nakatakas na miyembro ng NPA.
Narekober sa pinangyarihan ng insidente ang isang kalibre .45 na baril, isang two-way radio, limang sako ng bigas at isang medical kit na pinaniniwalaang pag-aari ng mga rebelde.